Handbolti

Handknattleiksmaðurinn Ólafur Malmquist hefur framlengt samning sinn við meistaraflokk karla hjá Fjölni.

Ólafur, eða Óli Mall eins og hann er oftast kallaður, hefur verið einn af lykilmönnum liðsins undanfarin ár. Hann er öflugur varnarmaður sem leggur alltaf hart að sér og hefur með reynslu sinni, baráttugleði og dugnaði verið mikilvægur hlekkur í liðinu bæði innan vallar sem utan.

Meistaraflokksráð karla fagnar því að Ólafur verði áfram hluti af liðinu. „Það gleður okkur mikið að Ólafur Malmquist hafi framlengt samning sinn við félagið. Hann hefur verið einn af mikilvægustu leikmönnum liðsins undanfarin ár og við erum sannfærð um að hann eigi eftir að halda áfram að leggja liðinu mikið til á komandi árum.“

Ólafur segist spenntur fyrir komandi verkefnum: „Ég er hæstánægður að halda áfram í Grafarvoginum. Við erum með frábæran hóp af strákum og Gunni kemur inn með mikinn metnað. Ég hef mikla trú á því sem við erum að gera og er mjög spenntur fyrir komandi tímabili.“

Við óskum Ólafi innilega til hamingju með nýja samninginn og hlökkum til að sjá hann áfram í Fjölnisbúningnum á komandi tímabili.

Handknattleiksmennirnir Valur Fannar Traustason og Bjarni Freyr Ásgeirsson hafa framlengt samninga sína við meistaraflokk karla hjá Fjölni.

Valur og Bjarni eru báðir fæddir árið 2009 og tilheyra efnilegum árgangi félagsins sem hefur verið að stíga sín fyrstu skref í meistaraflokki. Framlenging þeirra er mikilvægt skref í áframhaldandi uppbyggingu handknattleiksdeildarinnar.

Valur Fannar er öflugur línumaður sem steig sín fyrstu skref með meistaraflokki á síðasta tímabili. Hann hefur sýnt miklar framfarir og félagið bindur miklar vonir við að hann verði lykilmaður í liðinu á komandi árum.

Bjarni Freyr er öflug örvhent skytta og uppalinn Fjölnismaður. Hann er einn af efnilegustu leikmönnum félagsins og hefur alla burði til að ná langt í handboltanum. Félagið hlakkar til að sjá hann halda áfram að blómstra í Fjölnisbúningnum.

Gunnar Valur, yfirþjálfari og meistaraflokksþjálfari karla fagnar því að báðir leikmennirnir hafi framlengt samninga sína. „Við erum afar ánægð með að Valur og Bjarni verði áfram hluti af Fjölni. Báðir hafa þeir sýnt miklar framfarir, mikinn metnað og eiga bjarta framtíð fyrir sér. Við hlökkum til að fylgjast með þeim taka næstu skref í meistaraflokki og leggja sitt af mörkum til liðsins á komandi árum.“

Valur Fannar og Bjarni Freyr eru báðir hluti af spennandi framtíð handknattleiksdeildar Fjölnis og við óskum þeim innilega til hamingju með nýju samningana. Við hlökkum til að sjá þá áfram í Fjölnisbúningnum á komandi tímabili.

Handknattleiksdeild Fjölnis hefur samið við Karl Arnar Bjarnason um þjálfarastörf hjá félaginu fyrir komandi tímabil. Karl verður aðstoðarþjálfari meistaraflokks kvenna, markmannsþjálfari meistaraflokks og mun jafnframt koma að þjálfun 3. flokks ásamt markmannsþjálfun hjá yngri flokkum félagsins.

Karl býr yfir áratuga reynslu úr handboltanum, bæði sem leikmaður og þjálfari. Hann lék sem markmaður með Fylki, Aftureldingu, Val, Stjörnunni, Þrótti og síðast Fjölni áður en hann sneri sér alfarið að þjálfun. Frá árinu 2010 hefur hann starfað sem aðstoðarþjálfari, markmannsþjálfari og styrktarþjálfari hjá meðal annars Þrótti, Fjölni, Aftureldingu og síðast Víkingi. Auk þess hefur hann komið að hæfileikamótun HSÍ og haldið fyrirlestra um styrktarþjálfun yngri leikmanna.

