Námskeið í boði fyrir unglinga og fullorðna

Nú er starfið að fara af stað aftur á vorönn og má hér fyrir neðan sjá úrval námskeiða og æfinga sem eru í boði fyrir unglinga og fullorðna.

Námskeiðin henta vel fyrir byrjendur í greininni sem og þá sem hafa einhverja reynslu eða jafnvel lengra komna. Við bjóðum alla áhugasama velkomna til okkar í starfið.

Skráning á öll námskeið fer fram á fjolnir.felog.is

Hægt er að nýta frístundastyrk fyrir unglinga upp að 18 ára aldri fyrir æfingagjöldum. Einnig bendum við á að þeir sem greiða í stéttarfélög geta sótt um íþróttastyrk hjá sínu stéttarfélagi.

Fullorðinsfimleikar

Boðið er upp á fimleikanámskeið fyrir 18 ára og eldri. Lögð áhersla á góðar þrek- og teygjuæfingar og svo þær fimleikaæfingar sem henta getu hvers og eins. Reynsla af fimleikum er ekki skilyrði fyrir þátttöku heldur reynum við að koma til móts við þarfir hvers og eins. Fimleikar eru frábær alhliða hreyfing og henta vel fyrir þá sem vilja styrkja sig og liðka og hafa gaman af í leiðinni.

Æfingar eru tvisvar í viku og er notast við 10 skipta klippikort sem má nota þegar hentar. 10 skipta klippikort kostar 17.000 kr.

Mánudagur 19:30-21:00
Miðvikudagur 19:30-21:00

Frjálsíþróttaæfingar fyrir unglinga

Boðið er upp frjálsíþróttaæfingar fyrir unglinga þar sem hægt er að velja um að æfa 1-2x í viku eða oftar. Æfingar fara fram í Laugardalshöll og Fjölnishellinum í Egilshöll. Æfingatöfluna má finna á heimasíðu Fjölnis undir Frjálsíþróttadeild.

Verðskrá má finna hér

Frjálsíþróttaæfingar fyrir fullorðna – Gullmolar

Gullmolar er hópur fyrir 25 ára og eldri sem æfa frjálsar undir stjórn Óskars Hlynssonar, yfirþjálfara deildarinnar. Æfingar eru á þriðjudögum og fimmtudögum kl 18:30-20:00 og á laugardögum kl 10-12. Allar æfingar eru í Laugardalshöll á veturna. Vorönn Gullmola kostar 20.000

 

Hlaupahópur

Hlaupahópurinn er fyrir 16 ára og eldri og tekur vel á móti nýjum skokkurum í hópinn. Skokkað er fjórum sinnum í viku.

Mánudagar og Miðvikudagar kl. 17:30-19:00 / Egilshöll – lagt af stað frá austurenda (Fjölnishellinum)

Fimmtudagar kl. 17:15-19:00 Laugardalshöll (á veturna)

Laugardagar kl. 09:30 Gullinbrú (tækin)

Vorönn í hlaupahópnum kostar 10.000 kr og er árgjaldið 25.000.

Handboltastarf unglinga

Í boði eru handboltaæfingar fyrir unglinga á öllum aldri, eða til 18 ára aldurs. Hver flokkur æfir í sínum hópum og tekið er þátt á mótum. Æfingarnar henta bæði fyrir byrjendur og þá sem hafa reynslu í greininni. Nánari upplýsingar um æfingar og æfingagjöld má finna á heimasíðunni undir Handbolti.

Hokkískóli Fullorðinna

Hokkískóli Fullorðna er fyrir alla sem langar að byrja að æfa íshokkí á aldrinum 18 ára og eldri. Engin krafa er gerð um að kunna að skauta og er hægt að fá allan búnað lánaðan hjá félaginu. Mælum með að iðkendur mæti ca. 20 mínútum fyrir æfingu til að finna búnað og klæða sig. Gott er að vera í íþróttafötum undir íshokkígallanum.

Æfingar eru 2x í viku, miðvikudaga kl. 21:55 – 22:55 og sunnudaga kl. 19:55 – 20:50.

Karate fyrir unglinga

Byrjendanámskeið í karate fyrir unglinga upp að 16 ára aldri (10. bekkur) þar sem kennd eru undirstöðuatriði í karate.

Æfingar eru tvisvar í viku, á mánudögum og miðvikudögum kl. 17:45-18:30.

Knattspyrnustarf fyrir unglinga

Í boði eru fótboltaæfingar fyrir unglinga á öllum aldri, eða til 19 ára aldurs. Hver flokkur æfir í sínum hópum og tekið er þátt á Reykjavíkurmóti og Íslandsmóti. Æfingarnar henta bæði fyrir byrjendur og þá sem hafa reynslu í greininni. Nánari upplýsingar um æfingar og æfingagjöld má finna á heimasíðunni undir Knattspyrna.

Körfubolti fyrir unglinga

Í boði eru körfuboltaæfingar fyrir unglinga á öllum aldri, eða til 19 ára aldurs. Hver flokkur æfir í sínum hópum og tekið er þátt á mótum.Æfingarnar henta bæði fyrir byrjendur og þá sem hafa reynslu í greininni. Nánari upplýsingar um æfingar og æfingagjöld má finna á heimasíðunni undir Körfubolti.

