Ölgerðin áfram í öflugu samstarfi við Ungmennafélagið Fjölnir
Ölgerðin áfram í öflugu samstarfi við Ungmennafélagið Fjölnir
Fjölnir og Ölgerðin hafa endurnýjað samstarfssamning sinn og er um að ræða enn veglegri samning en áður, sem nær nú yfir fleiri deildir og viðburði innan félagsins.
Ölgerðin hefur verið einn af stærstu og mikilvægustu styrktaraðilum Fjölnis um langt árabil og hefur samstarfið reynst félaginu afar dýrmætt. Stuðningur fyrirtækisins skiptir miklu máli fyrir áframhaldandi uppbyggingu og öflugt starf félagsins. Vörur frá Ölgerðinni eru stór hluti af leikdögum og viðburðum á vegum félagsins og eru einnig nýttar í almennri sjoppusölu hjá deildum Fjölnis. Sú sala er mikilvæg fjáröflun fyrir deildirnar og styður beint við öflugt íþrótta- og félagsstarf innan félagsins.
Þorgeir Örn Tryggvason, markaðsstjóri Fjölnis, er ánægður með nýja samninginn: „Ölgerðin hefur um árabil verið einn af stærstu styrktaraðilum Fjölnis og því afar ánægjulegt að efla það samstarf enn frekar. Með nýjum samningi eykst aðkoma Ölgerðarinnar að fleiri viðburðum og verkefnum innan félagsins, sem mun styrkja starf deildanna enn meira.“
Valdís María Einarsdóttir, sölustjóri á fyrirtækjasviði hjá Ölgerðinni, segir samstarfið mikilvægt: “Það er okkur hjá Ölgerðinni mikið ánægjuefni að efla enn frekar samstarfið við Fjölni, sem hefur staðið sterkt um árabil. Fjölnir er öflugt félag með mikilvægt hlutverk og við erum stolt af því að geta lagt okkar af mörkum með áframhaldandi samstarfi.”
Fjölnir þakkar Ölgerðinni kærlega fyrir stuðninginn og hlakkar til áframhaldandi farsæls samstarfs á komandi árum.
Signý Harðardóttir framlengir við Fjölni
Signý Harðardóttir framlengir við Fjölni
Handknattleikskonan Signý Harðardóttir hefur framlengt samning sinn við meistaraflokk kvenna hjá Fjölni.
Signý, sem er fædd árið 2007, er ungur og efnilegur vinstri hornamaður sem hefur vakið athygli fyrir styrk sinn, snörp tilþrif og mikla vinnusemi. Hún er baráttuglöð á vellinum og leggur sig alltaf fram fyrir liðið, bæði í vörn og sókn. Fjölnir bindur miklar vonir við áframhaldandi þróun Signýjar á komandi tímabilum.
Signý sjálf er spennt fyrir framhaldinu: „Ég er mjög spennt fyrir komandi tímabili og að halda áfram að leggja mig fram um að gera betur í dag en í gær. Það er kraftur í hópnum og ég trúi því að við eigum eftir að gera góða hluti saman.“
Það eru góð tíðindi fyrir Fjölni að Signý hafi framlengt samning sinn og hlökkum við til að sjá meira af henni í gulu á komandi tímabili.
Aðrar fréttir af deildinni
Lokahóf handknattleiksdeildar Fjölnis fór fram með glæsibrag
Lokahóf handknattleiksdeildar Fjölnis fór fram með glæsibrag
Handknattleiksdeild Fjölnis hélt nýverið lokahóf sitt, þar sem leikmenn, þjálfarar og stuðningsfólk komu saman til að fagna vel heppnuðu tímabili. Stemningin var frábær og gleðin rík, enda margt til að minnast eftir veturinn.
