Glæsilegur árangur tennisdeildar Fjölnis í liðakeppni Íslandsmóts TSÍ utanhúss 2026
Glæsilegur árangur tennisdeildar Fjölnis í liðakeppni Íslandsmóts TSÍ utanhúss 2026
Liðakeppni Íslandsmóts TSÍ utanhúss 2026 fór fram dagana 29. júní til 19. júlí þar sem lið tennisdeildar Fjölnis náðu góðum árangri í fjölmörgum flokkum. Fjölnir vann til eins Íslandsmeistaratitils og þriggja annarra verðlaunasæta, þar á meðal silfurverðlauna í báðum meistaraflokkum og öðru sæti í U10 flokki.
Meistaraflokkur karla
Í meistaraflokki karla tryggðu Daniel Pozo og Juan Pablo Moreno Monsalve sér annað sætið eftir sterka frammistöðu í liðakeppninni.
Fjölnir hóf keppnina gegn HMR þar sem liðið hafði öruggan 3–0 sigur. Í tvíliðaleik unnu Daniel og Juan Pablo þá Antoine Nicolas Giraud og Jonathan Wilkins, 4–0, 4–3(6). Daniel fylgdi sigrinum eftir með 6–2, 6–0 sigri á Antoine Nicolas Giraud í einliðaleik og Juan Pablo hafði síðan betur gegn Jonathan Wilkins, 6–1, 6–4.
Í næstu viðureign mætti Fjölnir liði Víkings og þar hafði Víkingur betur, 2–1. Í tvíliðaleiknum mættu Daniel og Juan Pablo þeim Raj Kumar Bonifacius og Frey Pálssyni þar sem Víkingur hafði betur, 4–1, 4–1.
Daniel sýndi enn á ný styrk sinn í einliðaleiknum og vann Raj Kumar Bonifacius 7–5, 6–3. Juan Pablo sýndi einnig mikla baráttu gegn Frey Pálssyni í spennandi viðureign. Leikurinn fór í oddalotu þar sem Juan Pablo barðist allt til enda en varð að lokum að sætta sig við 5–7, 6–0, 10–8 tap.
Með einu sigri og einu naumu tapi hafnaði Fjölnir í öðru sæti í meistaraflokki karla.
Meistaraflokkur kvenna
Í meistaraflokki kvenna tóku Eygló Dís Ármannsdóttir og Saulė Zukauskaite annað sætið eftir sigur og tap í tveimur viðureignum.
Fyrst mættu þær liði TFK þar sem TFK hafði betur, 3–0. Í tvíliðaleik mættu Eygló og Saulė þær Önnu Soffíu Grönholm og Sofiu Sóley Jónasdóttur og töpuðu 4–1, 4–2. Í einliðaleik hafði Anna Soffía betur gegn Eygló, 6–1, 6–1, en Sofia Sóley sigraði Saulė 6–2, 6–2.
Í síðari viðureign sinni mættu Eygló og Saulė liði HMR og þar snerist taflið við. Fjölnir hafði öruggan 3–0 sigur og tryggði sér þar með annað sætið.
Eygló og Saulė hófu sigurinn með sannfærandi 4–0, 4–0 sigri í tvíliðaleik gegn Kristínu Ingu Hannesdóttur og Yilun He. Eygló bætti síðan við 6–1, 6–2 sigri á Kristínu Ingu í einliðaleik og Saulė tryggði þriðja stig Fjölnis með 6–1, 6–1 sigri á Yilun He.
Frammistaða þeirra sýndi sterkan karakter og góða viðspyrnu eftir erfiða fyrstu viðureign og þær tryggðu sér að lokum silfurverðlaun í meistaraflokki kvenna.
Íslandsmeistarar í 30+ kvenna
Í 30+ kvenna átti Fjölnir glæsilega keppni þar sem Alana Elín Steinarsdóttir, Ása Björg Guðlaugsdóttir, Hanna Jóna Skúladóttir og Ragnheiður Ásta Guðnadóttir tryggðu sér Íslandsmeistaratitilinn.