Oldboys í körfubolta

Oldboys er hópur fullorðinna sem kemur saman til körfuboltaæfinga tvisvar í viku. Æfingar eru á mánudögum kl. 21:00-22:30 í Rimaskóla og kl. 20:30-22:00 í Fjölnishöll. Nánari upplýsingar um Oldboys hópinn má finna hér.

Listskautaæfingar fyrir unglinga og fullorðna

Æfingar fyrir unglinga og fullorðna henta fyrir byrjendur og þá sem hafa grunnfærni í íþróttinni. Hópnum er skipt upp í tvennt á æfingum. Kennd eru undirstöðuatriði og einfaldar æfingar, snúningar og hopp. Æfingar eru tvisvar í viku, í boði er að kaupa klippikort fyrir þá sem vilja ekki æfa báða daga. Æfingar eru á miðvikudagskvöldum og laugardögum. Nánari upplýsingar um æfingatíma og verð má sjá undir Listskautar á heimasíðunni.

Sundæfingar fyrir fullorðna

Garpar eru fullorðins æfingar 1-2 x í viku þar sem árhersla er lögð á allar tegundir sunds. Æft er í Grafarvogslaug á Mánudögum og miðvikudögum kl. 19:30-20:30 og kostar vornámskeiðið 25.000 kr.

Skákæfingar unglinga

Skákæfingar fyrir unglinga upp að 16 ára aldri (10. bekkur). Æfingarnar eru ætlaðar krökkum sem nú þegar hafa náð tökum á byrjunaratriðum skáklistarinnar. Æfingarnar fara fram í tómstundasal Rimaskóla og  það er gengið inn um íþróttahús.

Æfingar eru á fimmtudögum kl. 16:30-18:00. Ekkert kostar að æfa skák hjá Fjölni.

Tennisæfingar fyrir unglinga og fullorðna

Tennisdeild Fjölnis býður upp á tennisæfingar fyrir byrjendur á fimmtudögum kl. 17:30 í Tennishöllinni í Kópavoginum. Hægt er að fá búnað lánaðan á staðnum. Áhugasömum er bent á að hafa samband við Carolu yfirþjálfara.

Þríþraut

Nýjasta deild félagsins er þríþrautardeild. Í félagsaðild felst keppnisréttur undir merkjum Fjölnis og almenn félagsaðild. Ekki er gerð krafa um að æfa með félaginu. Í boði eru sundæfingar með Garpahóp sunddeildar Fjölnis og hlaupahópi Fjölnis. Nánar um þríþrautardeildina má lesa hér.

Korpúlfar – leikfimi eldri borgara

Korpúlfar bjóða upp á leikfimi alla þriðjudaga og fimmtudaga kl. 11 í fimleikasal Fjölnis í Egilshöll. Eftir leikfimina er boðið upp á kaffi í félagsaðstöðu Fjölnis. Um leikfimina sér Margrét Eiríksdóttir. Leikfimin er öllum að kostnaðarlausu, en nauðsynlegt er að skrá sig hjá Korpúlfunum með því að senda póst til Birnu umsjónarkonu.


Aðalfundir deilda

Aðalfundir deilda fara fram í febrúar. Við hvetjum alla áhugasama til að taka þátt og gefa kost á sér og taka þátt í að byggja upp frábæra starfið okkar.

Tillaga að formanni þarf að berast til gummi@fjolnir.is 5 dögum fyrir aðalfund.

Dagskrá aðalfundar deilda skal vera:

a)      Skýrsla stjórnar

b)      Reikningar deildar

d)      Kjör formanns

e)      Kjör stjórnarmanna

g)      Önnur mál

17. grein

Stjórn hverrar deildar skal skipuð minnst fimm mönnum, formanni sem kosinn er á aðalfundi viðkomandi deildar og fjórum meðstjórnendum, ásamt tveimur til vara einnig kjörnum á aðalfundinum.

Lög Fjölnis má finna hér

Tímasetning funda er eftirfarandi:

·         Knattspyrna: 2. febrúar kl. 18:00-19:15

·         Fimleikar: 7. febrúar kl. 18:00-19:00

·         Sund: 8. febrúar kl. 20:00-21:00

·         Listskautar: 9. febrúar kl. 18:00-19:00

·         Íshokkí: 10. febrúar kl. 18:00-19:00

·         Karate: 16. febrúar kl. 20:00-21:00

·

·         Tennis:

·         Körfubolti:

·         Skák:

·         Frjálsar:

·         Handbolti:

 

Hefur þú áhuga á stjórnarstörfum?

Verkefni stjórna geta verið mismunandi milli deilda og eftir eðli starfsemi deildarinnar.

Helstu verkefni stjórna eru:

  • Miðla upplýsingum og fyrirspurnum á réttan veg milli skrifstofu, þjálfara, foreldra
  • Passa að öll skipulagsvinna sé unnin tímanlega og upplýsingum skilað inn til skrifstofu á réttum tíma, sbr. æfingagjöld, sumarnámskeið, sérstök námskeið, fréttir sem deildin vill vekja athygli á.
  • Þátttaka í fjáröflunum deildarinnar og félagsins
  • Uppsetning æfingagjalda
  • Ráðningar þjálfara, í samvinnu við framkvæmdastjóra félagsins
  • Sækja um styrki fyrir deildina
  • Virkja foreldra og sjálfboðaliða í félagsstarfið
  • Veita aðhald og ábyrgð á rekstri deildarinnar
  • Þáttaka í mótun uppeldis- og afreksstefna í samvinnu við þjálfara og starfsfólk deildarinnar
  • Skipuleggja og sjá um að manna sjálfboðaliða á mót og viðburði á vegum deildarinnar.