Á hófinu voru veittar viðurkenningar til leikmanna sem sköruðu fram úr á tímabilinu:
- Besti leikmaður karla: Aðalsteinn Örn Aðalsteinsson
- Besti leikmaður kvenna: Berglind Benediktsdóttir
- Besti leikmaður Vængja: Óli Fannar Pedersen
- Efnilegasti leikmaður karla: Heiðmar Björgvinsson
- Efnilegasti leikmaður kvenna: Sara Kristín Pedersen
- Besti liðsfélagi kvenna: Sara Kristín Pedersen
- Besti liðsfélagi karla: Ólafur Malmquist
Það var ljóst að samheldni og metnaður einkenna handknattleiksdeild Fjölnis, og horfa leikmenn og þjálfarar björtum augum til næsta tímabils.
Aðrar fréttir af deildinni
Sara Kristín framlengir við Fjölni
Sara Kristín framlengir við Fjölni
Handknattleikskonan Sara Kristín Pedersen hefur framlengt samning sinn við meistaraflokk kvenna hjá Fjölni.
Sara kemur úr öflugum 2007 árgangi Fjölnis og er nú að hefja sitt fimmta ár með meistaraflokki félagsins, þrátt fyrir ungan aldur. Hún hefur þegar leikið yfir 70 leiki fyrir Fjölni og safnað að sér dýrmætri reynslu á stuttum tíma.
Sara hefur verið lykilleikmaður hjá liðinu undanfarin ár og framlag hennar innan sem utan vallar fer ekki fram hjá neinum. Á síðustu árum hefur hún verið valin efnilegasti leikmaður meistaraflokksins og á síðasta lokahófi var hún einnig valin besti liðsfélaginn.
Magnús Arnarsson, formaður meistaraflokksráðs kvenna, segir ánægjulegt að halda Söru áfram hjá félaginu: „Við erum afar glöð að Sara Kristín verði áfram með okkur og hlökkum til að fylgjast með henni halda áfram að vaxa og blómstra í Fjölnisbúningnum.“ Sara Kristín er þá spennt fyrir áframhaldinu: „Ég er mjög spennt að halda áfram með félaginu og hlakka til að byggja ofan á það sem við höfum verið að gera saman.“
Markmið liðsins eru skýr fyrir komandi tímabil þar sem stefnan er sett á að halda áfram uppbyggingu liðsins og berjast í fremstu röð. Með áframhaldandi framlagi Söru Kristínar styrkist hópurinn enn frekar fyrir verkefnin fram undan.
Aðrar fréttir af deildinni
Aðalfundur Fjölnis 2026: Jákvæð rekstrarstaða og heiðursviðurkenningar til sjálfboðaliða
Aðalfundur Fjölnis 2026: Jákvæð rekstrarstaða og heiðursviðurkenningar til sjálfboðaliða
Aðalfundur Fjölnis fór fram sl. þriðjudag 28. apríl, í Miðjunni, félagsrými Fjölnis í Egilshöll.
Formaður aðalstjórnar fór yfir það helsta í starfi félagsins á árinu 2025 og framkvæmdastjóri kynnti ársreikning þess. Annað árið í röð er hagnaður af rekstri og því óhætt að segja að bjartar horfur eru í fjármálum félagsins. Félagið í heild skilaði 40,9 m.kr. rekstrarafgangi á árinu 2025 samanborið við 6,3 m.kr. afgang á árinu 2024.
Árskýrslu félagsins má sjá hér.
Aðalstjórn lagði fram breytingar á lögum félagsins. Nokkur umræða skapaðist um ýmis ákvæði laganna en framlagðar breytingatillögur voru að mestu samþykktar. Nýsamþykkt lög félagsins verða birt hér á vefsíðunni þegar þau taka gildi með staðfestingu stjórnar ÍBR og framkvæmdastjórar ÍSÍ.
