Knattspyrna

Margrét Helga Ólafsdóttir semur við Fjölni

Knattspyrnudeild Fjölnis hefur samið við Margréti Helgu Ólafsdóttur til næstu tveggja ára. Margrét, sem er fædd árið 2006, er spennandi sóknarleikmaður sem getur leyst allar stöður framarlega á vellinum og kemur til félagsins frá ÍH.

Þrátt fyrir ungan aldur hefur Margrét þegar aflað sér mikillar reynslu í meistaraflokki en hún hefur leikið alls 71 leik og skorað 20 mörk.

Margrét hefur þegar stigið sín fyrstu skref með Fjölni og leikið tvo leiki fyrir félagið þar sem hún hefur látið til sín taka með einu marki. Hún hefur komið mjög vel inn í hópinn og sýnt strax þá hæfileika sem gerðu hana að spennandi viðbót við leikmannahóp Fjölnis.

Vesko, þjálfari Fjölnis, er afar ánægður með að hafa fengið Margréti til félagsins:
„Að fá Margréti til liðs við okkur er mjög jákvætt og ég er persónulega mjög ánægður með þessi félagaskipti þar sem ég hef fylgst með henni í nokkurn tíma. Hún býr yfir framúrskarandi knattspyrnuhæfileikum og mjög góðum skilningi á leiknum. Hún gefur okkur fleiri möguleika inni á vellinum og eykur samkeppni innan hópsins. Hún sýndi strax sína hæfileika í fyrstu tveimur leikjunum og við trúum því að hún eigi aðeins eftir að verða betri með tímanum. Hún passar mjög vel inn í þá hugmyndafræði sem við viljum byggja á og við teljum að hún muni hjálpa okkur að ná bæði okkar skammtíma- og langtímamarkmiðum.“

Margrét sjálf hlakkar til nýja kaflans í Grafarvogi:
„Ég er mjög ánægð og spennt að vera komin í Fjölni í þennan frábæra hóp og ég er mjög spennt fyrir tímabilinu.“

Við bjóðum Margréti velkomna í Fjölni og hlökkum til að fylgjast með henni í gulu treyjunni á komandi tímabilum.

Sóley Arna Arnarsdóttir semur við Fjölni.

Knattspyrnudeild Fjölnis hefur samið við Sóleyju Örnu Arnarsdóttur til næstu tveggja ára. Sóley, sem er fædd árið 2006, er efnilegur varnarmaður sem leikur aðallega sem miðvörður og kemur til félagsins frá ÍH eftir afar gott tímabil á síðasta ári.

Þrátt fyrir ungan aldur hefur Sóley þegar aflað sér dýrmætrar reynslu í meistaraflokki og hefur leikið alls 44 leiki í meistaraflokksknattspyrnu. Hún er öflugur varnarmaður sem spilar af miklu sjálfstrausti, er hugrökk í sínum leik og örugg með boltann.

Sóley hefur þegar leikið sína fyrstu tvo leiki fyrir Fjölni og komið mjög jákvæð inn í hópinn með mikinn metnað og góða nærveru bæði innan vallar sem utan. Það verður spennandi að fylgjast með hennar þróun og framlagi í komandi verkefnum liðsins.

Vesko, þjálfari Fjölnis, er ánægður með að fá Sóleyju til félagsins:
„Við erum mjög ánægð með að hafa samið við Sóleyju til næstu tveggja ára. Hún gegndi mikilvægu hlutverki í liði ÍH á síðasta tímabili og kom til okkar með mikinn metnað frá fyrstu æfingu. Sóley er mjög klókur varnarmaður, sterk í tæklingum og yfirveguð undir pressu. Hún er einnig mjög jákvæð persóna sem mun bæta bæði gæði og breidd í hópinn. Hún kom vel inn í fyrstu tvo leikina í Íslandsmótinu og sýndi að hún er tilbúin í þessa áskorun.“

Sóley sjálf hlakkar til áframhaldandi verkefna með Fjölni:„Ég er mjög ánægð að vera komin í Fjölni og hlakka mikið til fyrir komandi tímabil ásamt því að fá að vera partur af þessum eðalhóp af fólki sem er til staðar í félaginu.“

Við bjóðum Sóleyju velkomna í Fjölni og hlökkum til að sjá hana halda áfram að vaxa og dafna í gulu treyjunni á næstu árum.