FormaðurFormaður er verkstjóri deildarinnar. Hann sér um samskipti við aðalstjórn og skrifstofu Fjölnis sem lúta að rekstri og umhverfi deildarinnar. Hann er oft aðaltengiliður deildarinnar við sérsambönd.

GjaldkeriGjaldkerar hafa sýniaðgang á reikninga deildarinnar og bera ábyrgð á að gera fjárhagsáætlanir og fylgja þeim eftir. Gjaldkerar halda utan um fjárhag deilda og senda inn beiðnir til skrifstofu um launagreiðslur og aðrar greiðslur.

Ritari

Ritarar sjá um að halda utan um skjöl deildarinnar sem og rita fundargerðir á stjórnarfundum.

MeðstjórnendurMeðstjórnendur taka að sér tilfallandi verkefni sem formaður heldur utan um. T.d. aðstoð og skipulag við mótahald eða aðra viðburði.

 

Skrifstofa Fjölnis sér um:

  • Sækja um og fá úthlutuðum æfingatímum í íþróttahúsum
  • Allar fjárreiður
  • Allt sem tengist æfingagjöldum og uppsetningar í Nóra
  • Uppfæra æfingatíma á fjolnir.is skv. upplýsingum þjálfara
  • Skráningar og aðstoð við skráningar
  • Að svara fyrirspurnum varðandi starfið
  • Yfirferð og afstemming á bókhaldi
  • Búningasamninga
  • Samskipti í erfiðum málum


Vilt þú vera meðlimur í Ungmennaráði UMFÍ?

UMFÍ óskar eftir tilnefningum frá sambandsaðilum í Ungmennaráð sambandsins fyrir árin 2022 – 2023.

 

Ungmennaráð UMFÍ er skipað níu ungmennum á aldrinum 16 – 25 ára. Við skipun í ráðið er horft til þess að þau sem í því sitja séu á öllum aldri, af öllum kynjum og endurspegli landsmenn. Helstu hlutverk Ungmennaráðs UMFÍ er að vera stjórn UMFÍ til ráðgjafar um málefni ungs fólks og skipuleggja og standa fyrir viðburðum fyrir ungt fólk. Fundir ráðsins eru að öllu jafna haldnir á 4 – 6 vikna fresti ýmist með fjarfundarbúnaði og/eða sem staðfundir.

 

Ungmennaráðstefnan Ungt fólk og lýðræði er stærsti viðburður ungmennaráðs UMFÍ. Markmið og tilgangur ráðstefnunnar er að efla lýðræðislega þátttöku ungs fólks í leik og starfi. Ráðstefnan hefur verið haldin árlega frá árinu 2009 og hefur hún fest sig í sessi sem einn af mikilvægustu viðburðum félagasamtaka fyrir ungt fólk á Íslandi enda fá ungmenni þar tækifæri til að koma saman og ræða heitustu mál dagsins bæði við jafningja og ráðamenn.

 

Þátttaka í ungmennaráði UMFÍ veitir einstaklingum tækifæri til þess að kynnast starfi UMFÍ og ungmennafélags-hreyfingarinnar. Þátttakendur kynnast ungmennum alls staðar af landinu, fá tækifæri til þess að vinna að viðburðum allt frá hugmyndastigi til framkvæmdar og hafa áhrif á aðra í sínu nærumhverfi.

 

UMFÍ leitar ungmenna sem hafa tekið virkan þátt í starfi íþróttahéraðs eða innan félags og/eða hafa áhuga á að láta gott af sér leiða og smita gleði út frá sér.

 

Umsóknarfrestur er til 19. janúar. Smellið hér til þess að sækja um.

 

Ungmennafélagið Fjölnir hvetur alla áhugasama félagsmenn til að sækja um í ungmennaráðinu. Starf ungmennaráðsins er fjölbreytt og skemmtilegt og veitir góða reynslu fyrir framtíðarverkefni.


Hefur þú áhuga á þríþraut?

Þríþrautardeild Fjölnis er nýjasta viðbót félagsins 🏊‍♀️🚴‍♀️🏃
Hún er sú tólfta í röðinni.
Ólíkt öðrum deildum heyrir hún beint undir aðalstjórn félagsins sem fer með stjórn deildarinnar.
Æfingar í sundi og hlaupum eru í samstarfi við Garpahóp sunddeildar og hlaupahóp frjálsíþróttadeildar. Unnið er að því að geta boðið upp á hjólaæfingar.
Félagsaðild kostar 6.500 kr. fyrir árið.
Námskeiðskostnaður er ekki innifalinn í félagsaðild en í boði er að skrá sig í Garpahópinn og hlaupahópinn.
Skráning fer fram á fjolnir.felog.is.
Allar nánari upplýsingar er að finna á fjolnir.is/felagid-okkar/thrithraut/ og á netfangið skrifstofa@fjolnir.is.


Við sjáum um jólatréð!

Körfuknattleiksdeildin stendur að fjáröflun um helgina, 8. og 9. janúar þar sem iðkendur sækja jólatré heim að dyrum gegn 2.500 kr. gjaldi.

