Knattspyrna

Knattspyrnudeild Fjölnis hefur gengið frá samningi við Helga Snæ Agnarsson sem gengur til liðs við félagið fyrir komandi keppnistímabil.

Helgi Snær, sem fæddur er árið 1999, er fjölhæfur leikmaður sem getur leyst margar stöður á vellinum. Hann kemur til félagsins frá KFG en á jafnframt að baki fyrri sögu hjá Fjölni. Helgi Snær hefur leikið alls 45 leiki í 1. deild með Fjölni, Þrótti Vogum og Magna. Þá á hann einnig um 45 leiki í 2. deild með ÍR og KFG.

Til gamans má geta þess að Helgi Snær var bikarmeistari með 2. flokki Fjölnis árið 2018, Íslandsmeistari í innanhússknattspyrnu árið 2019 og 4. deildarmeistari með Vængjum Júpíter árið 2023.

Aðspurður um félagsskiptin er tilhlökkun fyrir komandi sumri hjá Helga Snæ: „Ég er spenntur fyrir sumrinu í Grafarvoginu, það er frábært að vera kominn aftur í góða aðstöðu, samheldinn leikmannahóp og félag með skýr markmið. Ég mun leggja allt mitt að mörkum til að koma félaginu aftur í næstefstu deild og verkefninu er ekki lokið þar, því félagið á mikið inni. Grafarvogurinn verður gulur og glaður í sumar“.

Fjölnir býður Helga Snæ velkominn aftur til félagsins og hlakkar til samstarfsins á komandi tímabili. Áfram Fjölnir!

Knattspyrnudeild Fjölnis hefur framlengt samning sinn við miðjumanninn Mörtu Björgvinsdóttir til næstu tveggja ára. Marta, sem er 22 ára, er uppalin Fjölniskona og hefur leikið 108 leiki fyrir félagið og skorað í þeim 11 mörk.

Marta sneri aftur til Fjölnis á síðasta ári eftir stutta dvöl hjá Álftanesi og varð fljótt mikilvægur hlekkur í liðinu. Á síðasta tímabili lék hún leik númer 100 fyrir félagið í útileik gegn Sindra, þar sem hún kryddaði tímamótin með marki.

Vesko þjálfari liðsins hafði þetta um framlenginguna að segja: „Það eru afar góðar fréttir fyrir okkur að Marta hafi skrifað undir nýjan samning. Hún er frábær leikmaður sem þekkir vel þau gildi sem félagið stendur fyrir og er tilbúin að leggja sig fram fyrir þau. Marta er sífellt að bæta sig og gefur okkur meiri stöðugleika á miðsvæðinu. Þrátt fyrir ungan aldur hefur hún þegar mikla reynslu af meistaraflokksfótbolta og við erum sannfærð um að hún muni spila lykilhlutverk í áframhaldandi uppbyggingu liðsins.“

Knattspyrnudeild Fjölnis hefur gengið frá samningi við varnarmanninn Patryk Hryniewicki sem gengur til liðs við félagið fyrir komandi keppnistímabil.

Patryk er fæddur árið 2000 og leikur sem hafsent. Hann er uppalinn hjá Leikni í Reykjavík þar sem hann hefur leikið 45 leiki í meistaraflokki og skorað 2 mörk.

Um er að ræða öflugan og hávaxinn varnarmann sem bætir styrk og festu í varnarleik liðsins. Stjórn og þjálfarateymi Fjölnis telja Patryk vera mikilvæga viðbót við leikmannahóp félagsins fyrir verkefnin fram undan. Aðspurður um félagaskiptin er Patryk ánægður með að vera kominn í Fjölni: „Ég er mjög spenntur að koma til Fjölnis. Mér finnst klúbburinn frábær og strákarnir geggjaðir. Ég hlakka til að gefa allt í þetta“.

Fjölnir býður Patryk velkominn til félagsins og hlakkar til samstarfsins á komandi tímabili. Áfram Fjölnir!

Knattspyrnudeild Fjölnis hefur framlengt samning sinn við varnarmanninn Birgi Þór Jóhannsson til næstu þriggja ára.

Birgir Þór, sem er fæddur árið 2007, er hraður og leikinn varnarmaður sem hefur staðið sig afar vel með liðinu á undirbúningstímabilinu í vetur. Frammistaða hans hefur vakið athygli innan félagsins og þykir ljóst að hann er einn af efnilegri leikmönnum liðsins.

Með samningnum tryggir Fjölnir sér áframhaldandi uppbyggingu á ungum og metnaðarfullum leikmanni sem félagið bindur miklar vonir við á komandi árum.

