Bjarnarbúðin styrkir íshokkístarfið
Með kjörútsýni yfir svellið, situr Bjarnarbúðin og tekur á móti foreldrum og iðkendum hvern æfingardag og á heimaleikjum íshokkídeildarinnar Fjölnir-Björninn. Þar er manni ávallt mætt með brosi og úr hefur orðið viss félagsmiðstöð þar sem foreldrar geta komið saman, horft á æfingar barnanna sinna með kaffibolla í hönd, hlegið saman og rætt saman um heima og geima. Bjarnarbúðarkonurnar sjá til þess að ýmiss hokkívarningur sé fáanlegur en engin sambærileg verslun er á höfuðborgarsvæðinu.
Allir þessir kaffibollar og ágóði af sölu hokkívarnings og matar hafa orðið til þess að nú fengu iðkendur ýmiss konar æfingarbúnað gefins frá Bjarnarbúðinni. Það er mikil lukka að fá búnað sem þennan til að nota til æfinga, bæði á ís og á þrekæfingum. Bjarnarbúðin hefur einnig keypt búnað og brynjur fyrir okkar yngstu iðkendur. Við í íshokkídeildinni erum afar þakklát fyrir þennan styrk til okkar, og krakkarnir svo sannarlega glaðir með nýjar leiðir til æfinga.
Á fyrri myndinni má sjá aðalþjálfara okkar, Alexander Medvedev, taka á móti styrk Bjarnarbúðarinnar sem afhentur var af þeim konum sem taka brosandi á móti foreldrum og iðkendum dag hvern (frá vinstri til hægri: Kristín Fossdal, Guðbjörg Gunnarsdóttir, Alexander Medvedev, Heiðrún Kristín Lúðvíksdóttir og Sigríður Hafdís Baldursdóttir).
Á seinni myndinni má sjá iðkendur í 3. flokki vera að prófa okkar nýju „slide boards“ sem við fengum að gjöf.
Finna má Bjarnarbúðina á Facebook hér : Bjarnarbúðin
Fyrir hönd íshokkídeildarinnar vil ég þakka Bjarnarbúðinni kærlega fyrir þessa kærkomnu gjöf og styrk til barna- og unglingastarfsins,
Hilja Guðmunds, formaður stjórnar.
Vinningaskrá happdrættis
Því miður voru gerð mistök í fyrri útdrætti og því þurfti að ógilda hann. Við biðjumst velvirðingar á þessum mistökum. Nýjan og gildandi útdrátt má sjá HÉR.
Hægt er að nálgast vinninga á skrifstofu Fjölnis frá og með mánudeginum 6.maí á milli kl. 9-16 frá mánudegi til fimmtudags.
Við þökkum kærlega fyrir stuðninginn. Áfram Fjölnir.
Flottur vetur hjá 3.fl.kvk
Tímabilið hjá stelpunum er búið að vera lærdómsríkt. Stelpurnar spiluðu í 2.deildinni í vetur ásamt því að margar þeirra hafi gegnt stóru hlutverki í meistaraflokknum. Margar sem hafa tekið miklum framförum og aðlagast nýjum leikstíl hratt og örugglega. Þær enduðu í 5.sæti í deildinni og duttu út í 8.liða úrslitum í bikar gegn Fylki sem fór alla leið í úrslitaleikinn. Þær sigruðu svo B-úrslitin með frábærri frammistöðu. Nú tekur við undirbúningur fyrir næsta tímabil og ætla stelpurnar sér að nýta þann tíma vel. Skemmtilegum vetri lokið hjá mjög svo samstilltum hópi.
![](https://fjolnir.is/wp-content/uploads/2019/04/58847404_2308499062537600_3653553276537798656_o.jpg)
IceCup 2019
Dagana 25.-28. apríl var íshokkímótið Iceland International Ice Hockey Cup 2019 haldið í Egilshöllinni. Til liðs mættu þrenn lið frá Finnlandi, stelpulið frá Akureyri, sameinað lið íslenskra félaga (SHS) og að lokum eitt lið frá okkur, Fjölnir-Björninn. Þátttökurétt höfðu iðkendur fæddir 2005 og 2006, s.s. 4. flokkur.
4. flokks lið íshokkídeildarinnar Fjölnir-Björninn vann alla sína leiki á mótinu, þar á meðal úrslitaleikinn og vann því IceCup 2019. Það er einstaklega ánægjulegt að sjá þær framfarir sem liðið hefur náð á þessu tímabili. Þrautseigja, elja, agi og viljinn til að ná lengra og gera betur hefur skilað þessum iðkendum þeim sigrum sem unnir hafa verið á svellinu. Þess má einnig geta að leikmenn úr 4. fl. Fjölnir-Björninn röðuðu sér í efstu þrjú sætin yfir stigahæstu leikmennina. Arnar Smári Karvelsson var stigahæstur leikmanna á mótinu og má sjá halda á verðlaunagripi fyrir þann titil. Hinir tveir leikmennirnir eru Haukur Freyr Karvelsson og Kristján Hróar Jóhannesson.