Líkt og venjan er á aðalfundi félagsins voru veittar heiðursviðurkenningar fyrir óeigingjarnt starf sjálfboðaliða fyrir félagið. Heiðursviðurkenningar hlutu:
Silfurmerki:
- Sigurður Einar Guðbrandsson (knattspyrnudeild)
- Sigríður Sigurðardóttir (tennisdeild)
- Alana Elín Steinarsdóttir (tennisdeild)
- Kristín Fossdal (íshokkídeild)
- Hafdís Baldursdóttir (íshokkídeild)
- Arnar B. Sigurðsson (körfuknattleiksdeild)
Gullmerki:
- Þorsteinn Yngvi Guðmundsson (karatedeild)
- Róbert Línberg Runólfsson (handknattleiksdeild)
- Halldór Torfi Pedersen (handknattleiksdeild)
- Magnús Þór Arnarson (handknattleiksdeild)
- Rakel Hákonardóttir (listskautadeild)
- Sveinn Þorgeirsson (handknattleiksdeild)
- Gunnar Jónatansson (aðalstjórn)
- Bogi Nils Bogason (aðalstjórn)
Ný stjórn var kjörin líkt og lög gera ráð fyrir. Nýr í aðalstjórn er Eyþór Jónsson en Gunnar Bjarnason og Inga Björk Guðmundsdóttir fengu áframhaldandi kosningu í aðalstjórn. Bjarni Sigurðsson og Guðlaugu Björk Karlsdóttir gáfu ekki kost á sér sem áframhaldandi varamenn en í stað þeirra koma inn Álfheiður Sif Jónasdóttir og Sigurður Einar Guðbrandsson. Þá var Jarþrúður Hanna Jóhannsdóttir endurkjörin sem formaður aðalstjórnar.
Sjá upplýsingar um aðalstjórnstjórn hér.
Ávarp flutti Auður Inga Þorsteinsdóttir, framkvæmdastjóri UMFÍ og afhenti Jarþrúði Hönnu Jóhannsdóttur, formanni Fjölnis, gullmerki UMFÍ.
Gunnar Valur framlengir sem yfirþjálfari handknattleiksdeildar Fjölnis
Gunnar Valur framlengir sem yfirþjálfari handknattleiksdeildar Fjölnis
Handknattleiksdeild Fjölnis hefur framlengt samning við Gunnar Val Arason um yfirþjálfarastöðu deildarinnar til næstu fjögurra ára.
Gunnar Valur hefur gegnt stöðu yfirþjálfara deildarinnar síðastliðin ár og verið í lykilhlutverki í uppbyggingu starfsins. Hann hefur reynst deildinni afar verðmætur starfskraftur og sinnt starfinu af mikilli fagmennsku og kostgæfni.
Í starfi sínu hefur Gunnar lagt áherslu á markvissa uppbyggingu yngri flokka, faglegt þjálfunarumhverfi og skýra stefnu í þróun leikmanna. Með áframhaldandi samstarfi við Gunnar er handknattleiksdeild Fjölnis að styrkja enn frekar þann grunn sem byggður hefur verið upp á síðustu árum.
Róbert Línberg Runólfsson, formaður barna- og unglingaráðs handknattleiksdeildar Fjölnis, fagnar framlengingunni: „Sem formaður barna- og unglingaráðs vil ég óska deildinni til hamingju með að fá að hafa Gunnar áfram hjá okkur í deildinni. Ég tel það mikinn happafeng fyrir deildina að halda áfram samstarfi við hann.“
Gunnar Valur segist sjálfur ánægður með að halda áfram starfi sínu hjá félaginu: „Ég er mjög glaður með að gera nýjan samning sem yfirþjálfari. Ég hlakka til að halda áfram að efla unga og efnilega leikmenn félagsins,“ segir Gunnar.
Aðrar fréttir af deildinni
Aðalsteinn Örn framlengir við Fjölni
Aðalsteinn Örn framlengir við Fjölni
Handknattleiksmaðurinn Aðalsteinn Örn Aðalsteinsson hefur framlengt samning sinn við meistaraflokk karla hjá Fjölni til næstu tveggja ára.