Fyrsta viðureign liðsins var gegn TFK þar sem Fjölnir hafði betur, 3–0. Í tvíliðaleik unnu Alana Elín og Ása Björg þær Stellu Balder og Hildi Margréti Ægisdóttur, 4–0, 2–4, 10–8, eftir spennandi oddalotu. Hanna Jóna tryggði síðan annað stig Fjölnis með 6–2, 6–1 sigri á Claudiu Marcelu Perez. Ragnheiður Ásta innsiglaði síðan 3–0 sigurinn með 6–4, 5–7, 10–6 sigri á Hildi Margréti eftir mikla baráttu og spennandi oddalotu.
Í viðureigninni gegn HMR tryggði Fjölnir sér síðan Íslandsmeistaratitilinn með 2–1 sigri. Ragnheiður Ásta og Hanna Jóna byrjuðu á sannfærandi 4–1, 4–0 sigri í tvíliðaleik gegn Kristínu Dönu Husted og Maríu Pétursdóttur. Alana Elín fylgdi sigrinum eftir með öruggum 6–1, 6–0 sigri á Sigitu Vernere og tryggði þar með Fjölni tvö stig og Íslandsmeistaratitilinn. Ása Björg barðist síðan í einliðaleik gegn Kristínu Ingu Hannesdóttur. Kristín Inga hafði þar betur, 6–3, 4–6, 10–3, en úrslitin höfðu ekki áhrif á lokaniðurstöðuna þar sem titillinn var þegar í höfn fyrir Fjölni.
Fjölnir stóð þar með uppi sem Íslandsmeistari í 30+ kvenna eftir sterka liðsheild og góða frammistöðu í báðum viðureignum.
U10 börn
Í U10 flokki barna tóku Hrafn Sturluson og Thorbergur Maron Egilsson annað sætið fyrir Fjölni.
Sterk liðsheild og góð framtíð
Árangur Fjölnis í liðakeppni Íslandsmóts TSÍ utanhúss 2026 sýnir enn á ný þá miklu breidd sem hefur byggst upp innan tennisdeildarinnar. Félagið átti lið sem börðust um efstu sæti allt frá U10 og upp í meistaraflokka og náði Íslandsmeistaratitli auk þriggja annarra verðlaunasæta.
Liðakeppnin sýndi einnig hversu mikilvægt það er að hafa sterka liðsheild þar sem einstakir sigrar þurfa að leggjast saman til að skila heildarsigri. Leikmenn Fjölnis sýndu metnað, baráttu og samheldni í gegnum keppnina og geta verið stolt af árangri sínum.
Tennisdeild Fjölnis óskar öllum keppendum innilega til hamingju með glæsilegan árangur á Íslandsmóti TSÍ utanhúss 2026 og hlakkar til að sjá liðið halda áfram að byggja á þessum árangri!
Laura-Ann Murphy áfram við stjórnvölinn hjá U17 stúlknaliði Fjölnis
Laura-Ann Murphy áfram við stjórnvölinn hjá U17 stúlknaliði Fjölnis
Íshokkídeild Fjölnis hefur endurnýjað samning við Lauru-Ann Murphy um áframhaldandi þjálfun U17 stúlknaliðs deildarinnar.
Laura hefur stýrt liðinu undanfarin ár með góðum árangri. Á síðasta tímabili náði liðið meðal annars frábærum árangri og tryggði sér silfurverðlaun á Íslandsmótinu.
Laura býr yfir mikilli reynslu úr íshokkíinu, bæði sem leikmaður og þjálfari. Samhliða þjálfuninni leikur hún með meistaraflokki Fjölnis og á að baki fjölda landsleikja fyrir Íslands hönd.
Það er mikið ánægjuefni fyrir Íshokkídeild Fjölnis að Laura haldi áfram starfi sínu með stúlknaliðinu og við hlökkum til að fylgjast með liðinu undir hennar stjórn á komandi tímabili.
Aðrar fréttir af deildinni
Tveir Fjölnisiðkendur á HM U20 í Oregon í frjálsum íþróttum
Tveir Fjölnisiðkendur á HM U20 í Oregon í frjálsum íþróttum
Dagana 5.-9. ágúst fer fram Heimsmeistaramót undir 20 ára í frjálsum íþróttum, í Oregon í Bandaríkjunum. Fjölnir á tvo af fimm fulltrúum Íslands á mótinu, en ná þarf ströngum lágmörkum til að vinna sér inn keppnisrétti á því.
