Arna Guðnadóttir

Verkefnastjóri óskast

#FélagiðOkkar

by Arna Guðnadóttir

Jón Karl Ólafsson er þriðji heiðursforseti Fjölnis

Aðalfundur félagsins var haldinn þriðjudaginn 8. apríl 2025 í Miðjunni í Egilshöll. Þar kom saman fjölmennur hópur félagsmanna. Á fundinum var tilkynntur þriðji heiðursforseti Fjölnis.

Í reglugerð um veitingu viðurkenninga segir um heiðursforseta: „Heiðursforseti félagsins er æðsta viðurkenning félagsins, sem veita má þeim einstaklingum, sem sinnt hafa formennsku í aðalstjórn félagsins í a.m.k. sjö ár, eða þeim einstaklingum sem þykja hafa unnið sérstaklega vel í málefnum félagsins um árabil. Tilnefningar um heiðursforseta þurfa að hafa stuðning a.m.k. 5 einstaklinga frá aðalstjórn og hið minnsta frá 3 deildum félagsins. Tilnefningar skulu berast skriflega til aðalstjórnar eigi síðar en 4 vikum fyrir aðalfund. Tilnefningar skal bera undir sameiginlegan fund aðalstjórnar og formanna deilda félagsins og eru aðeins samþykktar ef a.m.k. 4/5 hluti þeirra sem mæta á fundinn eru sammála niðurstöðunni.”

Fundur fulltrúa aðalstjórnar með fulltrúum deilda var haldinn þann 2. apríl sl. þar sem tilnefningin var samþykkt samhljóða.

Þriðji heiðursforseti Fjölnis er Jón Karl Ólafsson

Jón Karl Ólafsson átti sæti í aðalstjórn Fjölnis í um 20 ár og þar af sem formaður aðalstjórnar frá árinu 2009 til ársins 2024. Fimmtán ár sem formaður í einu stærsta íþróttafélagi landsins er ærið langur tími og krefst mikillar fórnfýsi.

Jón Karl er einstakur maður sem gefur endalaust af sér til félagsmála en hann á alltaf tíma fyrir íþróttahreyfinguna og er boðinn og búinn í að leggja sína krafta og sitt af mörkum fyrir hana.

Við í Fjölnir vorum einstakleg heppinn að hann og fjölskylda hans fluttu í Grafarvoginn og að við skyldum hafa notið krafta hans í öll þessi ár. Jón Karl hefur lagt sig 100% fram um að hlúa að félaginu okkar og hefur alltaf verið klár í að leiða það áfram í gegnum súrt og sætt.

Aðstöðumál eru eitt af stóru verkefnunum hjá íþróttahreyfingunni og þar hefur Jón Karl ásamt Gumma framkvæmdastjóra og aðalstjórn félagsins keyrt hlutina áfram af miklum eldmóð og krafti sem hefur skilað okkur margbættri aðstöðu á undanförnum árum.

Jón Karl gekk í gegnum erfið veikindi á meðan hann stóð vaktina hjá okkur í Fjölni en hann sló ekkert af fyrir félagið og var aðdáunarvert að fylgjast með hvernig hann tókst á við veikindin að æðruleysi og virðingu.

Jón Karl er drengur góður með stórt og hlýtt hjarta sem gefur sig allan í það sem hann tekst á við í lífinu, hann er góður fjölskyldumaður, félagi og vinur. Hann hefur komið að ófáum verkefnum innan íþróttahreyfingarinnar. Hann er einn þeirra sem kann ekki að segja nei og er alltaf tilbúinn að takast á við stór sem smá verkefni fyrir hreyfinguna hvort sem er fyrir Fjölnir, ÍBR, ÍSÍ eða UMFÍ.

Kærar þakkir fyrir allt þitt óeigingjarna starf fyrir félagið Jón Karl síðustu tvo áratugi.

Jón Karl hlaut gullmerki nr. 30 árið 2019 og er hér með þriðji heiðursforseti Fjölnis

by Arna Guðnadóttir

Fimm nýir heiðursfélagar Fjölnis

Aðalfundur félagsins var haldinn þriðjudaginn 8. apríl 2025 í Miðjunni í Egilshöll. Þar kom saman fjölmennur hópur félagsmanna. Á fundinum bættust fimm einstaklingar í hóp þeirra heiðursfélaga sem fyrir eru.