Fyllið út í skjalið viðeigandi upplýsingar, greiða þarf fyrir 7. janúar.

https://forms.gle/BnskedZTMahEjNWP8


Aukinn símatími í janúar

Ákveðið hefur verið að fjölga símatímum í janúar. Opið verður í símatíma mánudaga – fimmtudaga kl. 09:00-11:30.

Hægt er að ná í okkur í síma 578-2700.


Skráning á vorönn hefst 1. janúar

Skráning á vortímabil hefst þann 1. janúar á fjolnir.felog.is og verður þá hægt að ráðstafa frístundastyrk fyrir árið 2022.

Þeir sem eiga eftir að klára að ganga frá skráningu og gjöldum á haustmisseri eru hvattir til að ganga frá því sem fyrst. Seinasti dagur til að ráðstafa frístundastyrk fyrir árið 2021 er 31. desember.

Vinsamlegast hafið samband við skrifstofa@fjolnir.is til að fá aðstoð við skráningu eða til að fá svör við fyrirspurnum.

Símatími í janúar verður mánudaga – fimmtudaga kl. 09:00-11:30.


Jólavörur Fjölnis

Pöntunarblöð má finna hér

https://forms.office.com/r/1zVQ6rgin1

 

Pöntunarblað fyrir Fjölniskúluna má finna hér

https://forms.office.com/r/HW0Si4ZcbY


Uppskeruhátíð Fjölnis

Hin árlega Uppskeruhátíð Fjölnis fór fram þann 16. desember síðastliðinn þar sem afreksfólk deilda var heiðrað og jafnframt tilkynnt um val á Íþróttakonu- og karli ársins, sem og Fjölnismanni ársins. Athöfnin fór fram í Keiluhöllinni í Egilshöll og var einnig beint streymi fyrir þá sem heima sátu af Facebook síðu Fjölnis. Jón Karl, formaður félagsins setti athöfnina og fluttu systurnar og Fjölniskonurnar Auður og Hrafnhildur Árnadætur tónlistaratriði. Við þökkum Gunnari Jónatanssyni sérstaklega fyrir aðstoð sína við viðburðinn sem og ljósmyndurum Baldvini Erni Berndsen og Þorgils G.

Íþróttakona Fjölnis árið 2021 er Emma Sóldís Svan Hjördísardóttir
Íþróttakarl Fjölnis árið 2021 er Ólafur Ingi Styrmisson
Fjölnismaður ársins 2021 er Sarah Buckley

 

Við óskum afreksfólkinu okkar til hamingju með árangurinn og hlökkum til að fylgjast með þeim vaxa í nýjum verkefnum á komandi árum!

Í spilaranum hér fyrir ofan má sjá yfirferð ársins og viðtöl við íþróttafólkið okkar.

Fimleikadeild
Fimleikakona ársins: Lilja Katrín Gunnarsdóttir
Lilja Katrín er ung fimleikakona í Fjölni. Lilja er okkar fremsta áhaldafimleikakona sem var að hefja keppni í frjálsum æfingum. Í ár var hún valin í úrvalshóp unglinga hjá Fimleikasambandi Íslands. Lilja var einnig valin í æfingahóp fyrir Norðurlandamót unglinga. Á Íslandsmóti unglinga varð Lilja Íslandsmeistari í 1. þrepi stúlkna 13 ára og yngri. Lilja á framtíðina fyrir sér og má búast við miklu af henni í framtíðinni.
Fimleikakarl ársins: Sigurður Ari Stefánsson
Sigurður Ari hefur verið einn af efnilegustu fimleikamönnum landsins í sínum aldursflokki í árabil. Nú í ár var Sigurður Ari valinn í tvö landsliðsverkefni á vegum Fimleikasambands Ísland. Berlin Cup og Norðurlandamót unglinga. Sigurður stóð sig vel í báðum verkefnunum. Á Norðurlandamótinu varð hann í öðru sæti með liði Íslands auk þess að hreppa brons verðlaun á bæði gólfi og stökki. Á Íslandsmótinu í áhaldafimleikum hafnaði Sigurður í öðru sæti í fjölþraut í unglingaflokki. Sigurður Ari er vaxandi fimleikamaður sem á framtíðina fyrir sér í áhaldafimleikum karla.