Aðalsteinn hefur verið einn af lykilmönnum liðsin og átti frábært síðasta tímabil þar sem hann var valinn handboltamaður ársins hjá Fjölni árið 2025. Aðalsteinn, sem er uppalinn Fjölnismaður, kom aftur til Fjölnis sumarið 2024 eftir tveggja ára veru hjá Stjörnunni og hefur síðan verið einn af máttarstólpum liðsins bæði innan vallar sem utan. Á liðinni leiktíð vakti hann mikla athygli fyrir frammistöðu sína í Grill 66 deildinni þar sem hann varð markakóngur deildarinnar. Samhliða því hefur hann einnig lagt sitt af mörkum til félagsins með því að þjálfa yngri flokka við mjög góðan orðstír.
Meistaraflokksráð karla fagnar því að Aðalsteinn hafi ákveðið að halda áfram með liðinu. „Alli er einn af máttarstólpum liðsins og hefur sýnt það bæði á æfingum og í leik að hann býr yfir þeim gæðum og karakter sem þarf til að leiða liðið áfram. Við erum afar ánægðir með að hann haldi áfram í Fjölni og hlökkum til komandi tímabils,“ segja Sveinn Þorgeirsson og Daníel Rúnarsson fyrir hönd meistaraflokksráðs karla.
Aðalsteinn segist sjálfur spenntur fyrir framhaldinu hjá félaginu: „Ég er einstaklega stoltur að halda áfram að vera partur af þeirri vegferð og uppbyggingu sem er að eiga sér stað í Fjölni,“ segir Aðalsteinn.
Markmið liðsins er skýrt fyrir komandi tímabil þar sem stefnan er sett á að berjast um sæti í efstu deild. Með áframhaldandi framlagi Aðalsteins styrkist liðið enn frekar í þeirri vegferð.
Aðrar fréttir af deildinni
Aðalfundur Fjölnis
Aðalfundur Fjölnis
Aðalfundur Fjölnis verður haldinn 28 apríl n.k. í félagsaðstöðu félagsins í Egilshöll og hefst kl. 17.30.
Dagskrá er samkvæmt lögum félagsins:
a) Skýrsla stjórnar
b) Reikningar félagsins
c) Lagabreytingar
d) Kjör formanns
e) Kjör stjórnarmanna
f) Kjör skoðunarmanna reikninga
g) Ákvörðun félagsgjalda
h) Önnur mál
Kosningar:
a) kosning formanns til eins árs,
b) kosning þriggja meðstjórnenda til tveggja ára,
c) kosning tveggja manna í varastjórn til eins árs.
Tilkynningar um framboð skulu berast skrifstofu félagsins á netfangið gudmundur@fjolnir.is minnst 5 dögum fyrir boðaðan aðalfund.
Lagabreytingar:
Tillögur til breytinga á lögum félagsins, undirritaðar af flutningsmönnum, skulu berast skrifstofu félagsins á netfangið gudmundur@fjolnir.is minnst 5 dögum fyrir boðaðan aðalfund.
Sumarstörf Fjölnis 2026 fyrir 15-16 ára
Sumarstörf Fjölnis 2026 fyrir 15-16 ára
Sumarstörf Fjölnis 2026 fyrir 15-16 ára
Sumarstörf Fjölnis 2026 fyrir 15-16 ára – áhugasviðskönnun
Búið er að opna fyrir umsóknir fyrir vinnuskólann sumarið 2026
Skref 1 – Sækja um hjá vinnuskólanum
- https://reykjavik.is/vinnuskolinn/ Munið að merkja við að þið óskið eftir að vinna hjá Ungmennafélaginu Fjölni.
Skref 2 – Fylla út áhugasviðskönnun fyrir Fjölni
Athugið að þessi könnun er áhugasviðskönnun og er í rauninni ekki umsókn um vinnu en viðauki fyrir okkur til þess að vinna með.
