Íshokkí

Íshokkídeild Fjölnis hefur endurnýjað samning við Lauru-Ann Murphy um áframhaldandi þjálfun U17 stúlknaliðs deildarinnar.

Laura hefur stýrt liðinu undanfarin ár með góðum árangri. Á síðasta tímabili náði liðið meðal annars frábærum árangri og tryggði sér silfurverðlaun á Íslandsmótinu.

Laura býr yfir mikilli reynslu úr íshokkíinu, bæði sem leikmaður og þjálfari. Samhliða þjálfuninni leikur hún með meistaraflokki Fjölnis og á að baki fjölda landsleikja fyrir Íslands hönd.

Það er mikið ánægjuefni fyrir Íshokkídeild Fjölnis að Laura haldi áfram starfi sínu með stúlknaliðinu og við hlökkum til að fylgjast með liðinu undir hennar stjórn á komandi tímabili.

Á mánudaginn hefst íshokkínámskeiðið Iceland Hockey Festival 2026 sem fram fer í Egilshöll. Það má sannarlega kalla þetta námskeið íshokkíhátíð eða festival. Það eru Íshokkídeild Fjölnis og fyrirtækið Festival Hokeja sameina krafta sína á ný en í fyrra hófst samstarf þessara aðila með mjög vel heppnuðu námskeiði sem fram fór í ágúst í fyrra.

Nú er bætt í frá fyrra ári en Iceland Hockey Festival 2026 stendur yfir dagana 10.-16. Ágúst. Þetta er æfinga- og upplifunarævintýri sem er opið leikmönnum frá öllum íslenskum og erlendum félögum en þátttakendur eru fæddir á árunum 2006-2020. Yfirþjálfari verður rétt eins og í fyrra hinn pólski Maciek Fabiańczyk en í þjálfarahópnum með honum verða meðal annars Emil fráfarandi yfirþjálfari Fjölnis og Kris, nýr yfirþjálfari Fjölnis, Þjálfarahópurinn kemur frá þremur löndum, auk Íslands.

Viðtökurnar voru hreint frábærar og flest 77 sæti námskeiðsins seldust upp strax um páskana þegar opnað var fyrir skráningar. Því miður eru öll sæti full núna og ekki hægt að bæta við fleiri þátttakendum.

Námskeið sem þessi eru frábært tækifæri til að kynnast nýjum vinum, bæta leikskilning og tækni og ekki síst að eiga skemmtilega viku bæði innan og utan íssins.

Íshokkídeild Fjölnis óskar þátttakendum Iceland Hockey Festival 2026 góðrar skemmtunar.

Krisjanis Abolins-Abol hefur verið ráðinn nýr yfirþjálfari barna- og unglingastarfs og meistaraflokks kvenna hjá Íshokkídeild Fjölnis.

Hann kemur í stað Emil Alengård sem gegnt hefur starfinu undanfarin ár, en nýverið sagði hann upp stöðu sinni að eigin ósk. Fjöldi umsókna barst og eftir langt og strangt ráðningarferli var ákveðið að ráða Krisjanis Abolins-Abol frá Lettlandi. Kris, eins og hann er jafnan kallaður, heimsótti Ísland nýlega sem lokaskref í ráðningarferlinu, skoðaði aðstæður, stýrði æfingum og hitti ýmsa aðila frá Íshokkídeildinni.

Kris byrjaði að æfa íshokkí á unga aldri í Lettlandi þar sem íshokkí er ein vinsælasta íþrótt landsins. Hann spilaði í meistaraflokki í heimalandinu, Þýskalandi og fleiri Evrópulöndum áður en hann sneri sér alfarið að þjálfun í heimalandinu. Þar hefur Kris þjálfað ýmis yngri lið og stýrt æfingabúðum og námskeiðum fyrir börn og unglinga víða í Evrópu á vegum Next Hockey, ásamt því að stýra úrvalsliðum (selects) ýmissa aldurshópa frá heimalandinu í alþjóðlegum keppnum.