Í reglugerð um veitingu viðurkenninga segir um heiðursfélaga: „Heiðursfélagi er næst æðsta viðurkenning sem veitt er til almennra félagsmanna. Hana má veita til þeirra, sem starfað hafa vel og dyggilega fyrir félagið í 20 ár eða lengur. Tilnefningar um heiðursfélaga þurfa að hafa stuðning a.m.k. 3 einstaklinga frá aðalstjórn og hið minnsta 2 deildum félagsins. Tilnefningar skulu berast skriflega til aðalstjórnar eigi síðar en 4 vikum fyrir aðalfund. Tilnefningar skal bera undir sameiginlegan fund aðalstjórnar og formanna deilda félagsins og eru aðeins samþykktar ef a.m.k. 4/5 hluti þeirra sem mæta á fundinn eru sammála niðurstöðunni.”

Fundur fulltrúa aðalstjórnar með fulltrúum deilda var haldinn þann 2. apríl sl. þar sem farið var yfir framkomnar tilnefningar og þær allar samþykktar samhljóða.

Ungmennafélagið Fjölnir óskar nýjum heiðurfélögum innilega til hamingju!

Heiðursfélagi nr. 5 - Helgi Árnason

Árið 2004 stofnaði Helgi skákdeild Fjölnis og var jafnframt fyrsti formaður deildarinnar og er það enn. Auk þess að vera formaður deildarinnar í þessi 21 ár sem deildin hefur starfað hefur hann jafnframt verið þjálfari. Raunar hóf hann skákkennslu í Grafarvogi árið 1993 þegar Rimaskóli var stofnaður en Helgi var skólastjóri Rimaskóla frá stofnun skólans 1993 til ársins 2019 og hefur skákin verið eitt af flaggskipum skólans.

Helgi hefur sýnt skákinni og skákdeildinni endalausa virðingu og elju. Deildin hefur alið ófáa afreksmennina í gegnum árin og vakið mikla athygli sem samtenging milli skólaskákar og keppnisskákar. Þess má geta að síðustu tvö árin hefur deildin orðið Íslandsmeistari skákfélaga í úrvalsdeild með fullu húsi stiga bæði árin.

Það hafa aldrei verið æfingagjöld hjá deildinni heldur hefur Helgi verið afskaplega duglegur að sækja styrki til að reka deildina. Hann hefur einnig lagt mikla áherslu á að skákin sé fyrir alla og að öll kyn séu jafn velkomin í skák. Þá hefur Helgi skipulagt og stýrt fjölmörgum skákmótum sem félaginu hefur verið falið að halda á þessum árum.

Frá upphafi skákdeildarinnar hefur deildin alla tíð haft aðstöðu í Rimaskóla fyrir æfingar og sem skólastjóri var Helgi alltaf tilbúinn að greiða götu félagsins og deilda þess með aðstöðu ef þess var nokkur kostur.

Helgi hlaut silfurmerki nr. 63 árið 2005 og gullmerki nr. 23 árið 2018. Þá var Helgi valinn Fjölnismaður ársins árið 2011 og er nú hér með heiðursfélagi Fjölnis nr. 5.

Kærar þakkir fyrir öll þín mikilvægu störf fyrir félagið Helgi og við hlökkum til að starfa með þér áfram.

Heiðursfélagi nr. 6 - Hreinn Ólafsson

Hreinn er líklega einn af lengst starfandi sjálfboðaliðum félagsins en hann hóf störf fyrir frjálsíþróttadeildina á fimmta aldursári félagsins, eða árið 1993 - fyrir 32 árum.

Í deildinni starfaði hann samfleytt í stjórn eða varastjórn í 30 ár og sinnti þar margvíslegum hlutverkum og alls konar verkefnum. Árið 1998 þegar 3. unglingalandsmót UMFÍ var haldið í Grafarvogi var Hreinn sem dæmi formaður unglingalandsmótsnefndar. Hreinn er afskaplega yfirvegaður maður, viljugur og lausnamiðaður sem oft hefur komið sér vel í störfum félagsins. Hann er ætíð boðinn og búinn að aðstoða við mótahald og annað það sem til fellur í störfum félagsins og er hann einn af þeim frábæru sjálfboðaliðum sem halda áfram að starfa fyrir félagið þrátt fyrir að börn hans séu vaxin úr grasi og ekki lengur iðkendur hjá félaginu. Auk þess að sinna frjálsíþróttadeildinni í öll þessi ár átti Hreinn einnig sæti í aðalstjórn Fjölnis á árunum 2018-2024 og reyndist hann þar líkt og í öðrum störfum fyrir félagið ráðagóður félagi sem þekkir starf félagsins afskaplega vel.