Frjálsíþróttadeild
Frjálsíþróttakona ársins: Helga Þóra Sigurjónsdóttir
Helga Þóra Sigurjónsdóttir hefur náð mjög góðum árangri í hástökki á árinu. Hún er 21 árs gömul og hefur æft frjálsar íþróttir frá 9 ára aldri. Hún er nú með bestu hástökkvurum á landinu í kvennaflokki. Hennar besta afrek 2021 er stökk yfir 1,71m á Meistaramóti Íslands 15-22 ára utanhúss, en sá árangur skilaði henni Íslandsmeistaratitli í aldursflokknum 20-22 ára og er annar besti árangur konu utanhúss á árinu. Sá árangur gefur 936 IAAF stig sem er frábær árangur. Hún stóð sig líka vel á Meistaramóti Íslands og á Stórmóti ÍR þar sem hún stökk 1,70. Þess má geta að Helga Þóra er líka góð í hlaupi en hún var í boðhlaupssveit Fjölnis í 4×400 m boðhlaupi á Meistaramóti Íslands og vann Íslandsmeistaratitil með sigri sveitarinnar. Helga Þóra er aðstoðarþjálfari yngstu iðkenda deildarinnar og hefur þjálfað í nokkur ár.
Frjálsíþróttakarl ársins: Bjarni Anton Theódórsson
Bjarni Anton er 23 ára gamall og hefur æft frjálsar íþróttir í fjöldamörg ár. Hann hefur einbeitt sér að styttri hlaupum og keppir aðallega í 200 og 400 m hlaupum og náð mjög góðum árangri. Á þessu ári hljóp hann best 400m á tímanum 49,83 sek á Meistaramóti Íslands. Sá árangur gefur 928 IAAF stig sem er frábær árangur. Þessi árangur setur hann í annað sæti á listann yfir bestu afrek í 400m hlaupi innanhúss á þessu ári. Hann hljóp einnig á mjög góðum tímum á Stórmóti ÍR og á Reykjavík International Games. Bjarni Anton var í boðhlaupssveit Fjölnis á Meistaramóti Íslands í 4×400 m boðhlaupi og vann Íslandsmeistaratitil með sigri sveitarinnar. Hann var valinn í landslið Íslands á Evrópubikar landsliða og keppti þar í 400 m hlaupi og 4×400 m boðhlaupi. Bjarni Anton starfar sem þjálfari yngri iðkenda deildarinnar.

Handknattleiksdeild
Handboltakona ársins: Kolbrún Arna Garðarsdóttir
Kolbrún Arna Garðarsdóttir er frábær leikmaður og flott fyrirmynd. Hún er uppalin hjá HK en kemur til Fjölnis haustið 2019 og er einn reynslumesti leikmaðurinn okkar. Kolbrún getur spilað flestar stöður á vellinum þar á meðal miðju og horn og er góður leikstjórnandi. Kolbrún er líka öflugur skotmaður með mikið keppnisskap og er markahæsti leikmaður liðsins. Hún hefur gert margt til þess að hjálpa félaginu og þjálfar meðal annars yngri flokka við mjög góðan orðstýr.
Handboltakarl ársins: Elvar Otri Hjálmarsson
Elvar Otri er lykilmaður í meistaraflokki karla og á afstöðu tímabili var hann leikstjórnandi í liði sem hafði tekið miklum leikmannabreytingum frá tímabilinu á undan. Elvar hefur farið í gegnum alla yngri flokka félagsins og unnið allt sem hægt er að vinna þar. Hans stóra tækifæri í meistaraflokki kom í fyrra og með hverjum leiknum varð ljósara að þarna er á ferðinni framtíðarleikmaður með mikinn metnað og gæði. Elvar Otri spilaði alla leikina á tímabilinu eða 18 talsins og skoraði þar 86 mörk og var markahæsti leikmaður liðsins.

Íshokkídeild
Íshokkíkona ársins: Harpa Dögg Kjartansdóttir
Á stuttum tíma í félaginu hefur Harpa sett svip sinn á kvennahokkíið. Hún smitar út frá sér jákvæðni og vinnusemi og er alltaf tilbúin að gefa allt sem hún á inn á svellinu. Hún hefur náð miklum framförum frá því að hún kom til Fjölnis að spila íshokkí.
Íshokkíkarl ársins: Steindór Ingason
Steindór er metnaðarfullur leikmaður og hefur mikla ástríðu fyrir íshokkí í Fjölni. Hann gerir liðsfélaga sína betri og leiðir þá áfram jafnt innan sem utan svellsins. Hann er mikil fyrirmynd, sérstaklega þegar kemur að því að leggja hart að sér og gefast ekki upp. Hann bjó og lék íshokkí í Kanada í fjögur ár og hefur einnig spilað fyrir öll landslið Íslands. Hann á 33 leiki að baki með U18 og U20 og 12 leiki með A landsliði Íslands.

Karatedeild
Karatekona ársins: Eydís Magnea Friðriksdóttir
Sem afrekskona átti Eydís gott ár. Oftar en ekki kom hún heim með ekki einn, heldur tvo verðlaunapeninga eftir mót. Hún náði þannig Bronsverðlaunum bæði í flokkum fullorðinna og unglina í kata á Íslandsmeistaramótinu. Gulli á RIG, í flokkum fullorðinna sem og ungmenna á Reykjavík International Games. Gull bæði í opnum Kvennaflokki sem og flokki 16 til 17 ára stúlkna á 1. bikarmóti Karatesambands Íslands. Auk þessa fékk hún svo silfurverðlaun fyrir frammistöðu sína í kata á GrandPrix móti og á 2. Bikarmóti Karatesambandins. Eydís starfar sem aðstoðarþjálfari hjá karatedeildinni og er meðlimur í Afrekshópi hennar. Hún er jafnframt fastur meðlimur karatelandsliðsins og var valin til að taka þátt fyrir hönd Íslands á þeim mótum sem landsliðið hefur farið á erlendis þetta árið. Metnaður og Virðing eru þau gildi Fjölnis sem Eydís hefur lifað í starfi sínu innan deildarinnar.
Karatekarl ársins: Gabriel Sigurður Pálmason
Gabríel er einbeittur og duglegur iðkandi. Þrátt fyrir að tækifærin til að keppa hafi verið færri undanfarin 2 ár en við gjarnan vildum þá hefur hann einbeittur afreksmaður. Á árinu hefur hann nú þegar náð silfurverðlaunum bæði á Íslandsmeistaramótinu í kata sem og á GrandPrix móti, auk þess sem hann náði bronsi á Reykjavik International Games. Gabríel er fyrirmyndar íþróttamaður sem sannar að sjálfsagi og einbeiting skilar árangri. Metnaður og Heilbrigði eru þau Fjölnisgildi sem Gabríel hefur staðið fyrir í starfi sínu innan karatedeildarinnar.

