Lokahelgi Íslandsmóts U14 í íshokkí fór fram um þarsíðustu helgi þar sem lið Fjölnis, Björninn AAA og Ísbjörninn AA, luku keppnistímabilinu með glæsilegum árangri. Bæði lið enduðu mótið í 2. sæti og tryggðu sér silfurverðlaun eftir frammistöðu sem liðunum og íshokkídeild Fjölnis má vera afar stolt af.

Liðin hafa tekið miklum framförum yfir tímabilið og það hefur verið gaman að fylgjast með leikmönnum vaxa og dafna bæði sem einstaklingar og liðsheild. Í lokaumferðunum mættu þau sterkum andstæðingum og mörgum krefjandi leikjum, en sýndu á sama tíma mikla seiglu, baráttuanda og aukna færni þegar mest á reyndi.

Árangurinn er frábær uppskera eftir veturinn og sýnir vel það öfluga starf sem unnið er innan íshokkídeildar Fjölnis.

Við óskum öllum leikmönnum, þjálfurum og aðstandendum innilega til hamingju með silfurverðlaunin og glæsilegt tímabil. Íshokkíframtíðin hjá Fjölni er sannarlega björt.