Öllum umsóknum verður svarað.
Við bjóðum upp á fjölbreytt störf fyrir 15-16 ára. Í boði er að vinna á sumarnámskeiðum deilda, fjölgreinanámskeiði félagsins og leikjanámskeiði.
- Fyrir umsækjendur á aldrinum 15-16 ára (2011-2010)
- Umsækjendur þurfa að vera með lögheimili í Reykjavík.
Umsækjendur geta hakað við það starf sem þeir óska eftir, það er í boði að velja fleiri en eitt starf, t.d. að starfa á knattspyrnu- og listskautanámskeiðum.
Vinnutímabil fyrir 15-16 ára fer eftir nánara samkomulagi þegar ráðning liggur fyrir. Laun eru greidd út samkvæmt kjarasamningum Reykjavíkurborgar.
Allar nánari upplýsingar veitir skrifstofa Fjölnis á sumarnamskeid@fjolnir.is.
Umsóknarfrestur er til 26. apríl!
Athugið að það er frekar mikilvægt að umsækendur geti verið að mestu við vinnu á tímabilinu 8. júní – 10. júlí og 10. – 15. ágúst
Drög að dagskrá sumarsins :
- 15. – 12. júní – Sumarnámskeið deilda í Egilshöll
- 22. – 26. júní – Sumarnámskeið deilda í Egilshöll
- 29. júní – 3. júlí – Leikjanámskeið í Dalhúsum
- 6. – 10. júlí – Leikjanámskeið í Dalhúsum
- 10. – 14. ágúst – Sumarnámskeið Deilda og Fjölgreinanámskeið Egilshöll
Þór Guðmundsson ráðinn aðalþjálfari meistaraflokks kvenna í handknattleik
Þór Guðmundsson ráðinn aðalþjálfari meistaraflokks kvenna í handknattleik
Handknattleiksþjálfarinn Þór Guðmundsson hefur samið við Fjölni um að taka við starfi aðalþjálfara meistaraflokks kvenna næstu tvö árin. Samhliða því mun Þór einnig stýra 3. flokki kvenna hjá félaginu.
Þór kemur til Fjölnis með víðtæka reynslu úr þjálfun kvennahandbolta. Hann hefur áður þjálfað meistaraflokk og 3. flokk kvenna hjá Víkingi, auk þess að hafa verið aðstoðarþjálfari meistaraflokks kvenna hjá Aftureldingu þar sem hann þjálfaði einnig 3. flokk félagsins. Þjálfaraferill hans hófst hjá Fram þar sem hann starfaði ýmsa yngri flokka.
Eftir tveggja ára hlé frá þjálfun vegna stækkandi fjölskyldu er Þór nú tilbúinn að snúa aftur á hliðarlínuna. „Fjölnir er spennandi félag sem hefur staðið sig vel í uppbyggingu undanfarin ár. Eftir að hafa tekið tvö ár í pásu frá þjálfun vegna stækkandi fjölskyldu var það ekki erfið ákvörðun að segja já við þessu verkefni,“ segir Þór. „Það er mikill heiður að fá að vinna með ungum, efnilegum og metnaðarfullum hópi og ég hlakka til að gera mitt besta til að stuðla að áframhaldandi árangri og uppbyggingu.“
Meistaraflokksráð kvenna hjá Fjölni segist afar ánægt með ráðninguna. „Þekking og reynsla Þórs mun styrkja starf liðsins og tryggja áframhaldandi uppbyggingu. Við hlökkum til samstarfsins og þeirra jákvæðu áhrifa sem hann mun hafa á liðið,“ segir í yfirlýsingu ráðsins.
Að lokum vill meistaraflokksráð kvenna þakka Gunnari Val fyrir gríðarlega gott og óeigingjarnt starf fyrir meistaraflokkinn í gegnum árin og óskar honum velfarnaðar í öðrum spennandi verkefnum fyrir deildina.