Knattspyrnudeild
Knattspyrnukona ársins: Sara Montoro
Sara Montoro er 18 ára uppalin Fjölniskona sem er að hefja sitt fimmta tímabil í meistaraflokki. Þrátt fyrir ungan aldur er hún komin með tæplega 70 leiki í meistaraflokki og hvorki meira né minna en 43 mörk.
Á nýafstöðnu tímabili lék Sara 15 leiki og skoraði í þeim 15 mörk, þar sem SJÖ mörk(!) komu í einum og sama leiknum. Óhætt er að segja að Sara hafi verið ein lykilleikmanna síðustu ár og þá sérstaklega í sumar þegar liðið afrekaði að fara upp í 1.deild. Á árinu var Sara valin tvisvar sinnum í æfingahóp U19 ára landsliðsins sem er mikil viðurkenning fyrir bæði Söru og kvennaknattspyrnuna í Fjölni. Áður hefur hún leikið þrjá leiki fyrir Íslands hönd með U16 ára landsliðinu og skorað í þeim 1 mark. Sara Montoro er frábær leikmaður og mikil Fjölniskona sem spennandi verður að fylgjast áfram með í framtíðinni. Hún er vel að þessari tilnefningu komin.
Knattspyrnukarl ársins: Jóhann Árni Gunnarsson
Jóhann Árni Gunnarsson er tvítugur fjölhæfur leikmaður sem spilar aðallega á miðjum vellinum og kemur úr hinum firnasterka 2001 árgangi Fjölnis. Í gegnum tíðina hefur Jóhann leikið tæplega 20 landsleiki með yngri landsliðum Íslands. Jóhann Árni spilaði samtals 23 leiki fyrir Fjölni í deild og bikar á síðasta leiktímabili og var algjör lykilmaður í liðinu. Frábær frammistaða Jóhanns á vellinum skilaði honum nafnbótinni „efnilegasti leikmaður Lengjudeildar 2021“ sem valið var af hinum virta fjölmiðli Fotbolti.net. Eitt helsta afrek Jóhanns á tímabilinu kom í 17. umferð mótsins eða þann 20. ágúst í Ólafsvík þegar leikmaðurinn skoraði hvorki meira né minna en FIMM mörk – hvert öðru fallegra – í öruggum 7-0 sigri gegn Víkingi Ólafsvík. Jóhann Árni er flottur karakter, mikill Fjölnismaður og er vel að þessari tilnefningu kominn.

Körfuknattleiksdeild
Körfuboltakona ársins: Emma Sóldís Svan Hjördísardóttir
Emma Sóldís er lykilleikmaður í meistaraflokki kvenna en Fjölnisstúlkur hafa sýnt í vetur að þær eru til alls líklegar í Subway deildinni en Emma hefur spilað stórt hlutverk í árangri liðsins, bæði í vörn og sókn. Þrátt fyrir ungan aldur hefur Emma náð miklum árangri í körfubolta. Hún hefur leikið stórt hlutverk með yngri landsliðum Íslands hingað til. Á Norðurlandamótinu í sumar var hún byrjunarliðsmaður í U18 ára liði Íslands þrátt fyrir að hafa verið á yngra ári. Þar var hún stigahæst íslensku leikmannanna og næst stigahæst á mótinu. Emma Sóldís var í fyrsta sinn núna í haust valin í A-landslið Íslands, aðeins 17 ára gömul. Emma lék sinn fyrsta A-landsleik í nóvember þar sem hún skoraði sín fyrstu stig fyrir landslið Íslands. Emma hefur ávallt verið meðal fremstu leikmanna í sínum árangi enda setur hún frábært fordæmi með eigin dugnaði bæði á æfingum sem og í leikjum. Hún lætur aldrei neitt eftir sig liggja. Emma Sóldís er samviskusöm og virkilega dugleg að æfa og vinna í sínum leik. Emma er virkilega góður karakter með góða nærveru sem t.d. endurspeglaðist í þjálfun hennar á sumarnámskeiðum Fjölnis þar sem hún náði mjög vel til krakkanna. Klárt er að það verður spennandi að fylgjast með henni í framtíðinni.
Körfuboltakarl ársins: Ólafur Ingi Styrmisson
Ólafur Ingi hefur verið burðarás upp alla yngri flokka hjá Fjölni síðustu ár og hefur í vetur sýnt að hann er einn af bestu leikmönnum 1. deildar karla. Ólafur, sem er fyrirliði meistaraflokks karla, er mikill leiðtogi, innan vallar sem utan og setur hag liðsins ávallt í fyrsta sæti. Hann hefur verið framúrskarandi með yngri landsliðum Íslands síðustu ár auk þess að vera á meðal fremstu leikmanna í sínum árgangi. Hann stefnir hátt í körfubolta. Ólafur hefur tvívegis orðið Íslandsmeistari með liðum sínum í Fjölni og í bæði skiptin verið valinn mikilvægasti leikmaður úrslitakeppninnar, síðast núna í vor þegar drengjaflokkur varð Íslandsmeistari. Meistaraflokkslið Fjölnis hefur sýnt undanfarið að það á góða möguleika á að ná inn í úrslitakeppni í vor og valda usla þar, þó ungir séu, jafnvel komast upp í Subway deildina ef heppni og elja blandast vel saman á réttum tíma. Ljóst er að Ólafur mun leika lykilhlutverk í þeirri vegferð og verður spennandi að fylgjast með honum og liðinu næstu mánuði. Ólafur er framúrskarandi íþróttamaður og mikil fyrirmynd.