Meistaraflokksráð kvenna fagnar komu Karls til félagsins. „Við erum mjög ánægð með að fá Karl til liðs við okkur. Hann býr yfir mikilli reynslu og þekkingu sem mun nýtast leikmönnum félagsins afar vel. Við bindum miklar vonir við samstarfið og hlökkum til að sjá hann leggja sitt af mörkum í áframhaldandi uppbyggingu handboltastarfsins hjá Fjölni.“

Karl hlakkar til að snúa aftur til Fjölnis: „Ég er mjög spenntur að fá að vinna aftur hjá Fjölni og fá tækifærið til að vinna með Þór, stelpunum í meistaraflokknum, 3. flokki og markmönnum félagsins. Ég hef mikla trú á að við sem lið og félag getum náð góðum árangri og haldið áfram að byggja ofan á það öfluga starf sem unnið er hjá félaginu. Ég tel að reynsla mín, þekking og áhugi geti orðið gott púsl í þennan flotta hóp.“

Við bjóðum Karl hjartanlega velkominn til starfa og hlökkum til samstarfsins á komandi tímabili.

Handknattleikskonan Aníta Rut Jónsdóttir hefur framlengt samning sinn við meistaraflokk kvenna hjá Fjölni.

Aníta er skytta, fædd árið 2009, og hefur sýnt stöðugar framfarir undanfarin ár. Hún lék sinn fyrsta meistaraflokksleik fyrir tveimur tímabilum og hefur síðan þróast í öflugan leikmann sem á bjarta framtíð fyrir sér í Fjölnisbúningnum.

Meistaraflokksráð kvenna fagnar því að Aníta verði áfram hluti af liðinu og telur áframhaldandi veru hennar mikilvæga fyrir framtíð félagsins. „Það gleður okkur mikið að Aníta hafi framlengt samning sinn við félagið. Við erum sannfærð um að hún eigi eftir að styrkja lið Fjölnis mikið á komandi árum og hlökkum til að fylgjast með áframhaldandi þróun hennar.“

Aníta segist spennt fyrir komandi verkefnum: „Ég er virkilega spennt fyrir komandi tímabili og þeim tækifærum sem það býður upp á. Ég hlakka til að bæta mig sem leikmaður og leggja mig fram.“

Við óskum Anítu innilega til hamingju með nýja samninginn og hlökkum til að fylgjast með henni í Fjölnisbúningnum á komandi tímabili.

Handknattleikskonan Karen Sævarsdóttir hefur framlengt samning sinn við meistaraflokk kvenna hjá Fjölni.

Karen er miðjumaður, fædd árið 2009, og hefur sýnt stöðugar framfarir undanfarin misseri. Hún er öflugur og fjölhæfur leikmaður sem hefur sérstaklega skarað fram úr í varnarleiknum. Á síðasta tímabili steig hún sín fyrstu skref með meistaraflokki og stóð sig afar vel.

Meistaraflokksráð kvenna fagnar því að Karen verði áfram hluti af liðinu og lítur á hana sem mikilvægan þátt í framtíð félagsins. „Það gleður okkur mikið að Karen hafi framlengt samning sinn við félagið. Við bindum miklar vonir við hana og hlökkum til að sjá hana halda áfram að þróast og ná enn lengra í Fjölni.“

Karen segist spennt fyrir komandi verkefnum: „Ég er virkilega spennt fyrir komandi tímabili og að vera hluti af liðinu. Ég hlakka til að halda áfram að þróast sem leikmaður og leggja mitt af mörkum.“

Við óskum Karenu innilega til hamingju með nýja samninginn og hlökkum til að fylgjast með henni í Fjölnisbúningnum á komandi tímabili.

Handknattleiksdeild Fjölnis hefur ráðið Gunnar Val Arason sem aðalþjálfara meistaraflokks karla til næstu tveggja ára.

Það er mikið ánægjuefni að Gunnar Valur hafi ákveðið að taka við liðinu og skrifað undir tveggja ára samning við félagið. Með ráðningu hans stígur handknattleiksdeildin mikilvægt skref inn í komandi tímabil og bindur miklar vonir við áframhaldandi uppbyggingu liðsins undir hans stjórn. Gunnar Valur þekkir félagið einstaklega vel, bæði innan sem utan vallar, og hefur í undanfarin ár verið þjálfari meistaraflokks kvenna og yfirþjálfari yngri flokka. Hann er reynslumikill þjálfari með mikla þekkingu á leiknum, starfi félagsins og þeim gildum sem deildin vill vinna eftir.

Það er mikið fagnaðarefni að Gunnar Valur hafi tekið að sér þetta mikilvæga verkefni á þessum tímapunkti. Við erum sannfærð um að þekking hans, reynsla og metnaður muni nýtast liðinu vel og skapa góðan grunn fyrir áframhaldandi uppbyggingu. Gunnar Valur hefst nú þegar handa við skipulag og undirbúning tímabilsins í Grill-66 deildinni sem framundan er. Jafnframt er unnið að því að semja við leikmenn liðsins og vonumst við til að geta á næstu vikum kynnt fleiri jákvæðar fréttir.