Ainhoa Plaza Porcel semur við Fjölni

Knattspyrnudeild Fjölnis hefur samið við spænska sóknarleikmanninn Ainhoa Plaza Porcel út tímabilið. Ainhoa, sem er fædd árið 2001, kemur til félagsins með dýrmæta reynslu bæði frá Íslandi og Spáni.

Ainhoa lék með FHL tímabilið 2022 þar sem hún vakti athygli með góðri frammistöðu og skoraði 8 mörk í 18 leikjum. Hún kemur nú til Fjölnis frá spænska félaginu CE Europa sem leikur í næst efstu deild á Spáni.

Ainhoa lék sinn fyrsta leik fyrir Fjölni í gær þegar liðið vann glæsilegan 7:0 sigur gegn Augnabliki. Hún kom inn á völlinn á 60. mínútu og lét strax til sín taka með því að skora sitt fyrsta mark fyrir félagið ásamt því að leggja upp annað mark.

Það verður spennandi að fylgjast með Ainhoa í gulu treyjunni í sumar, en hún er kraftmikill sóknarleikmaður með góðan hraða og sterka tæknilega eiginleika.

Vesko, þjálfari Fjölnis, er mjög ánægður með komu Ainhoa til félagsins:
„Við erum mjög ánægð með að fá Ainhoa til liðs við okkur. Hún er öflugur leikmaður með góða tæknilega hæfileika og mikinn hraða. Hún er einnig mjög jákvæð manneskja sem mun hjálpa liðinu að bæta sig og gefa okkur fleiri möguleika inni á vellinum. Reynslan hennar af íslenskum fótbolta hjálpar henni að aðlagast hratt og gæði hennar sáust strax í leiknum í gær. Hún er leikmaður sem við þurftum á að halda og við erum mjög spennt að sjá meira frá henni í sumar.“

Ainhoa sjálf er spennt fyrir nýju áskoruninni í Grafarvogi:
„I’m very happy to be here and to help the team in any way I can. I’m very excited about the project. My first game was a competitive one where I felt very comfortable with my teammates.“

Við bjóðum Ainhoa hjartanlega velkomna í Fjölni og hlökkum til að fylgjast með henni á komandi tímabili.

Knattspyrnudeild Fjölnir hefur gengið frá samstarfssamningi við Reir Verk sem verður nýjasti samstarfsaðili deildarinnar út yfirstandandi tímabil. Þá mun merki Reir Verks prýða treyjur meistaraflokka karla og kvenna hjá félaginu út tímabilið.

Samstarfið er mikilvæg viðbót við þann öfluga hóp samstarfsaðila sem styður við starf knattspyrnudeildarinnar og áframhaldandi uppbyggingu hennar. Knattspyrnudeild Fjölnis leggur mikla áherslu á öflugt samstarf við fyrirtæki og einstaklinga sem vilja styðja við starf félagsins og samfélagið í Grafarvogi. Með samstarfinu við Reir Verk styrkist sá grunnur enn frekar.

Viðar Árnason, formaður knattspyrnudeildar Fjölnis, fagnar samstarfinu: „Það er frábært þegar Fjölnisfólk vill styðja við starf deildarinnar og þá góðu vinnu sem félagið vill standa fyrir. Stuðningur Reir Verks er staðfesting á því að Fjölnir heldur áfram að byggja upp öflugt starf bæði innan sem utan vallar.“

Páll Edwald, yfirlögfræðingur hjá Reir Verk og uppalinn Fjölnismaður, segist einnig ánægður með samstarfið: „Það er mikill heiður fyrir mig að geta stutt við uppeldisfélagið mitt fyrir hönd Reir Verks. Ég er spenntur að leggja mitt af mörkum í þeirri uppbyggingu sem er fram undan á næstu árum og hjálpa til við að koma Fjölni upp í Bestu deildina þar sem félagið á heima.“

Áfram Fjölnir!