Listskautadeild
Skautakona ársins: Júlía Sylvía Gunnarsdóttir
Júlía Sylvía hefur sýnt og sannað á árinu hversu öflug skautakona hún er. Í upphafi árs tók hún þátt á Reykjavíkurleikunum, en samhliða mótinu fór fram Íslandsmeistaramót og hafnaði hún í öðru sæti á mótinu með 102.65 stig. Júlía hefur keppt á mótum Skautasambandsins á árinu, nú seinast á Íslandsmeistaramóti í nóvember þar sem hún endaði í öðru sæti. Hún var einnig valin sem fulltrúi Íslands á Junior Grand Prix, heimsmótaröð unglinga, sem er hennar stærsta mót hingað til, og stóð hún sig afar vel á mótinu. Í október lenti hún þrefalt stökk í fyrsta sinn á móti, þar að auki var stökkið í samsetningu, sem er erfiðara í framkvæmd. Við erum stolt af Júlíu okkar og erum spennt að fylgjast með næstu verkefnum hjá henni á svellinu.
Skautakarl ársins: Marinó Máni Þorsteinsson
Marinó kom nýr inn í deildina í mars á þessu ári og kemur hann okkur sífellt á óvart hversu hæfileikaríkur hann er. Hann hefur náð ótrúlegum framförum á svellinu og hefur m.a. lokið fimm af sjö mögulegum stigsprófum í samræmdu kennslukerfi Skautasambandsins, Skautum Regnbogann, á aðeins fáeinum mánuðum. Þess má geta að flesta tekur nokkur ár að klára öll stigin. Marinó hefur ekki einungis hæfileika á svellinu heldur er hann samviskusamur, leggur sig fram á æfingum og sýnir mikinn áhuga á að læra meira og bæta sig. Hann er frábær fyrirmynd fyrir yngri iðkendur félagsins og erum við heppin að hafa hann með okkur.

Skákeild
Skákkona ársins: Sigrún Tara Sigurðardóttir
Hin 9 ára og nýkrýndi Íslandsmeistari stúlkna í skák í flokki U10, Sigríður Tara er nemandi í 4. bekk Rimaskóla en þar í bekk hefur náðst sterkur vinkonuhópur sem hefur sýnt mikinn áhuga og færni í skáklistinni. Sigrún Tara kom, sá og sigraði á Íslandsmóti ungmenna sem haldið var á Akureyri 30. október sl. í flokki stúlkna undir 10 ára aldri. Hún var í skáksveit Rimaskóla sem sigraði á Íslandsmóti grunnskóla 1. – 3. bekkur í febrúar sl. og er því tvöfaldur Íslandsmeistari í ár. Á Reykjavíkurmóti grunnskóla 11. okt. sl gerðist það í fyrsta sinn að stúlknasveit sigraði í opnum flokki í 4. – 7. bekk, þ.e. stúlknasveit Rimaskóla A. Í þessari vösku sveit var Sigrún Tara í fararbroddi ásamt fjórum öðrum skólasystrum sínum. Flestar eru þær á yngsta ári í þessum keppnisflokki. Sigrún Tara fer vel með hrósið og viðurkenningarnar sem hún hefur hlotið á þessu ári. Skák er skemmtileg og æfingin skapar meistarann.
Skákkarl ársins: Tristan Fannar Jónsson
Þessi 8 ára gamli efnispiltur er annar tveggja af sterkustu skákmönnum landsins fæddir árið 2013. Hann var á 1. borði í sveit Rimaskóla sem varð Íslandsmeistari grunnskóla 1. – 3. bekkur í febrúar sl. Hann leiddi einnig sigursveit Rimaskóla á Reykjavíkurmóti grunnskóla 1. – 3. bekkur nú í haust. Á Íslandsmóti Ungmenna á Akureyri þann 30. okt. endaði kappinn í 2. sæti í yngsta aldursflokki mótsins þrátt fyrir að hafa lent í ælupest og vökunótt fyrir mótið. Skákmótinu ætlaði hann ekki sleppa enda þótt hann væri dálítið gugginn. Hann varð einnig skákmeistari Miðgarðs í einstaklingskeppni stráka en keppnin var haldin á Grafarvogsdeginum. Tristan Fannar er ábyggilega einn af efnilegustu skákkrökkum landsins og það verður ábyggilega fylgst með honum í framtíðinni með afreksþjálfun í huga. Í huga Tristans Fannars er skák skemmtileg og hann er alveg með það á hreinu að æfingin skapar meistarann.