Stjórn handknattleiksdeildarinnar og meistaraflokkur karla lýsa yfir mikilli ánægju með að samkomulag hafi náðst við Gunnar Val og hlakka til farsæls samstarfs á komandi árum.

Velkominn til starfa, Gunnar Valur!

Handknattleikskonan Kolbrún Ída hefur framlengt samning sinn við meistaraflokk kvenna hjá Fjölni.

Kolbrún er efnilegur markmaður, fædd árið 2010, sem hefur tekið miklum framförum undanfarin misseri. Hún hefur sýnt að hún býr yfir miklum hæfileikum og hefur með vinnusemi sinni haldið áfram að þróast sem leikmaður. Miklar vonir eru bundnar við áframhaldandi þróun hennar á komandi árum.

Meistaraflokksráð kvenna fagnar því að Kolbrún verði áfram hluti af liðinu og telur áframhaldandi veru hennar mikilvæga fyrir framtíðina. „Það gleður okkur mjög að Kolbrún hafi framlengt samning sinn við félagið. Hún hefur tekið miklum framförum undanfarin misseri og við bindum miklar vonir við áframhaldandi þróun hennar. Við hlökkum til að fylgjast með henni vaxa og dafna í Fjölnisbúningnum.“

Kolbrún segist spennt fyrir komandi verkefnum: „Ég er rosalega spennt fyrir komandi tímabili og hlakka til að bæta mig sem leikmaður í þessu geggjaða liði.“

Við óskum Kolbrúnu innilega til hamingju með nýja samninginn og hlökkum til að fylgjast með henni í Fjölnisbúningnum á komandi tímabili.

Handknattleikskonan Ragnheiður Sæunn Aðalsteinsdóttir hefur framlengt samning sinn við meistaraflokk kvenna hjá Fjölni til næstu tveggja ára.

Ragnheiður er uppalin hjá Fjölni og hefur þróast í öflugan leikmann. Hún er sterk í vörninni, öflug skytta og býr yfir góðu auga fyrir leiknum sem nýtist liðinu vel beggja vegna vallarins.

Meistaraflokksráð kvenna fagnar því að Ragnheiður verði áfram hluti af liðinu og telur áframhaldandi veru hennar mikilvæga fyrir uppbyggingu hópsins. „Það er okkur mikið ánægjuefni að Ragnheiður verði áfram í Fjölnislitunum. Hún er uppalin hjá félaginu og hefur sýnt stöðugar framfarir undanfarin ár. Við hlökkum til að sjá hana halda áfram að vaxa með liðinu og óskum henni innilega til hamingju með nýja samninginn.“

Ragnheiður segist spennt fyrir komandi verkefnum: „Ég hlakka til frábærs tímabils og til að leggja mitt af mörkum með þessum geggjuðu stelpum!“

Við óskum Ragnheiði innilega til hamingju með nýja samninginn og hlökkum til að fylgjast með henni í Fjölnisbúningnum á komandi tímabili.

Handknattleiksdeild Fjölnis hefur samið við markvörðinn Garp Gylfason til næstu tveggja ára. Garpur kemur til félagsins frá Fram og er öflug viðbót við meistaraflokk karla fyrir komandi tímabil.

Garpur er sterkur markvörður og frábær karakter sem mun styrkja hópinn bæði innan sem utan vallar. Miklar væntingar eru gerðar til framlags hans á komandi tímabili og er honum ætlað mikilvægt hlutverk í liðinu.

Sveinn Þorgeirsson, fulltrúi meistaraflokksráðs karla, fagnar komu Garps til Fjölnis: „Við erum afar ánægð með að fá Garp til liðs við okkur. Hann er öflugur markvörður sem bætir miklum gæðum inn í hópinn og hefur jafnframt þann karakter sem við viljum hafa í liðinu. Við hlökkum til samstarfsins og bjóðum hann hjartanlega velkominn í Fjölni.“

Garpur hlakkar sömuleiðis til að hefja nýjan kafla hjá Fjölni: „Ég er mjög spenntur fyrir komandi tímabili og hlakka mikið til að takast á við nýjar áskoranir með nýju liði. Ég mun leggja mig 100% fram og gera allt sem ég get til að hjálpa liðinu að ná markmiðum sínum.“

Við hjá Fjölni bjóðum Garp hjartanlega velkominn í Grafarvoginn og hlökkum til að sjá hann verja mark liðsins á komandi tímabilum.