Ólöf Kristjana Þorvaldsdóttir framlengir við Fjölni

Knattspyrnudeild Fjölnis hefur framlengt samning sinn við Ólöfu Kristjönu Þorvaldsdóttur til ársins 2027. Ólöf er uppalin hjá félaginu og hefur verið hluti af Fjölnisumhverfinu frá unga aldri.

Ólöf, sem er fædd árið 2007, er fjölhæfur leikmaður sem getur leyst allar kantstöður vallarins, bæði sem bakvörður og kantmaður. Hún lék sinn fyrsta leik fyrir meistaraflokk árið 2023 en varð fyrir því óláni að slíta krossband skömmu síðar og missti því af nær tveimur árum vegna meiðsla.

Ólöf sneri aftur á völlinn í ágúst á síðasta ári og hefur síðan þá sýnt flottar framfarir dag frá degi. Hún hefur lagt gríðarlega mikið á sig í endurhæfingu og æfingum og það sést vel í hennar leik.

Vesko, þjálfari meistaraflokks kvenna, er mjög ánægður með að hafa Ólöfu áfram hjá félaginu:

„Við erum mjög ánægð með að hafa tryggt Ólöfu áfram hjá félaginu. Hún þurfti að ganga í gegnum erfiðan tíma vegna meiðslanna sinna en nú vonum við að það sé allt að baki og hún geti notið þess að spila fótbolta af fullum krafti. Ólöf er hæfileikaríkur leikmaður sem getur bæði spilað sem vængbakvörður og kantmaður. Hún hefur sýnt mjög góðar framfarir á undirbúningstímabilinu og við erum ánægð að hafa hana áfram hjá okkur næstu tvö árin hið minnsta. Hún er klárlega leikmaður framtíðarinnar sem passar mjög vel inn í verkefnið okkar.“

Það er mikið gleðiefni að Ólöf haldi áfram í Fjölni og verður spennandi að fylgjast með henni á komandi árum.

Til hamingju Ólöf!

Svala Margrét fulltrúi Fjölnis valin í æfingahóp U15 landsliðs Íslands

Svala Margrét Jónsdóttir (2011) var valin í æfingahóp U15 landsliðs Íslands sem kom saman til æfinga dagana 21. og 22. apríl. Valið er frábær viðurkenning á þeirri vinnu og framförum sem hún hefur sýnt á undanförnum misserum.

Svala er afar efnilegur markvörður sem hefur verið áður verið valin í verkefni af þessu tagi. Hún hefur staðið sig vel og sýnt fram á mikinn metnað.

Við hjá Fjölni erum gríðarlega stolt af Svölu og hlökkum til að fylgjast áfram með hennar framþróun á komandi árum.

Vel gert Svala, við hjá Fjölni erum virkilega stolt!

Knattspyrnudeild Fjölnis sendi nýverið fyrirspurn á öll framboð sem bjóða fram í borgarstjórnarkosningunum sem fram fara um miðjan maí, þar sem óskað var eftir afstöðu þeirra til aðstöðumála deildarinnar.

Í erindinu kom fram að deildin standi frammi fyrir verulegum aðstöðuvanda sem hafi hamlandi áhrif á starfsemi, iðkendur og áframhaldandi uppbyggingu íþróttastarfs í Grafarvogi. Þá var bent á að mikil fjölgun íbúa á svæðinu á næstu árum, meðal annars í Keldnalandi og Gufunesi, muni auka enn frekar álag á núverandi aðstöðu.

Framboðin voru beðin um að svara fjórum spurningum:

• Hvort þau hefðu kynnt sér aðstöðumálin
• Hvernig þau hyggðust bæta aðstöðuna
• Hvaða tímarammi væri fyrirhugaður
• Hvort þau myndu setja málið í forgang á næsta kjörtímabili

Svör framboða bárust og eru birt hér að neðan óbreytt:

Fulltrúar Vinstrisins þekkja ágætlega til aðstöðumála Ungmennafélagsins Fjölnis í Grafarvogi, sem er mikilvæg stofnun í hverfinu, bæði út frá lýðheilsu og forvarnarsjónarmiðum, en ekki síður til að stuðla að hverfisanda og samstöðu. Vinstrið leggur mikla áherslu á að efla hverfafélög á borð við Fjölni.