Samningsframlengingin er liður í þeirri stefnu Fjölnis að byggja sterkan kjarna fyrir framtíðina.

Gauti Þór Gíslason hefur verið valinn á úrtaksæfingar U15 landsliðsins í knattspyrnu. Æfingar fara fram dagana 9-11 febrúar inni í Miðgarði, en þjálfari U15 landsliðs Íslands er Ómar Ingi Guðmundsson.

Við hjá Fjölni óskum honum góðs gengis á æfingunum. Til hamingju með valið Gauti!

Arrate Juste Vidaurrazaga hefur skrifað undir samning við Fjölni fyrir keppnistímabilið 2026. Hin 27 ára gamla Arrate er spænska markvörður og kemur til félagsins frá Extremadura CD. Arrate er uppalin í unglingastarfi Athletic Bilbao, sem er þekkt fyrir að ala af sér markverði í hæsta gæðaflokki. Hún er reynslumikill markvörður og mun jafnframt leggja sitt af mörkum til að efla og þróa unga markverði félagsins.

Vesko, þjálfari meistaraflokks kvenna er mjög ánægður með nýjasta leikmann liðsins. „Við erum afar ánægð með að fá Arrate til liðs við okkur. Hún er reynslumikill markvörður sem eykur breiddina í þessari stöðu. Við höfum fylgst með henni undanfarið og teljum hana passa mjög vel inn í okkar leikstíl. Hún er róleg undir pressu, með góða sendingagetu bæði stuttar og langar sendingar, og les leikinn afar vel. Við erum með metnaðarfull markmið og teljum Arrate vera mjög mikilvægan hluta af púslinu fyrir næsta tímabil.“

Velkominn Arrate, áfram Fjölnir!

Harpa Sól Sigurðardóttir hefur framlengt samning sinn við Fjölni til ársins 2027.

Harpa er 21 árs miðjumaður, uppalin Fjölniskona, sem sneri aftur til félagsins árið 2023 eftir þriggja ára veru frá félaginu.

Harpa hefur leikið 57 leiki fyrir meistaraflokk Fjölnis og skorað í þeim 13 mörk. Á síðasta tímabili staðfesti hún sig sem lykilleikmann í liðinu með stöðugri og kraftmikilli frammistöðu, sem endurspeglast í nýjum samningi hennar.

Vesko, þjálfari liðsins er afar ánægður með framlenginguna:
„Ég er virkilega ánægður með að Harpa hafi skrifað undir nýjan samning. Hún er mikilvægur leikmaður fyrir liðið, kemur með mikla orku og jákvæðni inn í hópinn. Harpa er spennandi ungur leikmaður og ég hlakka til að sjá hana halda áfram að þróast og leggja sitt af mörkum við að ná markmiðum okkar.“

Framlenging samningsins er mikilvægt skref í áframhaldandi uppbyggingu liðsins og staðfestir traust félagsins á Hörpu til framtíðar.

Oskar Wasilewski hefur samið við Fjölni til næstu tveggja ára.

Oskar, sem er 24 ára, kemur til liðsins frá Kára á Akranesi þar sem hann lék 18 leiki í 2. deild síðasta sumar. Auk þess hefur hann spilað í meistaraflokki með Aftureldingu og Selfossi, en hann er uppalinn hjá ÍA.

Oskar er fjölhæfur leikmaður sem kemur með dýrmæta reynslu inn í lið Fjölnis. Við hlökkum til að sjá hann í gulu í sumar.

Velkominn Oskar, áfram Fjölnir!

Einar Örn Harðarson hefur framlengt samning sinn við Fjölni til næstu tveggja ára.

Einar Örn gekk til liðs við Fjölnis í fyrra og spilaði 17 leiki með liðinu í Lengjudeildinni. Einar Örn kom til liðsins frá Þrótti Vogum, en var þetta annað sinn sem hann gekk til liðsins en hann spilaði einnig fyrir Fjölni árið 2019.

Það er mjög ánægjulegt að Einar Örn hafi framlengt samning sinn við Fjölni og taki slaginn í 2.deild með liðinu næsta sumar. Aðspurður um málið, hafði Gunnar Már Guðmundsson, þjálfari meistaraflokks karla, þetta að segja: „Það er virkilega ánægjulegt að Einar Örn hafi skrifað undir nýjan samning, en hann er einn af leiðtogum liðsins. Hann kemur inn með áræðni, reynslu og mikla yfirvegun í liðið, sem á eftir að nýtast okkur vel á komandi tímabili“.

Það verður gaman að sjá Einar Örn í Fjölnistreyjunni á komandi tímabil, áfram Fjölnir!