Fréttabréf listskautadeildar
Paraskautun á EM
Júlía Sylvía og Manuel tóku þátt fyrir Íslands hönd á Evrópumóti sem fór fram í Tallin 28. janúar til 2. febrúar. Með þátttökunni voru þau fyrsta skautaparið til að keppa fyrir hönd Íslands á Evrópumóti í listskautum. Enduðu þau í 18. sæti með 48,58 stig í stutta prógramminu sínu og komust því miður ekki áfram en 16 efstu komust áfram til að taka frjálsa prógrammið. Þrátt fyrir að hafa ekki komist áfram mega þau vera stolt af frammistöðu sinni og fengu þau dýrmæta reynslu fyrir framhaldið.
Skautahlaup og Samhæfður skautadans/Synchro
Í lok janúar byrjuðu námskeið hjá Fjölni bæði í samhæfðum skautadans og einnig í skautahlaupi. Voru námskeiðin til lok febrúar og verður það endurtekið núna eftir páska og verður námskeiðin frá 23.apríl og út maí. Skráning er hafin inn á XPS
Norðurlandamót 2025
5. – 9. febrúar fór fram Norðulandamót sem var haldið í Asker í Noregi. Tveir keppendur frá Fjölni, Arna Dís og Elín Katla, fóru fyrir hönd Íslands. Góð reynsla fyrir þessa skautara og náði Elín þeim árangri að fá hæstu heildarstig sem íslenskur skautari hefur fengið í Advanced Novice flokki á Norðurlandamóti. Nánar er hægt að lesa um mótið hér: Norðurlandamót 2025 – Ungmennafélagið Fjölnir – fjolnir.is
Vormót ÍSS og Bikarmeistarar
Helgina 28. febrúar til 2. mars fór fram Vormót ÍSS á Akureyri. Fóru 24 keppendur frá Fjölni sem tóku þátt. Bendum á færsluna um mótið hér: Fjölnir Bikarmeistarar í listskautum! – Ungmennafélagið Fjölnir – fjolnir.is
Stóðu allir keppendur Fjölnis sig með príði og voru félaginu til fyrirmyndar að öllu leiti. Viljum við nýta tækifærið og þakka þeim sjálfboðaliðum sem hjálpuðu til á Akureyri í þessari ferð.
Með þeim árangri sem okkar skautarar náðu á þessu móti sem og fyrri mótum náði félagið þeim glæsilega árangri að tryggja sér bikarmeistaratitilinn árið 2025. Var þetta þriðja árið í röð sem Fjölnir verður bikarmeistari í listskautum!
Öskudagsball
Á öskudaginn héldum við öskudagsball á skautasvellinu og var góð og skemmtileg stemming sem skapaðist þar. Þökkum öllum sem gerðu sér leið á ballið og gerðu þetta að þeirri skemmtun sem þetta var.
Sonja Henie Trophy 2025
Sonja Henie Trophy fór fram í Osló dagana 6.mars – 9.mars og átti Fjölnir keppendur á mótinu. Ermenga Sunna tók þátt í Basic Novice Girls á meðan að Arna Dís og Elín Katla tóku þátt í Advanced Novice Women.
Ermenga hóf keppni af okkar keppendum og með sínu prógrammi fékk hún 30,51 stig sem skilaði henni 14.sæti af 47 keppendum.
Í stutta prógramminu fékk Elín Katla 33,70 stig sem skilaði henni 5.sæti eftir fyrri daginn. Arna Dís fékk 25,28 stig fyrir sitt stutta prógram og var hún í 19. sæti að loknum fyrsta degi.
Á seinni keppnisdeginum var frjálsa prógrammið á dagskrá og fékk Arna Dís 53,86 stig fyrir það. Skilað það henni upp um tvö sæti eða í 17. sætið með 79,14 heildarstig.
Elín Katla fékk 64,91 stig fyrir sitt frjálsa prógramm og endaði hún því með heildarstig upp á 98,61 stig og endaði hún í 5. sæti með þeim stigafjölda.
Frábært árangur og reynsla fyrir báða keppendur og stóðu þær sig með prýði.
Mannabreytingar í stjórn og starfskrafti
Þann 6. mars var haldinn aðalfundur listskautadeildar. Á þeim fundi urðu breytingar á stjórn deildarinnar. Nýir meðlimir í stjórn eru Fanndís Ýr Brynjarsdóttir og Evelina Kreislere. Við þökkum fráfarandi stjórnar meðlimum kærlega fyrir sitt framlag í stjórnarstarfinu seinasta árið!
