Handknattleiksdeild Fjölnis og Next Level Gaming hafa skrifað undir samstarfssamning sem gildir til loka ágúst 2028. Með samningnum verður Next Level Gaming einn af aðalstyrktaraðilum handknattleiksdeildarinnar og styður þannig við áframhaldandi uppbyggingu deildarinnar á komandi árum.

Þrátt fyrir að þetta sé fyrsti formlegi samstarfssamningur aðila hefur Next Level Gaming stutt vel við starf Fjölnis allt frá stofnun fyrirtækisins og verið öflugur bakhjarl félagsins. Með undirritun samningsins er það góða samband nú formfest og samstarfið tekið á næsta stig.

Samningurinn felur meðal annars í sér aukinn stuðning við starf handknattleiksdeildarinnar, auk sýnileika á keppnisbúningum, auglýsingaskiltum í Egilshöll, leikskrám og öðru kynningarefni deildarinnar. Þá munu aðilar einnig vinna saman að fjölbreyttum viðburðum og verkefnum, meðal annars tengdum yngri flokkum, leikdögum og stuðningsmannastarfi deildarinnar.

Samhliða samninginum fá allir meðlimir 112unnar fá 30% afslátt af öllum spilatímum á PC, Playstation 5 og Nintendo gegn framvísun skírteinis.

Gunnar Valur Arason, yfirþjálfari handknattleiksdeildar Fjölnis, fagnar samstarfinu: „Next Level Gaming hefur staðið með okkur undanfarin ár og verið okkur dýrmætur samstarfsaðili. Það gleður okkur því sérstaklega að tilkynna að við höfum nú sameinað krafta okkar enn frekar og að þau hafi ákveðið að styrkja deildina. Frá upphafi hefur Next Level Gaming lagt ríka áherslu á samfélagslega ábyrgð og trúir á mikilvægi þess að styðja við verkefni sem hafa jákvæð áhrif á samfélagið. Við erum afar þakklát fyrir traustið og stuðninginn og hlökkum til að byggja áfram upp öflugt og farsælt samstarf á komandi misserum. Við hvetjum jafnframt alla til að kíkja í Next Level Gaming þar sem allir geta fundið sér skemmtun við sitt hæfi.“

Þórir Viðarsson, eigandi Next Level Gaming, segir samstarfið mikilvægt fyrir fyrirtækið: Við hjá Next Level Gaming erum stolt af því að styðja við Fjölni og það öfluga starf sem unnið er innan félagsins. Okkur finnst mikilvægt að fyrirtæki í nærumhverfinu leggi sitt af mörkum til íþróttastarfsins, enda skilar það sér beint inn í samfélagið og hjálpar Grafarvogi að blómstra. Við höfum fulla trú á því sem fram undan er hjá handknattleiksdeildinni og hlökkum til að fylgjast með liðunum berjast fyrir því markmiði að komast upp í efstu deild.“

Handknattleiksdeild Fjölnis fagnar því að hafa formfest samstarfið við Next Level Gaming og hlakkar til áframhaldandi samstarfs á komandi árum. Samningurinn styrkir enn frekar uppbyggingu deildarinnar og skapar aukin tækifæri til að efla starfsemi hennar, leikdagsupplifun og umgjörð fyrir iðkendur, þjálfara, sjálfboðaliða og stuðningsfólk.