Til skamms tíma lagði Fjölnir áherslu á uppbyggingu vallarsvæðis í Dalhúsum og studdi Reykjavíkurborg við uppbyggingu þar með ýmsum hætti. Í seinni tíð hefur áherslan færst yfir á Egilshallarsvæðið, þar sem félagið sér fyrir sér framtíðaraðsetur fótboltans og fleiri greina. Þessi stefnubreyting kallar á kostnaðarsamar framkvæmdir af hálfu borgarinnar sem væri ábyrgðarlaust að lofa með ákveðnum ártölum að svo komnu máli. Hugmyndir fasteignafélagsins Reita, sem jafnframt er eigandi Egilshallar, um uppbyggingu íþróttasvæða fyrir Fjölni í skiptum fyrir byggingarland eru allrar athygli verðar en eru alltof skammt á veg komnar til að einu eða neinu verði lofað á einn veg eða annan.

Hefur framboð ykkar kynnt sér aðstöðumál knattspyrnudeildar Fjölnis?

Samfylkingin er upplýst um aðstöðumál knattspyrnudeildar Fjölnis sem eru ófullnægjandi. Heiða Björg Borgarstjóri Samfylkingar skipaði einmitt starfshóp til að meta þarfir og tækifæri ti að mæta þörfum og efla starf þessa stækkandi félags. Mikil fjölgun iðkenda sem er jákvæð og borgin á að styðja við hana með uppbyggingu í takt við þarfir félagsins. Til skoðunar hefur verið aukin uppbygging við Egilshöll og úrbætur á aðstöðu þar fyrir fótboltann væru mjög góður kostur að okkar mati þannig að deildin væri sameinuð á einn stað. Það er hinsvegar knattspyrnudeildar Fjölnis sem hefur næsta leik og við bíðum þess að fá niðurstöðu starfshópsins sem samanstendur af fulltrúum Fjölnis, íþróttabandalags Reykjavíkur og Reykjavíkurborg. Frambjóðendur eiga líka bókaða heimsókn til Fjölnis núna í kosningabaráttunni.

Ef svo er, hvernig hyggist þið bæta aðstöðuna?

Verið er að kortleggja hverjar þarfir Ungmennafélagsins Fjölnis eru þegar kemur að aðstöðu knattspyrnudeildar félagsins, í Dalhúsum og í/við Egilshöll. Væntanleg er skýrsla um aðstöðumál knattspyrnudeildar Fjölnis sem mun leggja fram tillögur sem Fjölnir, Íþróttabandalag reykjavíkur og reykjavíkurborg telja bestu leiðina. Samfylkingin vil vinna þannig með grasrót á hverjum stað og styrkja aðstöðu til þess að efla deildina enn frekar, annars vegar til skamms tíma og hins vegar til frambúðar

Hvaða tímarammi fylgir þeim úrbótum sem þið sjáið fyrir ykkur?

Þegar niðurstaðan um hvað við ætlum að gera er klár þá getum við sett fram raunhæfa tímaáætlun en í samtölum okkar við Fjölni og eigendur Egilshallar þá ættum við að geta framkvæmt hratt.

Munið þið setja úrbætur á aðstöðu knattspyrnudeildar Fjölnis í forgang á næsta kjörtímabili?

Eitt af markmiðum Samfylkingarinnar er að börn og ungmenni geti stundað íþróttir óháð efnahag eða félagslegri stöðu. Það er gleðilegt að iðkendum er að fjölga hjá Fjölni og að sjálfsögðu viljum við styðja við að svo verði áfram. Framundan er mikil uppbygging i kringum félagið sem mun krefjast þess að við styrkjum aðstöðu og starfsemi þess. Knattspyrnudeildar sem og annarra deilda.

Hefur framboð ykkar kynnt sér aðstöðumál knattspyrnudeildar Fjölnis?