Einnig er breyting hjá starfsmönnum deildarinnar en Leifur sem hefur starfað sem skautastjóri síðan í ágúst 2023 mun færa sig um set innan Fjölnis og því ekki starfa lengur sem skautastjóri fyrir deildina. Seinasta árið hefur hann sinnt stöðu íþróttastjóra Fjölnis meðfram skautastjóra stöðunni en mun hann alfarið færa sig yfir á skrifstofu félagsins þar sem hann mun þó auðvitað ennþá vera innan handar fyrir listskautadeildina eins og aðrar deildir félagsins ef eitthvað er. Hægt er að senda tölvupóst á skautastjori@fjolnir.is eða listskautar@fjolnir.is ef hafa þarf samband vegna einhverra mála er við kemur listskautadeildinni.
Framundan
Næsta laugardag, 5.apríl, mun Kristalsmótið vera haldið af okkur í Fjölni á skautasvellinu í Egilshöll. Og af þeim sökum verða ekki æfingar en við hvetjum alla til að mæta og fylgjast með mótinu. Upplýsingar um dagskrá er hægt að finna á hér á heimasíðu Fjölnis: Kristalsmót 2025 – Dagskrá og keppnisröð – Ungmennafélagið Fjölnir – fjolnir.is
Fjölskyldudagur skautaskóla er svo á dagskrá 12.apríl og eiga upplýsingar um það að koma þegar nær dregur.
Nú er að koma mikið af rauðum dögum í tengslum við t.d. páskana og minnum við því á að á rauðum dögum er heilt yfir frí á æfingum nema annað sé tekið fram.
Grunnpróf fer einnig fram í apríl og verða upplýsingar sendar með það til þeirra sem eiga að skoða það, en einnig er hægt að ræða við þjálfara um það mál ef þið hafið einhverjar spurningar.
Stefnt er að halda vorsýninguna árlegu þann 31.maí en frekari upplýsingar um það munu koma þegar nær dregur.
Aðalfundur Ungmennafélagsins Fjölnis
Aðalfundur Fjölnis fer fram þriðjudaginn 8. apríl kl. 17:00. Fundurinn verður í Miðjunni, félagsaðstöðu Fjölnis í Egilshöll.
Framboð til stjórnar þarf að berast til gudmundur@fjolnir.is eigi síðar en 3. apríl.
Tillögur til breytinga á lögum félagsins, undirritaðar af flutningsmönnum, skulu sendar aðalstjórn félagsins eigi síðar en 3. apríl.
Tillögur að lagabreytingum munu liggja frammi á skrifstofu félagsins viku fyrir aðalfund.
Dagskrá aðalfundar verður:
a) Skýrsla stjórnar
b) Reikningar félagsins
c) Lagabreytingar
d) Kjör formanns
e) Kjör stjórnarmanna
f) Kjör skoðunarmanna reikninga
g) Önnur mál
8. grein
Stjórn félagsins er skipuð sjö mönnum og allt að tveimur til vara. Kosning til stjórnar skal fara þannig fram:
a) kosning formanns til eins árs,
b) kosning sex meðstjórnenda til tveggja ára, þannig að þrír eru kosnir á hverju ári,
c) kosning tveggja manna í varastjórn til eins árs.
Varamenn taka sæti í stjórn ef aðalmaður forfallast í sömu röð og þeir eru kosnir. Bjóði meðstjórnandi sig fram til formanns áður en kjörtímabili hans líkur, tekur varamaður sæti í stjórn fram að næsta aðalfundi.
Allir félagsmenn félagsins sem eru fjárráða geta boðið sig fram til formanns. Formaður félagsins getur ekki samtímis verið formaður deildar. Tilkynningar um framboð til formanns og meðstjórnenda félagsins skulu berast framkvæmdarstjóra félagsins minnst 5 dögum fyrir boðaðan aðalfund.
Formaður er kosinn beinni kosningu á aðalfundi, en að öðru leyti skiptir stjórnin sjálf með sér verkum. Stjórn fer með umboð og vald aðalfundar á milli aðalfunda án heimildar til lagabreytinga.
Á aðalfundi skulu einnig kosnir tveir skoðunarmenn reikninga en í þeirra stað má kjósa einn löggiltan endurskoðanda.
Lög Fjölnis má finna hér:
https://fjolnir.is/felagid-okkar/log-felagsins/
Fimleikaæfingar falla niður útaf mótahaldi
Um helgina erum við að halda Bikarmót í hópfimleikum og áhaldafimleikum.