Auk íshokkíþjálfunar hefur Kris sérhæft sig í styrktar- og þrekþjálfun ásamt jóga. Hann býr yfir víðtækri reynslu af leikmannaþróun, afreksþjálfun og langtímaþróun íþróttamanna. Hann hefur náð góðum árangri við þjálfun leikmanna á aldrinum 7–16 ára, þróun og framkvæmd árangursmiðaðra æfingaáætlana á ís og utan íss, undirbúning leikmanna fyrir keppni á hæsta stigi og einstaklingsþjálfun afreksíþróttafólks. Kris býr einnig yfir sterkri þekkingu á myndbandsgreiningu, tæknilegri og taktískri þróun leikmanna, auk þjálfunar á sviði andlegrar frammistöðu.

Pétur Magnússon, formaður Íshokkídeildar Fjölnis, er mjög ánægður með ráðninguna:

„Kvennalið Fjölnis gekk í gegnum miklar leikmannabreytingar á síðasta ári eftir að hafa hampað Íslandsmeistaratitlinum árin 2024 og 2025. Í fyrra og núna í vetur eru margar ungar stelpur að taka sín fyrstu skref í meistaraflokki og því er mikill fengur að fá til félagsins reyndan þjálfara sem er vanur að vinna með ungum leikmönnum sem vilja ná langt í íþróttinni.

Að sama skapi er Kris sannkölluð gullnáma fyrir yngri iðkendur okkar því hann hefur sérhæft sig í einstaklingsmiðaðri þjálfun og leikskilningi, enda eru börn og unglingar oft á mjög ólíkum stað í þessum þáttum. Hann kemur ekki síður gríðarsterkur inn við að móta þjálfunarstefnu okkar til framtíðar og leiðbeina öðrum þjálfurum deildarinnar í samræmi við stefnuna, þannig að þjálfun hjá okkur í Fjölni sé á pari við það sem best gerist í íshokkíþjálfun í heiminum í dag.“

Kris, nýr yfirþjálfari barna- og unglingastarfs og meistaraflokks kvenna hjá Íshokkídeild Fjölnis, er spenntur að hefja störf hjá Fjölni:

„Mér finnst rosalega spennandi tækifæri að fá að koma að allri þróun félags eins og Fjölnis því hér eru miklir möguleikar til að byggja upp félag og leikmenn í fremstu röð. Ég hef reynslu af því að leiða lið á alþjóðlegum mótum og vinna náið með fjölbreyttum hópi sérfræðinga og þjálfara til að hámarka árangur einstaklinga og liða. Með bakgrunn í líkamsræktarþjálfun, styrktar- og þrekþjálfun og jógakennslu legg ég áherslu á heildræna þróun íþróttafólks.

Ég brenn fyrir að hjálpa leikmönnum að ná hámarksgetu sinni, efla seiglu, sjálfstraust og góðan karakter og skapa umhverfi sem byggir á fagmennsku, ábyrgð og stöðugum framförum. Markmið mitt er að starfa innan atvinnu- eða afreksmiðaðs unglingastarfs í íshokkí þar sem ég get lagt mitt af mörkum til að hámarka möguleika leikmanna og áfram þróast sem afreksþjálfari.

Ég hlakka því mikið til að þróa starfið í Fjölni á næstu árum. Þetta er mjög spennandi verkefni fyrir mig.“

Kris hefur störf hjá Fjölni 7. ágúst og Íshokkídeild Fjölnis býður hann hjartanlega velkominn til félagsins.

Íshokkídeild Fjölnis hefur endurnýjað samning við Gunnar Guðmundsson um áframhaldandi þjálfun meistaraflokks karla. Gunnar hefur stýrt liðinu undanfarin tvö tímabil og heldur því áfram þeirri uppbyggingu sem hefur átt sér stað á síðustu árum.