Alba í 100 metra hlaupi
Christina Alba Marcus Hafliðadóttir keppti í undanrásum í 100 metra hlaupi þann 5.ágúst. Því miður var Alba eilítið lasin á keppnisdegi og því þónokkuð frá sínu besta í hlaupinu en kemur heim reynslunni ríkari.
Alba hefur tekið stór skref á hlaupabrautinni undanfarna mánuði. Hún varð Íslandsmeistari í 100 metra hlaupi í júlí þegar hún hljóp á 11,83 sekúndum en Alba hefur hlaupið best á 11,71sekúndum í sumar sem er einungis 0,15 sekúndum frá Íslandsmetinu. Það verður spennandi að sjá hvað Alba gerir á næstu misserum.
Kjartan Óli í 400 metra hlaupi
Kjartan Óli Bjarnason keppti í undanrásum í 400 metra hlaupi þann 6. ágúst. Hann hljóp á tímanum 47,94 sekúndum, sem er hans næst besti tími í vegalengdinni.
Kjartan hefur bætt sig mikið á árinu og hljóp á 47,44 sekúndum á móti í Osló í júni. Sá tími er Íslandsmet U20. Kjartan varð einnig Íslandsmeistari í greininni í júlí þegar hann kom í mark á 48,47 sekúndum.
Glæsilegur árangur hjá okkar fólki sem spennandi verður að fylgjast með á næstu misserum.
Festival vika Fjölnis slær öll aðsóknarmet
Festival vika Fjölnis slær öll aðsóknarmet
Á mánudaginn hefst íshokkínámskeiðið Iceland Hockey Festival 2026 sem fram fer í Egilshöll. Það má sannarlega kalla þetta námskeið íshokkíhátíð eða festival. Það eru Íshokkídeild Fjölnis og fyrirtækið Festival Hokeja sameina krafta sína á ný en í fyrra hófst samstarf þessara aðila með mjög vel heppnuðu námskeiði sem fram fór í ágúst í fyrra.
Nú er bætt í frá fyrra ári en Iceland Hockey Festival 2026 stendur yfir dagana 10.-16. Ágúst. Þetta er æfinga- og upplifunarævintýri sem er opið leikmönnum frá öllum íslenskum og erlendum félögum en þátttakendur eru fæddir á árunum 2006-2020. Yfirþjálfari verður rétt eins og í fyrra hinn pólski Maciek Fabiańczyk en í þjálfarahópnum með honum verða meðal annars Emil fráfarandi yfirþjálfari Fjölnis og Kris, nýr yfirþjálfari Fjölnis, Þjálfarahópurinn kemur frá þremur löndum, auk Íslands.
Viðtökurnar voru hreint frábærar og flest 77 sæti námskeiðsins seldust upp strax um páskana þegar opnað var fyrir skráningar. Því miður eru öll sæti full núna og ekki hægt að bæta við fleiri þátttakendum.
Námskeið sem þessi eru frábært tækifæri til að kynnast nýjum vinum, bæta leikskilning og tækni og ekki síst að eiga skemmtilega viku bæði innan og utan íssins.
Íshokkídeild Fjölnis óskar þátttakendum Iceland Hockey Festival 2026 góðrar skemmtunar.
Aðrar fréttir af deildinni
Kjartan Karl Gunnarsson framlengir við Fjölni
Kjartan Karl Gunnarsson framlengir við Fjölni
Körfuknattleiksdeild Fjölnis hefur samið við Kjartan Karl Gunnarsson til ársins 2028.
Kjartan er uppalinn Fjölnismaður sem hefur átt farsælan feril í yngri flokkum félagsins og unnið fjölda titla. Hann hefur jafnframt öðlast dýrmæta reynslu á venslasamningi hjá Aftureldingu og haldið áfram að þróast sem leikmaður.