Hreinn hlaut silfurmerki nr. 8 árið 2000 og gullmerki nr. 18 árið 2015 og er nú hér með heiðursfélagi Fjölnis nr. 6.

Heiðursfélagi nr. 7 - Kári Arnórsson

Kári byrjaði eins og flestir sjálfboðaliðar á því að fylgja drengjunum sínum eftir í íþróttunum. Á meðan þeir voru í knattspyrnu sat Kári í flestum foreldraráðum, var liðstjóri og kom að öllu sem sneri að utanumhaldi við rekstur viðkomandi flokka. Þá hefur Kári setið árum saman í stjórn knattspyrnudeildar og hefur gengt þar ýmsum hlutverkum.

Kári hefur jafnframt verið liðstjóri meistaraflokks karla samfleytt frá árinu 2009 og hefur því verið fleygt að líklega er hann „leikjahæstur“ þ.e. skráður á flestar leikskýrslur í mfl. karla í knattspyrnu hjá Fjölni en hann hefur nánast verið á öllum leikjum liðsins allt frá árinu 2009, auk þess að hafa farið flestar æfingaferðir með liðinu.

Það er ekki nóg með að vera sjálfboðaliði í stjórn og liðstjórn heldur hefur Kári verið algjör lykilmaður í öllum framkvæmdum er varða aðalvöll Fjölnis í Dalhúsum, hvort sem um er að ræða byggingu varamannaskýla, aðstöðu fyrir fjölmiðla, byggingu á palli fyrir veitingarekstur, uppsetningu á skiltum og o.s.frv. Einnig stýrði hann framkvæmdum við gerð glæsilegra búningsklefa fyrir meistaraflokk kvenna og karla í Egilshöll. Það liggja því eftir hann ófá handtökin fyrir félagið en fyrir utan allan þann tíma sem hann hefur gefið félaginu í formi vinnu sinnar, sem og sinna starfsmanna, hefur hann einnig útvegað félaginu allskyns efni sem notað hefur verið í framkvæmdir.

Þessu til viðbótar sá Kári um getraunastarf félagsins í fjölda ára og er enn einn þeirra sem alltaf mætir og tekur þátt. Það er því óhætt að segja að Kári sé alltaf boðinn og búinn að koma að öllu því sem viðkemur sjálfboðaliðastarfi Fjölnis.

Kári hlaut silfurmerki nr. 58 árið 2005 og gullmerki nr. 16 árið 2012. Þá var Kári valinn Fjölnismaður ársins árið 2006 og er nú hér með heiðursfélagi Fjölnis nr. 7.

Kærar þakkir fyrir öll þín mikilvægu störf fyrir félagið Kári og við hlökkum til að starfa með þér áfram.

Heiðursfélagi nr. 8 - Valborg Guðrún Guðjónsdóttir og heiðursfélagi nr. 9 - Willem Cornelius Verheul

Það er vart hægt að tala um annað þeirra hjóna án þess að nefna hitt – enda hafa þau verið óaðskiljanleg í starfi Karatedeildar Fjölnis í á þriðja áratug. Af þeirri ástæðu er okkur sannur heiður að gera þau að heiðursfélögum Fjölnis fyrir ómetanlegt og óeigingjarnt framlag sitt til íþróttarinnar, deildarinnar og félagsins.

Það er oft talað um að ein krafan til þeirra sem sækjast eftir Dan gráðun (svarta beltið) í karate sé að þau verði að gefa til baka til íþróttarinnar. Fá hafa lagt sig jafn mikið fram um að gera slíkt eins og þau Valborg og Willem.

Án þeirra, ræki Karatedeild Fjölnis einfaldlega ekki þá öflugu starfsemi sem raun ber vitni. Þau hafa lagt ómælda vinnu í uppbyggingu deildarinnar, hvort sem það er í þjálfun, stjórnarsetu, liðsstjórn eða dómgæslu. Öll þeirra börn hafa stundað karate, og sjálf hafa þau gengið í öll möguleg ábyrgðarhlutverk – jafnan oftar en einu sinni.

Það er erfitt fyrir utanaðkomandi að átta sig á því hversu dýrmæt þau eru fyrir starfsemina, en fyrir okkur sem höfum notið eljusemi þeirra og eldmóðs er það augljóst. Kærar þakkir Willem og Valborg fyrir ykkar mikla og óeigingjarna starf í þágu félagsins í áraraðir – við hlökkum til að starfa með ykkur áfram.