Gunnar er reynslumikill íshokkímaður sem hefur leikið bæði með Fjölni og Esju hér á landi, auk þess sem hann spilaði um tíma í Danmörku. Hann fór í gegnum öll yngri landslið Íslands og lék einnig með A-landsliðinu. Samhliða þjálfun hjá Fjölni hefur Gunnar verið þjálfari U18 landsliðs karla og starfaði sem aðstoðarþjálfari A-landsliðs kvenna á heimsmeistaramótinu síðastliðið vor.

Gunnar þekkir starfsemi Fjölnis afar vel og hefur unnið markvisst að uppbyggingu meistaraflokks karla undanfarin tvö tímabil. Það er því mikið ánægjuefni að hann hafi ákveðið að halda áfram störfum hjá félaginu.

Íshokkídeild Fjölnis býður Gunnar hjartanlega velkominn til áframhaldandi starfa og hlakkar til að fylgjast með liðinu taka næstu skref undir hans stjórn.

Íshokkídeild Fjölnis hefur gengið frá ráðningu aðalþjálfara fyrir yngstu iðkendurna næsta vetur. Skrifað hefur verið undir samninga um áframhaldandi störf Andra Freys Magnússonar og Flosrúnar Vöku Jóhannesdóttur, en þau voru einnig við störf hjá deildinni síðasta vetur og stóðu sig afburðavel.

Andri Freyr verður aðalþjálfari yngstu barnanna, sex ára og yngri. Andri er þrautreyndur íshokkíþjálfari og hefur um árabil verið í þjálfarateymi Fjölnis, ekki síst með byrjendur. Hann hefur jafnframt mikla reynslu af almennri skautaþjálfun, meðal annars hjá Íþróttafélaginu Öspinni. Þá er Andri einn af forkólfum krulluíþróttarinnar hér á landi. Auk þjálfunar yngstu iðkendanna mun Andri áfram sinna byrjendum á öllum aldri, þar á meðal fullorðnum sem vilja stíga sín fyrstu skref í íshokkí.

Flosrún Vaka verður aðalþjálfari U8- og U10-hópa íshokkídeildarinnar. Hún þekkir íshokkííþróttina afar vel en hefur spilað sem leikmaður bæði hér heima og erlendis. Flosrún er fyrirliði meistaraflokks kvenna hjá Fjölni, sem varð Íslandsmeistari árin 2024 og 2025. Auk þess býr hún yfir mikilli reynslu af þjálfun barna, bæði hér á landi og erlendis.

Það er sannarlega mikill fengur fyrir íshokkídeildina að hafa Andra og Flosrúnu áfram í þjálfarahópnum. Við bjóðum þau hjartanlega velkomin til áframhaldandi starfa og hlökkum til komandi tímabils.

Fimm efnilegir leikmenn úr íshokkídeild Fjölnis tóku nýverið þátt í U14 Select Trophy-mótinu sem fram fór í Helsinki í Finnlandi.

Þeir Fannar Hólm, Ignat, Jökull, Fannar Þór og Guðsteinn voru fulltrúar Fjölnis í U14 Select-drengjalandsliðinu, sem er skipað efnilegustu leikmönnum víðs vegar af landinu.

Mótið fór fram við glæsilegar aðstæður þar sem lið frá fjórum þjóðum komu saman til keppni. Íslenska liðið vann einn leik á mótinu og öðlaðist um leið dýrmæta reynslu gegn sterkri alþjóðlegri mótspyrnu.

Slík verkefni eru mikilvægur þáttur í þróun ungra leikmanna og gefa þeim tækifæri til að takast á við nýjar áskoranir, bæði innan sem utan íssins.

Fjölnir óskar þeim Fannari Hólm, Ignat, Jökli, Fannari Þór og Guðsteini innilega til hamingju með þátttökuna og frábæra frammistöðu. Jafnframt vill félagið hrósa Íshokkísambandi Íslands fyrir þetta metnaðarfulla framtak og vonast til að verkefnið verði áfram hluti af uppbyggingu ungra íslenskra íshokkíleikmanna.