Já við höfum átt í góðum samskiptum við Fjölni og þekkjum til mála. Dalhúsavöllur er orðinn illa farinn og afar brýnt að bæta úr. Þar eru æfingavellir sem einnig eru nánast ónothæfir. Gervigrasvöllurinn við Egilshöll er einnig farinn að láta á sjá en hann er í eigu Heima. Þar þarf að hefja samtal við Fjölni um hvernig félagið vill horfa á uppbyggingu íþróttamannvirkja í Grafarvogi til framtíðar. Framsókn reiðubúin til þess strax í byrjun næsta kjörtímabils.

Hefur framboð ykkar kynnt sér aðstöðumál knattspyrnudeildar Fjölnis?

Já, það liggur fyrir að núverandi aðstaða knattspyrnudeildar félagsins er ófullnægjandi og mætir þörfum félagsins vegna aukins fjölda iðkenda illa.

Flokkur fólkins styður að Fjölnir eins og önnur íþróttafélög víðs vegar um borgina hafði góða aðstöðu sem þjónar þörfum hverfanna. Ljóst er að auka verður framlög til þessa málaflokks. Til þess að svo megi verða þarf að forgangsraða fjármunum borgarinnar eins og við höfum lagt til í þágu íbúanna í stað alls kyns gæluverkefna.

Hvaða tímarammi fylgir þeim úrbótum sem þið sjáið fyrir ykkur?
Það er öllum ljóst að ný íþróttamannvirki verða ekki skipulögð og byggð á nokkrum vikum eða mánuðum. Það er forgangsröðin sem skiptir öllu máli og henni þarf að breyta.

Munið þið setja úrbætur á aðstöðu knattspyrnudeildar Fjölnis í forgang á næsta kjörtímabili?

Já, úrbætur á aðstöðu Fjölnis og annarra íþróttafélaga verða í algjörum forgangi á næsta kjörtímabili. Starf íþróttafélagnanna er eitt af því mikilvægast í þágu þroska og heilbrigði barnanna í borginni.

Hefur framboð ykkar kynnt sér aðstöðumál knattspyrnudeildar Fjölnis?

Við höfum ekki náð að kynna okkur það náið en við þekkjum vel til félagsins enda er oddvitinn og nr. 3 á listanum búsettir í Grafarvognum. Við vitum hins vegar að aðstaða ykkar er líklega sú lakasta á höfuðborgarsvæðinu.

Ef svo er, hvernig hyggist þið bæta aðstöðuna?

Fyrsta skrefið er að koma í heimsókn til ykkar og fara yfir stöðuna með ykkur og finna leiðir til úrbóta. Í stefnuskrá okkar er m.a. sagt um íþróttir: Ástundun í þrótta er ein besta leiðin að stunda heilbrigt líferni. Oft er íþróttafélag í hverfinu stærsti þátturinn í að sameina hverfið. Félagslegi þátturinn er mjög mikilvægur, sérstaklega hjá unga fólkinu. Við leggjum því mikið upp úr öflugu íþróttastarfi og viljum leggja okkar á vogarskálarnar til efla það.

Hvaða tímarammi fylgir þeim úrbótum sem þið sjáið fyrir ykkur?

Það fer dálítið eftir umfanginu en ljóst er að úrbóta er þörf fljótt.

Munið þið setja úrbætur á aðstöðu knattspyrnudeildar Fjölnis í forgang á næsta kjörtímabili?

Þeir sem eru í framboði fyrir Góðan daginn eru upp til hópa fólk sem stundað hefur íþróttir og þekkir það vel að aðstaðan skiptir máli. Því eigum við mjög auðvelt að setja okkur í ykkar spor og leggja okkar á vogarskálarnar þannig að þið fáið úrbætur á aðstöðunni.

Hefur framboð ykkar kynnt sér aðstöðumál knattspyrnudeildar Fjölnis?

Við erum nýtt framboð og höfum ekki kynnt okkur málið sérstaklega. Hins vegar er ljóst að uppbygging í hverfum kallar á að innviðir séu metnir heildstætt.

Hvernig hyggist þið bæta aðstöðuna?