Í dag ,fimmtudag, kl 18:30 hefst uppsetning fyrir mótið.
Allar æfingar falla því niður frá 18:30 í dag og engar æfingar verða fram yfir helgi.
Vonandi komast skilaboðin til allra.
Á mánudaginn verður venjuleg dagskrá.
Fjölnir er Íslandsmeistari í íshokkí kvenna annað árið í röð! 🏆
Fjölnir er Íslandsmeistari í íshokkí kvenna annað árið í röð! 🏆
Leikur 4 – Skautafélag Akureyrar vs. Fjölnir, þriðjudagur 19. mars kl. 19:30
Lokastaða: Fjölnir 2 – 1 Skautafélag Akureyrar
Fjölnir tryggði sér í gærkvöldi Íslandsmeistaratitilinn í íshokkí kvenna annað árið í röð með frábærum 2-1 sigri á Skautafélagi Akureyrar á útivelli. Liðið vann úrslitaeinvígið 3-1 og fagnaði innilega eftir erfiða og spennandi rimmu.
Frá upphafi var ljóst að SA ætlaði sér sigur og settu þær mikla pressu á vörn Fjölnis. Sóknaraðgerðir heimaliðsins voru beittar, en Fjölnir sýndi styrk sinn í varnarleiknum. Hvort sem það voru skot sem leikmenn blokkuðu eða stórkostlegar markvörslur Karítasar Halldórsdóttur, tókst Fjölni að halda markinu hreinu í fyrsta leikhluta.
Þrátt fyrir yfirburði SA í upphafi var það Fjölnir sem náði að opna leikinn á 18. mínútu. Hilma Bergsdóttir vann pökkinn af varnarmanni SA og skoraði án stoðsendingar, nokkuð gegn gangi leiksins. Fjölnir fór því með 1-0 forystu inn í fyrsta leikhlé.
Í öðrum leikhluta jafnaðist leikurinn nokkuð og bæði lið fengu góð færi. Á 37. mínútu jók Fjölnir forskot sitt þegar Flosrún Vaka Jóhannesdóttir skoraði eftir mikið kapphlaup fyrir framan mark SA. Laura Ann Murphy og Elín Darkoh lögðu upp markið og Fjölnir var komið í vænlega stöðu, 2-0.
Þriðji leikhluti hófst með mikilli ákefð frá SA, og sex mínútum inn í lotuna tókst Önnu Sonju Ágústsdóttur að koma heimaliðinu inn í leikinn með marki. SA setti allt í sölurnar í lokin og sótti af krafti, en Fjölnir hélt út með sterkan varnarleik og kláraði leikinn með 2-1 sigri.
Með þessum sigri vann Fjölnir úrslitaeinvígið 3-1 og fagnaði Íslandsmeistaratitlinum annað árið í röð. Frábær liðsheild, skipulagður varnarleikur og öflug frammistaða í lykilaugnablikum tryggðu titilinn.
Skot á mark í leik #4
Fjölnir: 25
SA: 21
Ungmennafélagið Fjölnir óskar ykkur innilega til hamingju með vel verðskuldaðan titil! Þið eruð snillingar!! 💕
Sumarstörf Fjölnis fyrir 17-25 ára
Við höfum opnað fyrir umsóknir í sumarstörf Fjölnis 2025 fyrir 17-25 ára!
Við bjóðum upp á fjölbreytt störf fyrir 17-25 ára. Í boði er að vinna á íþróttasvæðinu í Dalhúsum, á sumarnámskeiðum deilda ásamt fjölgreinanámskeiði félagsins. Umsækjendur geta hakað við það starf sem þeir óska eftir, það er í boði að velja fleiri en eitt starf, t.d. að starfa á knattspyrnu- og listskautanámskeiðum.
Vinnutímabil fyrir 17-25 ára fer eftir nánara samkomulagi þegar ráðning liggur fyrir.
Sækja þarf um hér: https://forms.office.com/e/xQW1FM2gv5
Umsækjendur þurfa einnig að sækja um hjá Hinu Húsinu hér: https://jobs.50skills.com/reykjavik/is/34337
Laun eru greidd út samkvæmt kjarasamningum Reykjavíkurborgar.
Allar nánari upplýsingar veitir skrifstofa Fjölnis á sumarnamskeid@fjolnir.is.
Umsóknarfrestur er til 18. apríl
Öllum umsóknum verður svarað.
*Umsóknir fyrir sumarstörf fyrir unglinga hjá Vinnuskólanum opna á næstu dögum!