Valborg hlaut silfurmerki nr. 123 árið 2014 og gullmerki nr. 27 árið 2018 og er nú eins og áður sagði hér með heiðursfélagi Fjölnis nr. 8.

Willem hlaut silfurmerki nr. 101 árið 2010 og gullmerki nr. 26 árið 2018 og er hér með heiðursfélagi Fjölnis nr.9.

by Arna Guðnadóttir

Sex nýir handhafar gullmerkis Fjölnis

Aðalfundur félagsins var haldinn þriðjudaginn 8. apríl 2025 í Miðjunni í Egilshöll. Þar kom saman fjölmennur hópur félagsmanna. Á fundinum voru veitt sex ný gullmerki til félagsmanna Fjölnis.

Í reglugerð um veitingu viðurkenninga segir „Gullmerkið er viðurkenning félagsins, sem veita má þeim sem starfað hafa í stjórnum í 10 ár eða lengur, eða hafa með öðrum hætti unnið vel og dyggilega fyrir félagið. Merkið er einnig veitt fyrir sérstök íþróttaafrek.“

Ungmennafélagið Fjölnir óskar öllum gullmerkishöfum innilega til hamingju!

Gullmerki nr. 42 hlýtur María Baldursdóttir (karatedeild)

María Baldursdóttir er fyrrverandi formaður Karatedeildar Fjölnis og hóf fyrst þátttöku í starfi deildarinnar, eins og svo mörg önnur, með því að fylgja börnunum sínum á æfingar. Fljótlega tók hún virkari þátt með því að setjast í stjórn deildarinnar og gegndi formennsku um árabil.

Þegar drengurinn hennar lét af iðkun íþróttarinnar var María þó ekki af baki dottin heldur tók að sér nýtt hlutverk. Fyrir hönd Karatedeildar Fjölnis settist hún í stjórn Karatesambands Íslands og tók þar að sér eitt streitufyllsta og vanþakklátasta hlutverk hreyfingarinnar – formennsku í mótanefnd. Í því hlutverki stýrði hún mótahaldi í níu ár og bar ábyrgð á öllum mótum, bæði smærri mótum Karatesambandsins og á stærri alþjóðlegum mótum eins og Norðurlandameistaramótum og Smáþjóðaleikum.

Íþróttahreyfingin byggist á sjálfboðaliðum, og þar er Karatedeild Fjölnis engin undantekning. Okkar heppni hefur verið að eiga einstaklinga eins og Maríu, sem með óeigingjörnu starfi sínu hefur lagt grunn að öflugri og sjálfbærri starfsemi. #TakkMæja

María hlaut silfurmerki félagsins nr. 151 árið 2017 og hlýtur nú gullmerki nr. 42.

Gullmerki nr. 43 hlýtur Snæbjörn Willemsson Verheul (karatedeild)

Snæbjörn byrjaði að æfa karate í janúar 2004 og hefur því verið viðloðandi Karatedeild Fjölnis í 21 ár. Hann hóf fljótlega að keppa fyrir hönd deildarinnar og náði fljótlega góðum árangri. Hann var alltaf í verðlaunasætum í bæði kata og kumite þangað til að hann hætti keppnisþátttöku árið 2011. En á þeim tíma tók hann, meðal annars, þátt í tveimur heimsmeistaramótum sem haldin voru á vegum Kobe Osaka International sambandsins.

Hann hóf fljótt að aðstoða við þjálfun og starfar í dag sem aðstoðaryfirþjálfari deildarinnar. Hann menntaði sig sem styrktarþjálfari og býður framhaldshópum og afrekshópum sérsniðina styrktarþjálfun.

Snæbjörn hefur verið dómari fyrir hönd Fjölnis á mótum innanlands og erlendis og sat á tímabili í stjórn deildarinnar sem fulltrúi yngri iðkenda.

Snæbjörn hlaut silfurmerki félagsins nr. 168 árið 2019 og hlýtur nú gullmerki nr. 43.