Við teljum mikilvægt að taka slíkar ákvarðanir á grundvelli heildarmats þar sem þörf, forgangsröðun og fjárhagslegt svigrúm eru skoðuð saman. Íþróttaaðstaða er hluti af þeirri heild.

Hvaða tímarammi fylgir þeim úrbótum?

Tímasetningar ráðast af niðurstöðu slíkrar greiningar og fjárhagsstöðu borgarinnar.

Munið þið setja úrbætur á aðstöðu knattspyrnudeildar Fjölnis í forgang?

Á meðan við höfum ekki fulla yfirsýn yfir fjárhagsstöðu Reykjavíkurborgar teljum við óábyrgt að gefa loforð um einstök verkefni. Við leggjum hins vegar áherslu á ábyrga forgangsröðun þar sem þarfir barna og ungmenna verða metnar í samhengi við aðra grunninnviði.

Sjálfstæðisflokkurinn leggur áherslu á öflugt íþróttastarf í Reykjavík og að öllum börnum verði tryggð jöfn tækifæri til íþrótta- og tómstundaiðkunar í borginni. Brýnt er að forgangsraða fjárveitingum til íþrótta – og æskulýðsmála til að styðja við lykilhlutverk íþrótta og tómstunda í uppeldi, forvörnum, lýðheilsu og félagsþroska barna og ungmenna.

Það er ljóst að framtíðaruppbygging í Grafarvogi, meðal annars í Keldnalandi og Gufunesi, mun auka álag á núverandi innviði. Við teljum að slík uppbygging verði að ganga hönd í hönd við uppbyggingu þjónustu og aðstöðu, þar á meðal íþróttamannvirkja.

Hefur framboð ykkar kynnt sér aðstöðumál knattspyrnudeildar Fjölnis?
Já. Við höfum átt tvo mjög upplýsandi og góða fundi með fulltrúum Fjölnis þar sem farið var yfir stöðuna, áskoranir og framtíðarþarfir félagsins. Sú vinna hefur gefið okkur skýra mynd af þeim aðstöðuvanda sem deildin stendur frammi fyrir.

Ef svo er, hvernig hyggist þið bæta aðstöðuna?
Á fyrstu 100 dögunum eftir að við tökum við stjórn borgarinnar ætlum við að fara í heildstæða kortlagningu á aðstöðumálum íþróttafélaga og fjárframlögum til þeirra. Markmiðið er að forgangsraða verkefnum á faglega og tryggja jafnræði milli félaga.

Hvaða tímarammi fylgir þeim úrbótum sem þið sjáið fyrir ykkur?
Án heildstæðrar kortlagningar á stöðunni teljum við ekki rétt að setja fram nákvæman tímaramma, það væri einfaldlega ekki trúverðugt. Við höfum hins vegar sett fram skýrar og tímasettar aðgerðir í aðstöðumálum íþróttafélaga:

• Innan 100 daga: Heildstæð kortlagning á aðstöðu og fjárframlögum, sem leggur grunn að forgangsröðun.
• Innan 12 mánaða: Tímasett aðgerðaáætlun um úrbætur, byggð á þörf og stöðu hvers félags.
• Á kjörtímabilinu: Markviss uppbygging í áföngum, þar sem brýnustu verkefnin fara fremst í forgangsröðunina.

Markmiðið er að fara hratt af stað en gera það rétt. Það er eina leiðin til að tryggja að úrbætur verði bæði markvissar og vel unnar.

Munið þið setja úrbætur á aðstöðu knattspyrnudeildar Fjölnis í forgang á næsta kjörtímabili?
Við ætlum setja íþrótta- og æskulýðsmál í borginni í forgang, það er alveg skýrt. Forgangsröðun viðhalds- og uppbyggingarverkefna liggur ekki fyrir en við skiljum vanda félagsins og munum hafa vinnu starfshópsins sem nú er að kortleggja aðstöðumál Fjölnis til hliðsjónar í þeirri forgangsröðun.

Við leggjum áherslu á áframhaldandi samtal og samstarf við ykkur um þessi mikilvægu mál.