Sunddeild
Sundkona ársins: Ingunn Jónsdóttir
Ingunn Jónsdóttir er sundkona Fjölnis árið 2021. Ingunn hefur náð flestum stigum samkvæmt FINA stigatöflunni þetta árið og er stigahæsta sundið hennar 200 metra bringusund en hún fékk 605 stig fyrir það (1000 stig er heimsmet). Ingunn er með fremstu bringusunds- og fjórsundskonum landsins og hefur verið í framför á þessu ári þó svo að covid hafi sett strik í reikninginn hjá flestum. Á nýliðnu Íslandsmeistaramóti í 25m laug vann Ingunn til bronsverðlauna í 50m bringusundi og var að bæta sinn árangur í þeirri grein um rúma sekúndu sem er frábær árangur.
Sundkarl ársins: Kristinn Þórarinsson
Kristinn Þórarinsson er sundkarl Fjölnis árið 2021. Kristinn hefur til margra ára verið einn besti baksunds- og fjórsundsmaður landsins. Þrátt fyrir erfiðleika við sundiðkun á þeim tímum sem við lifum núna náði Kristinn lágmörkum inn á Evrópumeistaramótið í 50m laug sem haldið var í Ungverjalandi í maí. Kristinn vann til fjölda verðlauna á árinu hér innanlands bæði á Íslandsmeistara- og Reykjavíkurmeistaramótum auk annarra móta sem hann tók þátt í. Stigahæsta sundið hans á árinu var 50 metra baksund sem hann synti á Íslandsmeistaramótinu í 50m laug í apríl en hann fékk 742 stig samkvæmt stigatöflu FINA (1000 stig er heimsmet). Kristinn ákvað eftir tímabilið að leggja sundskýluna á ofninn eftir 22 ár við iðkun á afreksstigi og láta gott heita í lauginni að sinni. Hann fór hins vegar ekki langt því hann hefur nú snúið sér að þjálfun hjá félaginu við góðan orðstír.

Tennisdeild
Tenniskona ársins: Eva Diljá Arnþórsdóttir
Eva Diljá hefur átt einstaklega gott ár, en hún vann þrjá Íslandsmeistaratitla; í meistaraflokki kvenna í tvíliðaleik, innanhúss og utanhúss, sem og í U18 einliðaleik innanhúss. Þá lenti hún í 3. sæti á Íslandsmóti innanhúss í meistaraflokki kvenna í einliðaleik og í 2. sæti á Íslandsmóti utanhúss í liðakeppni. Á Reykjavíkurmeistaramóti liðakeppni vann Eva Diljá til tvennra gullverðlauna, í meistaraflokki kvenna og í flokki U18.
Tenniskarl ársins: Hjalti Pálsson
Hjalti hefur átt gott ár á tennismótum á árinu. Hann er Íslandsmeistari innanhúss í meistaraflokki karla í tvíliðaleik og vann til bronsverðlauna í einliðaleik á sama móti. Þá keppti Hjalti einnig á Íslandsmóti utanhúss á árinu og vann til tvennra silfurverðlauna, í karlaflokki 30 + í einliðaleik og meistaraflokki karla í liðakeppni.


Skattaafsláttur af styrkjum til íþróttastarfsemi

Desember 2021 

Ný lög hafa verið samþykkt og tóku gildi þann 1. nóvember þar sem Íþróttafélög geta skráð sig á lista yfir félög sem starfa að almannaheill og njóta aukins skattahagræðingar. Fjölnir hefur fengið staðfestingu á þessari skráningu hjá RSK. Sjá hér. 

Í lögunum er ákvæði fyrir fyrirtæki sem vilja styrkja félög á Almannaheillaskrá, og er þeim heimilt að draga frá skattstofni allt að 1,5% af rekstrartekjum og láta renna til félaga á almannaheillaskrá. Einstaklingar hafa heimild til að gefa 350.000 kr. og draga það frá tekjuskattsstofni og erfðafjárskattur er felldur niður ef arfurinn rennur til félaga á almannaheillaskrá. 

sjá nánar: 

https://www.umfi.is/utgafa/frettasafn/muna-ad-skra-ithrottafelagid-a-almannaheillaskra 

https://www.skatturinn.is/atvinnurekstur/skattskylda/almannaheillaskra-skattfradrattur 

Við viljum hvetja fyrirtæki og samstarfsaðila til að styrkja íþróttastarfið með myndarlegum hætti. Tekið er fram í lögunum að skattafrádrátturinn á eingöngu við um gjafir en ekki auglýsingasamninga.  Fjölnir og deildir félagsins munu heyra í fyrirtækjum og velunnurum  og  kanna með vilja þeirra til að taka þátt í þessu verkefni á þessu ári. Til að geta nýtt heimildina á þessu ári, þarf að greiða gjafaupphæðina á eftirfarandi reikning fyrir 30. desember nk. til að nýta heimildina fyrir þetta ár. 

 Kennitala: 631288-7589 

Bankaupplýsingar: 0114-26-155 

Við hvetjum fyrirtæki sem vilja láta gott af sér leiða að nýta þennan skattafrádrátt og athugið að Fjölnir þarf að veita formlega staðfestingu á gjöfinni til RSK. 

Ungmennafélagið Fjölnir þakkar allan þann stuðning sem fyrirtæki og einstaklingar hafa veitt félaginu undanfarin ár og öllum þeim fjölmörgu sjálfboðaliðum sem hafa stutt við félagið í gegnum árin.