Á síðasta tímabili tók Kjartan stór skref með meistaraflokki Fjölnis og sýndi að hann á fullt erindi á hæsta stigi. Hann hefur ávallt verið öflugur stigaskorari og er tilbúinn að taka enn stærra hlutverk með liðinu á komandi tímabilum.
Þjálfari meistaraflokks karla, Baldur Már Stefánsson, fagnar því að Kjartan verði áfram í Fjölnisbúningnum. „Kjartan tók stórt skref á síðasta tímabili. Hann hefur alltaf verið mikill skorari í yngri flokkunum og í fyrra sýndi hann að hann er klár í stærra hlutverk í meistaraflokki.“
Kjartan er ánægður með að framlengja samning sinn við félagið: „Ég er þakklátur fyrir traustið sem Fjölnir sýnir mér og er spenntur fyrir komandi tímabili með liðinu.“
Við óskum Kjartani innilega til hamingju með nýja samninginn og hlökkum til að fylgjast með honum áfram í Fjölnisbúningnum næstu árin.
Ísarr Logi Arnarsson framlengir við Fjölni
Ísarr Logi Arnarsson framlengir við Fjölni
Körfuknattleiksdeild Fjölnis hefur samið við Ísarr Loga Arnarsson til ársins 2028.
Ísarr er uppalinn Fjölnismaður og einn efnilegasti leikmaður landsins í sínum árgangi. Hann hefur verið fastamaður í yngri landsliðum Íslands og öðlaðist dýrmæta reynslu á síðasta ári með U16 landsliðinu, bæði á Norðurlandamótinu í Finnlandi og Evrópumótinu í Norður-Makedóníu.
Á síðasta tímabili lék Ísarr með meistaraflokki Fjölnis samhliða því að spila með Vængjum Júpíters. Hann átti einnig stóran þátt í bikarmeistaratitli Fjölnis í sínum aldursflokki og heldur áfram að taka mikilvæg skref í átt að stærra hlutverki með meistaraflokknum.
Þjálfari meistaraflokks karla, Baldur Már Stefánsson, fagnar því að Ísarr verði áfram í Fjölnisbúningnum. „Ísarr fékk nasaþefinn af meistaraflokki í fyrra eftir frábært sumar með U16 landsliðinu. Hann varð bikarmeistari í sínum flokki og ég hlakka til að sjá hann halda áfram að vaxa og þroskast sem leikmaður og taka enn meira til sín þrátt fyrir ungan aldur.“
Ísarr er spenntur fyrir komandi tímabili: „Ég hlakka mikið til komandi tímabils og allra þeirra tækifæra sem bíða mín. Ég er tilbúinn að leggja hart að mér og þróast sem leikmaður og gera mitt besta.“
Við óskum Ísarri innilega til hamingju með nýja samninginn og hlökkum til að fylgjast með honum áfram í Fjölnisbúningnum næstu árin.
Krakkatennis hefst á ný í haust
Krakkatennis hefst á ný í haust
Tennisdeild Fjölnis býður yngstu iðkendunum aftur velkomna í krakkatennis í haust.
Námskeiðið er ætlað börnum á aldrinum 4–7 ára og er lögð sérstök áhersla á hreyfiþroska, samhæfingu og að kynna börnin fyrir grunnatriðum tennis á skemmtilegan og fjölbreyttan hátt.
Æfingar fara fram á laugardögum kl. 10:30 í Tennishöllinni og hefst haustönnin 29. ágúst.
Í haust verða tveir þjálfarar með hópnum sem gerir deildinni kleift að taka á móti fleiri börnum en áður og veita hverjum og einum enn betri leiðsögn.
Krakkatennis er frábær leið fyrir yngstu iðkendurna til að kynnast íþróttinni, efla hreyfiþroska sinn og hafa gaman í jákvæðu og hvetjandi umhverfi.
Við hlökkum til að taka á móti nýjum og fyrrverandi iðkendum í Tennishöllinni í haust!
Aðrar fréttir af deildinni
Elín Katla Sveinbjörnsdóttir valin til keppni á Junior Grand Prix
Elín Katla Sveinbjörnsdóttir valin til keppni á Junior Grand Prix
Listskautakonan Elín Katla Sveinbjörnsdóttir úr Fjölni hefur verið valin til að keppa fyrir hönd Íslands á Junior Grand Prix (JGP) mótaröðinni árið 2026.