Á myndunum má einnig sjá nokkrar myndir úr úrslitaleiknum og auðvitað mynd af 4. flokk ásamt þjálfara, Alexander Medvedev. Frábært að enda keppnistímabilið á þennan hátt.
Við ætlum auðvitað að halda áfram að vaxa og ná enn lengra í komandi framtíð. Við hjá Fjölnir-Björninn hlökkum mikið til að fylgjast áfram með þessum leikmönnum vera ávallt besta útgáfan af sjálfum sér og bæði liði og félagi til sóma.
Sjá má niðurstöður mótsins og tölfræði á eftirfarandi tengli: Tölfræði IceCup 2019
Framhaldsaðalfundur
Framhaldsaðalfundur handknattleiksdeildar Fjölnis verður sem hér segir.
Þriðjudaginn 7.maí kl. 19:00
Fundurinn fer fram í félagsrýminu okkar í Egilshöll.
Dagskrá framhaldsaðalfundar :
c) Kjör formanns
Minnum á að framboðsfrestur um tillögur að formönnum og stjórnarmönnum er 5 dögum fyrir boðaðan aðalfund.
#FélagiðOkkar
Vormót 2019
Síðasta mót ÍSS á þessu keppnistímabili stendur nú yfir í Laugardalnum. Allir keppendur Fjölnis á mótinu hafa nú lokið keppni. Sunneva Daníelsdóttir kom fyrst keppenda í flokki Chicks inn á ísinn og í fyrsta upphitunarflokki Cubs voru þær Brynja Árnadóttir, Elva Ísey Hlynsdóttir, Emelíana Ósk Smáradóttir og Weronika Komendera. Ekki voru veitt verðlaun í flokkum Chicks og Cubs en allar fengu þær viðurkenningu fyrir þátttöku á mótinu. Þess ber að geta að þessar stelpur hafa tekið miklum framförum í vetur. Því næst var keppt í flokki Basic Novice en þar voru þær Tanja Rut Guðmundsdóttir í 5. sæti með 24,00 stig og Sara Kristín Pedersen í 6. sæti með 23,25 stig sem eru persónuleg stigamet hjá þeim báðum. Frábær árangur hjá þessum ungu stelpum.
Falur Harðarson áfram með Fjölni
Í dag skrifuðu körfuknattleiksdeild Fjölnis og Falur J Harðarson undir nýjan samning sem nær til tveggja ára. Falur mun því stýra liðinu í Dominos deildinni næsta vetur en strákarnir tryggðu sér sæti í deildinni með sigri á Hamri í úrslitakeppninni.
Markmiðið er að festa liðið í sessi sem gott úrvalsdeildarlið sem mun í framtíðinni verða öflugt lið með uppöldum leikmönnum í blandi við bestu leikmenn landsins.
Spennandi tímar framundan í Voginum.
Á myndinni eru: Guðlaug Karlsdóttir, formaður körfuknattleiksdeildar, Falur J Harðarson, þjálfari meistaraflokks karla og Guðmundur L Gunnarsson, framkvæmdastjóri Fjölnis
#FélagiðOkkar
Sumarnámskeið 2019
Við opnum fyrir skráningu á sumarnámskeið á morgun, fimmtudaginn 25.apríl
Allar nánari upplýsingar hér: https://fjolnir.is/felagid-okkar/sumarnamskeid-2019/
Nýir þjálfarar meistaraflokks kvenna
Sigurjón Friðbjörn Björnsson (Sonni) hefur verið ráðinn þjálfari meistaraflokks kvenna í handbolta hjá Fjölni. Sonni var aðstoðarþjálfari meistaraflokks kvenna á nýliðnu tímabili ásamt því að þjálfa 3. flokk kvenna. Sonni hefur mikla reynslu í handboltaþjálfun en hann er núverandi þjálfari U-17 landsliðs kvenna. Sonni þjálfaði meistaraflokk kvenna hjá ÍR á árunum 2015 – 2017. Einnig hefur verið gengið frá ráðningu Gísla Steinars Jónssonar sem aðstoðarþjálfara meistaraflokks kvenna og 3. flokks kvenna, en Gísli Steinar mun einnig sjá um þjálfun 4. flokks kvenna. Gísli starfaði á nýliðnum vetri sem þjálfari 4. flokks kvenna og aðstoðarþjálfari 4. flokks karla. Gísli starfaði við þjálfun í Noregi áður en hann hóf störf hjá Fjölni.
Á sama tíma og stjórn handknattleiksdeildar Fjölnis býður þá Sonna og Gísla velkomna til starfa vill stjórnin þakka fráfarandi þjálfara Arnóri Ásgeirssyni fyrir vel unnin störf við þjálfun meistaraflokks kvenna síðastliðin tvö tímabil sem og önnur störf fyrir handknattleiksdeildina undanfarin ár. Stjórn handknattleiksdeildarinnar hlakkar til komandi tímabils og væntir mikils af nýráðnum þjálfurum. Á meðfylgjandi mynd frá vinstri: Gísli Steinar Jónsson, Davíð Arnar Einarsson, stjórnarmaður og Sigurjón Friðbjörn Björnsson.