Gullmerki nr. 44 hlýtur Ágúst Jónsson (frjálsíþróttadeild)

Ágúst kom inn í starf frjálsíþróttadeildarinnar fyrst fyrir um það bil 13 árum síðan, fyrst sem sjálfboðaliði og síðar sem stjórnarmaður. Hann hefur frá fyrsta degi verið mjög virkur, sá um tímatökur fyrir deildina frá fyrsta degi og allt þangað til tímataka.is tók við allri tímatöku fyrir 4-5 árum síðan. Fljótlega eftir að Ágúst kom að starfi deildarinnar tók hann að sér að halda utan um teppalagnir í Laugardagshöllinni fyrir deildina og hefur stýrt því með miklum sóma.

Ágúst var forsprakki hópsins "fullorðins frjálsar" sem fór í gang ca. 2017-18, og hefur verið okkar fremsti maður í öldungaflokki síðustu ár. Enn fremur hefur Ágúst verið einn ötulasti maður deildarinnar við að halda Fjölnishlaupinu gangandi í áraraðir og lagt mikla vinnu í það starf. Þá hefur Ágúst einnig unnið mikið fyrir FRÍ á vegum frjálsíþróttadeildarinnar.

Ágúst hefur verið sérlega ósérhlífinn og duglegur við öll störf sem koma að rekstri frjálsíþróttadeildar Fjölnis og mótahaldi á umliðnum árum. Hann lét af störfum í stjórn frjálsíþróttadeildar nú á dögunum en við vonumst nú til að hafa hann á hliðarlínunni áfram.

Ágúst hlaut silfurmerki félagsins nr. 196 árið 2022 og hlýtur nú gullmerki nr. 44.

Gullmerki nr. 45 hlýtur Guðlaug Björk Karlsdóttir (aðalstjórn)

Guðlaug gekk til liðs við stjórn Körfuknattleiksdeildar Fjölnis árið 2013 og gegndi þar lykilhlutverki í áratug. Hún var formaður deildarinnar á árunum 2016–2020 og sinnti á þeim tíma fjölbreyttum verkefnum af miklum metnaði og drifkrafti.

Guðlaug var óþreytandi við að efla starf deildarinnar, virkja fólk í kringum sig og hvetja til þátttöku og umræðu innan stjórnar.

Í hennar formannstíð voru m.a. haldin dómaranámskeið fyrir iðkendur og foreldra, komið á styrktarþjálfun fyrir stúlkur í körfubolta og boðið upp á morgunæfingar fyrir yngri iðkendur. Hún stóð einnig fyrir sumarnámskeiðum með landsliðsfólki, svokölluðum Körfuboltabúðum Fjölnis, sem Ægir Þór Steinarsson og Heiðrún Kristmundsdóttir stýrðu. Guðlaug hafði jafnframt frumkvæði að því að ráða Heiðrúnu í markaðsstarf með það að markmiði að fjölga iðkendum.

Þó Guðlaug hafi látið af formennsku deildarinnar árið 2020 hélt hún áfram að styðja stjórnina af miklum krafti og var í raun burðarás í fjármálum deildarinnar í heilan áratug. Hún lagði ríka áherslu á traust fjármál og sýndi það í verki. Þá stjórnaði hún Fjölnismótunum af mikilli prýði og fagmennsku.

Árið 2020 var Guðlaug kjörin í aðalstjórn félagsins þar sem hún hefur átt sæti síðan en nú hefur hún ákveðið að láta staðar numið og snúa sér að öðrum hugðarefnum.

Starf Guðlaugar er einstakt dæmi um elju, metnað og ómetanlegt sjálfboðastarf í þágu íþróttastarfs – og fyrir það viljum við þakka henni af heilum hug.

Guðlaug hlaut silfurmerki félagsins nr. 181 árið 2019 og hlýtur nú gullmerki nr. 45.

Gullmerki nr. 46 hlýtur Guðmundur Lúðvík Gunnarsson (aðalstjórn)

Guðmundur Lúðvík, eða Gummi eins og við flest þekkjum hann settist fyrst í aðalstjórn Fjölnis árið 2008 en var síðar ráðinn framkvæmdastjóri félagsins og gengdi því hlutverki í rúm 13 ár eða þar til hann lét af störfum undir lok síðasta árs.

Það er ærið verkefni að stýra einu stærsta íþróttafélagi landsins og hefur félagið gengið í gegnum gríðarlegar breytingar frá þeim tíma þegar hann tók við stjórnartaumunum. Eitt það stærsta er eflaust að árið 2007 var ákveðið að fara í þá vegferð að færa alla daglega fjársýslu deilda af deildarstjórnum (sjálfboðaliðum) og létta þar með ábyrgðinni af þeim inn á miðlæga skrifstofu þar sem daglegum rekstri er stýrt í dag. Árið 2011 þegar Gummi tók við sem framkvæmdastjóri bretti hann upp ermarnar ásamt aðalstjórn félagsins með

formanninn Jón Karl í broddi fylkingar og keyrði þessar breytingar í gegn sem voru komnar af stað en félaginu vantaði kraft til að klára.