Junior Grand Prix er alþjóðleg mótaröð á vegum Alþjóðaskautasambandsins (ISU) þar sem efnilegustu unglingar heims koma saman til keppni. Um er að ræða kvótamót, þar sem hver þjóð fær ákveðinn fjölda keppnisrétta á mótaröðinni út frá árangri fyrri ára.
Stjórn ÍSS, með aðstoð afreksnefndar, hefur valið þá skautara sem munu keppa fyrir Íslands hönd á mótaröðinni í ár. Elín Katla er einn þeirra sem hljóta það verðskuldaða verkefni.
Elín mun keppa á Junior Grand Prix mótinu sem fram fer í Bangkok í Taílandi dagana 3.–5. september.
Við hjá Fjölni óskum Elínu Kötlu innilega til hamingju með valið og óskum henni góðs gengis í undirbúningi og keppni.
Aðrar fréttir af deildinni
Bogdana Semyryazhko ráðin þjálfari hjá listskautadeild Fjölnis
Bogdana Semyryazhko ráðin þjálfari hjá listskautadeild Fjölnis
Listskautadeild Fjölnis hefur ráðið Bogdönu Semyryazhko, sem jafnan er kölluð Dana, til starfa sem þjálfari hjá félaginu.
Dana er fyrrverandi meðlimur í ítalska landsliðinu í listskautum og býr yfir fjölbreyttri reynslu bæði sem keppandi og þjálfari. Hún hefur starfað við þjálfun frá árinu 2017 og er jafnframt tæknisérfræðingur (Technical Specialist) í íþróttinni.
Auk reynslu sinnar úr listskautunum er Dana með háskólagráður í íþróttafræði og fyrirbyggjandi og aðlagaðri hreyfingu (Preventive and Adapted Physical Activity), sem nýtast henni vel í starfi með iðkendum á öllum aldri og getustigum.
Hjá Fjölni mun Dana koma að þjálfun allra hópa innan listskautadeildarinnar og gegna mikilvægu hlutverki í áframhaldandi uppbyggingu starfsins.
Við bjóðum Dönu hjartanlega velkomna til Fjölnis og hlökkum til samstarfsins.
Aðrar fréttir af deildinni
Benóný Gunnar Óskarsson framlengir við Fjölni
Benóný Gunnar Óskarsson framlengir við Fjölni
Körfuknattleiksdeild Fjölnis hefur samið við Benóný Gunnar Óskarsson til ársins 2028.
Benóný gekk til liðs við Fjölni árið 2023 og hefur síðan fest sig í sessi sem einn efnilegasti leikmaður landsins í sínum árgangi. Hann hefur verið valinn í æfingahópa yngri landsliða Íslands, tekið þátt í verkefni U15 landsliðsins í Finnlandi og var lykilmaður í bikarmeistaraliði Fjölnis í sínum aldursflokki, þar sem hann skoraði eftirminnilega sigurkörfuna í úrslitaleiknum.
Á síðasta tímabili var Benóný hluti af meistaraflokksliði Fjölnis samhliða því að leika með Vængjum Júpíters og hefur haldið áfram að taka stór skref í sinni þróun sem leikmaður.
Þjálfari meistaraflokks karla, Baldur Már Stefánsson, fagnar því að Benóný verði áfram í Fjölnisbúningnum. „Benóný kom inn í fyrra og varð bikarmeistari með sínum flokki þar sem hann skoraði eftirminnilega sigurkörfuna. Hann sýnir frábæra vinnusemi og hefur metnað til að halda áfram að vaxa sem leikmaður og taka sífellt stærra hlutverk með meistaraflokknum.“
Benóný er spenntur fyrir komandi tímabili: „Ég er spenntur fyrir komandi tímabili og hlakka til að bæta mig sem leikmaður.“
Við óskum Benóný innilega til hamingju með nýja samninginn og hlökkum til að fylgjast með honum áfram í Fjölnisbúningnum næstu árin.