Takk fyrir að hafa samband. Við kunnum vel að meta það starf sem þið vinnið og mikilvægi þess fyrir hverfið. Okkur finnst líka mikilvægt að eiga gott samtal við ykkur um það sem betur má fara og hvernig borgin getur stutt betur við starfið og viljum gjarnan eiga það samtal eftir kosningar. Afstaða okkar er sú að Reykjavík þarf að ná betri tökum á rekstrinum svo hægt sé að standa við það sem hefur verið lofað. Það gengur ekki til lengdar að gera áætlanir eða samninga sem síðan reynist erfitt að fylgja eftir. Við viljum breyta því og setja meiri festu í fjármálin. Við teljum að það þurfi að færa meiri fjármuni út í hverfin. Þar eru íþróttamannvirki og íþróttastarf barna mjög ofarlega hjá okkur. Við viljum sjá minna fara í yfirbyggingu og meira í það sem skiptir fólk máli í daglegu lífi, s.s. minna ráðhús og meiri hverfi.

Sósíalistaflokkurinn hefur ekki sett sér sérstaka stefnu né aðgerðaplan í aðstöðu Fjölnis sérstaklega. Við myndum gjarnan vilja vita meira um ykkar kringumstæður. Við höfum einblínt á að tryggja jafnt aðgengi barna af mismunandi bakgrunni, hvort sem er efnahagslegum eða þjóðernis, að íþróttum og tómstund enda þátttaka í frístundastarfi af þeirri gerð gríðarlega mikilvæg fyrir andlega, líkamlega og samfélagslega heilsu. Að því sögðu þá þarf svo sannarlega að huga að innviðum hverfanna með aukinni þéttingu og áformum um heil ný hverfi eins og þið nefnið réttilega á Keldum og í Gufunesi. Við Sósíalistar teljum lykilinn að því að byggja þá innviði sem þörf er á að borgin geri það beint og sjálf, að við förum betur með skattfé borgarbúa með því að hætta útvistun og þannig búum við til aukið svigrúm fyrir ýmis konar stuðning við félags- og íþróttastarf. Við erum jafnframt mjög meðvituð um oft þröngan stakk sveitarfélaga og þess vegna viljum við þrýsta á Alþingi að leggja útsvar á fjármagnstekjur, en slík breyting myndi skila mörgum milljörðum til borgarinnar á hverju ári og búa til miklu traustari grundvöll til framtíðar hvað varðar stuðning og fjármögnun ýmissa verkefna. Þá er einnig mikilvægt að það komi fram að Sósíalistar leggja mikið upp úr því að fá álit og þátttöku íbúa á verkefnin sem varða þau beint, en þá ekki síður íþróttafélaga eins og í þessu tilviki. Móta þarf stefnu og áform með ykkar aðkomu, því þið vitið best hver staðan er í ykkar hverfi og starfi.

Hefur framboð ykkar kynnt sér aðstöðumál knattspyrnudeildar Fjölnis?

Já Miðflokkurinn hefur kynnt sér aðstöðumál Fjölnis og annara íþróttafélaga í Reykjavík.  Það er augljóst að Reykjavíkurborg hefur sýnt íþróttafélögunum í Reykjavík óvild og beitt valdahroka í samskiptum við þau.  Það er algjörlega óviðunandi.  Það þarf að tryggja samtal borgarinnar, skóla og frístundaheimila og tengja þau við íþróttafélögin, en það samtal er ekkert í dag.  Í tengslum við Fjölni þá er núverandi ástand á aðstöðu félagsins, sérstaklega í knattspyrnunni, ekki gott.  Það þarf að endurskipuleggja framtíðar félags- og æfingaaðstöðu fótboltans hjá Fjölni og tryggja að Fjölnir byggi upp sína starfsemi til framtíðar í sátt við félagið og Reykjavíkurborg.  Við í Miðflokknum erum tilbúin í það samtal.

Ef svo er, hvernig hyggist þið bæta aðstöðuna?

Endurskipulag á framtíðar félagssvæði félagsins í samstafi við Fjölni.  Það þarf að tryggja að Fjölnir njóti sambærilegrar aðstöðu og önnur félög í borginni.