#FélagiðOkkar
Frábær frammistaða í fyrsta leik úrslitakeppninnar
MFL Kvenna með sannfærandi sigur í fyrsta úrslitaleiknum
Meistaraflokkur kvenna í íshokkí spilaði sinn fyrsta leik í á þriðjudaginn í Egilshöll gegn Skautafélagi Akureyrar í úrslitum um Íslandsmeistaratitilinn. Úrslitin ráðast í einvígi þar sem fyrsta liðið til að vinna þrjá leiki sigrar titilinn.
Liðið tryggði sér öruggan 5-0 sigur í þessum fyrsta leik úrslitakeppninnar gegn SA.
Lykilmenn og frammistaða:
- Fyrsta sóknarlínan var áberandi í sóknarleiknum og kom við sögu í öllum fimm mörkum liðsins.
- Framherjinn Berglind Leifsdóttir átti frábæran leik og lagði sitt af mörkum í öllum mörkunum með 2 mörk og 3 stoðsendingar.
- Markvörðurinn Karitas Sif Halldórsdóttir hélt hreinu með yfirvegaðri og traustri frammistöðu í markinu.
Liðsframmistaða: Liðið spilaði skipulagðan varnarleik og stjórnaði svæðinu fyrir framan markið vel. Þessi agi í vörninni gerði liðinu kleift að snúa hratt í sókn, skapa góðar sendingaleiðir og veita sterkari stuðning í sóknaraðgerðum. Ákvarðanataka var góð allan leikinn, sem skilaði sér í árangursríkri spilamennsku á öllum svæðum íssins.
Skot á mark:
Fjölnir: 23
SA: 12
Frábær byrjun á úrslitaeinvíginu og nú er markmiðið að viðhalda þessum gæðum í næsta leik.
Næstu leikir:
- Úrslit #2 í Akureyri á fimmtudag kl. 19:30
- Úrslit #3 í Egilshöll á laugardag kl. 17:00
- Möguleg úrslit #4 í Akureyri á þriðjudag í næstu viku kl. 19:30
- Möguleg úrslit #5 í Egilshöll á fimmtudag í næstu viku kl. 19:45
Ofurhetjumót Gróttu
Ofurhetjumót Gróttu
Ofurhetjumót Gróttu fór fram um helgina.
Tólf strákar frá fimleikadeild Fjölnis tóku þátt á mótinu og stóðu þeir sig með glæsibrag.
Til hamingju strákar og þjálfarar – Framtíðin er björt 🙂
Fjölnir Bikarmeistarar í listskautum!
Fjölnir deildarmeistari í Toppdeild kvenna
Kvennalið Fjölnis deildarmeistari í Toppdeild kvenna
Um nýliðna helgi tryggði kvennalið Fjölnis sér deildarmeistaratitilinn í Toppdeild kvenna með 1-0 sigri á kvennaliði Skautafélags Akureyrar. Með þessum sigri komst Fjölnir í 31 stig og gerði þar með út um möguleika SA á að ná toppsætinu.
SA hefði þurft að sigra Fjölni um helgina og einnig vinna Skautafélag Reykjavíkur í síðasta leik deildarkeppninnar til að eiga möguleika á efsta sætinu. Með sigrinum tryggðu Fjölnis-konur sér einnig heimaleikjarétt í úrslitakeppni Toppdeildar kvenna.
Úrslitakeppni kvenna hefst 11. mars næstkomandi, og ljóst er að Fjölnir fer inn í keppnina með mikinn kraft og sjálfstraust eftir glæsilega deildarkeppni.
Fjölnir óskar leikmönnum, þjálfurum og öllum sem komu að liðinu innilega til hamingju með árangurinn!
Iceland Classic
Fimmtudaginn 27. febrúar hófst keppni í Iceland Classic. Mótið er orðið stórt í sniðum og um 700 keppendur komnir til þess að taka þátt á mótinu. Gerpla er mótshaldari þessa móts ár hvert og eiga þau mikið hrós skilið fyrir skemmtilega uppsetningu og gott utanumhald.
Í mótagjöldum er innifalinn fimleikabolur sem allir þáttakendur fá í hendurnar fyrir mót og setur það skemmtilegan svip á mótið
Fjölnir átti 69 þáttakendur á þessu móti og áttum við keppendur í öllum þrepum.
Okkar keppendur stóðu sig glæsilega og fjölmargir sem fóru heim með medalíur fyrir árangur á mótinu.
Frábært íþróttafólk og fyrirmyndir sem við eigum í Fjölni