Hvaða tímarammi fylgir þeim úrbótum sem þið sjáið fyrir ykkur?

Það verður farið strax í þetta samtal eftir kosningar, ef Miðflokkurinn kemst í meirihluta.  Markmiðið er að  ná utan um þær innviðaskuldir sem Reykjavíkurborg hefur vanefnt.  Núverandi innviðaskuld við íþróttafélögin (í samningum sem nú þegar hefur samið við íþróttafélögin um) er sennilega yfir 20 milljarðar, fyrir utan viðhaldsskuld eldri mannvirkja og loforð um þjóðarleikvanga.

Munið þið setja úrbætur á aðstöðu knattspyrnudeildar Fjölnis í forgang á næsta kjörtímabili? 

Já. Miðflokkurinn hefur sett það í forgang að standa við gerða samninga  við félögin og taka upp samtal við íþróttafélögin um framtíðar uppbyggingu á félagssvæðum þeirra.

Hefur framboð ykkar kynnt sér aðstöðumál knattspyrnudeildar Fjölnis?
Píratar hafa kynnt sér aðstöðumál knattspyrnudeildar Fjölnis.
Ef svo er, hvernig hyggist þið bæta aðstöðuna?
Píratar hafa á síðasta kjörtímabili lagt áherslu á endurbætur á íþróttamannvirkjum í Reykjavík, þar á meðal hjá Fjölni. Við teljum mikilvægt að ungmenni hafi fleiri og betri tækifæri til að verja frítíma sínum á öruggum stöðum og þar á meðal við íþróttaiðkun.
Við leggjum áherslu á að úrbætur verði unnar í nánu samráði við iðkendur, félagið sjálft og íbúa hverfisins. Hverfislyftan er ný útfærsla á hverfislýðræði þar sem leiðin milli íbúa og Reykjavíkurborgar styttist. Píratar munu horfa til þeirra áherslna sem hafa verið settar fram í samstarfi milli borgarinnar og Fjölnis hingað til, meðal annars með yfirlýsingu borgarstjórnar í nóvember 2020 og halda áfram samtali um næstu skref.
Hvaða tímarammi fylgir þeim úrbótum sem þið sjáið fyrir ykkur?
Píratar myndu vilja hefja vinnuna snemma á kjörtímabilinu. Nánari tímasetning og forgangsröðun myndi ráðast í samráði við hverfið, íbúa og viðkomandi félög.
Munið þið setja úrbætur á aðstöðu knattspyrnudeildar Fjölnis í forgang á næsta kjörtímabili?
Fyrir liggur fyrir að knattspyrnuaðstaða Fjlönis var sett í forgang með tillögu borgarstjóra í nóvember 2020, þar sem meðal annars var talið mikilvægt að rýna aðstöðu við Dalshús og Egilshöll. Píratar vilja afla frekari upplýsinga um stöðu mála og vinna áfram að því að úrbætur verði settar í forgang í góðu samráði við félagið og hverfið, með það að leiðarljósi að styrkja
íþróttastarf og aðstöðu.

Elma Karen var fulltrúi Fjölnis í lokahópi hæfileikamótunar KSÍ stúlkna

Elma Karen Ingimundardóttir (2012) tók þátt í lokahópi hæfileikamótunar Knattspyrnusambands Íslands og N1 sem fram fór dagana 16. til 18. mars. Valið er frábær viðurkenning á þeirri vinnu, hæfileikum og framförum sem hún hefur sýnt að undanförnu.

Elma er afar efnilegur miðjumaður sem stóð sig með prýði á æfingunum og var félaginu til mikils sóma. Hæfileikamótun KSÍ og N1 er mikilvægt þróunarverkefni þar sem efnilegir leikmenn víðs vegar af landinu koma saman til æfinga og undirbúnings fyrir framtíðina í landsliðsumhverfi.

Við hjá Fjölni erum gríðarlega stolt af Elmu og hlökkum til að fylgjast áfram með hennar framþróun á komandi árum.

Vel gert Elma, við hjá Fjölni erum gríðarlega stolt!