Auk þess hefur félagið stækkað mikið á þessum tíma, bæði hefur deildum fjölgað en ekki hvað síst hefur iðkendum fjölgað mikið með sífellt betri aðstöðu.

Það lýsir Gumma líklega best að hann er ófeiminn við að takast á við verkefni bæði stór sem smá, engin verkefni of lítil eða ómerkileg til að skella sér í þau. Hann er afar bóngóður til allskyns verkefna og hefur hann alla tíð sinnt félaginu einnig sem sjálfboðaliði því að börn þeirra hjónanna hafa í gegnum tíðina verið iðkendur hjá félaginu og sjálfboðaliðavinnunni í kringum það hefur Gummi einnig viljað sinna.

Fjölnir á Gumma gríðarlega mikið að þakka, hann hefur unnið ófáar klukkustundirnar, jafnt um kvöld sem og um helgar til að sinna því sem sinna þarf hjá stóru félagið. Takk fyrir allt Gummi.

Guðmundur hlaut silfurmerki félagsins nr. 134 árið 2015 og hlýtur nú gullmerki nr. 46.

Gullmerki nr. 47 hlýtur Málfríður Sigurhansdóttir (aðalstjórn)

Allir sem á einhverjum tímapunkti síðustu 20 ár hafa komið að einhverju sjálfboðaliðastarfi fyrir Fjölni vita hver Fríða er auk alls þess aragrúa iðkenda, foreldra og annarra forráðamanna sem hafa kynnst henni í gegnum árin.

Það má segja að Fríða sé eiginlega búin að vera hjartað í félaginu mörg undanfarin ár. Hún hóf sinn „feril“ sem sjálfboðaliði fyrir Fjölni á síðustu öld, já líklega einhvern tímann í kringum 1997 var hún byrjuð að koma að starfi félagsins og átti síðar eftir að sitja í deildarstjórnum og um tíma sem formaður sunddeildarinnar. Árið 2007 varð félagið svo þeirrar gæfu aðnjótandi að ráða hana til starfa hjá félaginu þar sem hún hefur starfað óslitið síðan eða í rúm 17 ár.

Það er eiginlega þannig að ef Fríða veit það ekki þá veit það enginn ef spurt er um hvernig hlutirnir eru gerðir eða hafa verið gerðir á umliðnum árum hjá félaginu. Fríða er með eindæmum bóngóð, alltaf svo yfirveguð og jákvæð að unun er með að fylgjast. Hvort sem beiðnirnar eru stórar eða smáar þá má alltaf redda því, ég held hreinlega að annað sé ekki til í orðabók Fríðu.

Fríða hefur eins og gefur að skilja á þessum langa tíma fylgt félaginu í gegnum gríðarmiklar breytingar og ávallt hefur hún tekist á við ný verkefni, nýja tækni, nýjar nálganir með bjartsýni og vilja til að læra og takast á við nýja hluti.

Það kemur því ekkert á óvart að hún sé enn tilbúin að takast á við nýja hluti en svo háttar til að hún mun á næstu vikum hverfa frá störfum á skrifstofu Fjölnis og takast á við ný og spennandi verkefni.

Það verður risaskarð að fylla í sporin hennar Fríðu en hún býr nú ennþá hérna hinum megin við götuna og ég hef fulla trú á að hún verði okkar áfram innan handar svona óbeint í það minnsta því Fjölniskona er hún eins og þær gerast bestar.

Málfríður hlaut silfurmerki félagsins nr. 43 árið 2004, var valin Fjölnismaður ársins 2010 og hlýtur nú gullmerki nr. 47.

by Arna Guðnadóttir

Tíu nýir handhafar silfurmerkis Fjölnis

Aðalfundur félagsins var haldinn þriðjudaginn 8. apríl 2025 í Miðjunni í Egilshöll. Þar kom saman fjölmennur hópur félagsmanna. Á fundinum voru veitt tíu ný silfurmerki til félagsmanna Fjölnis.

Í reglugerð um veitingu viðurkenninga segir „Silfurmerki félagsins er viðurkenning, sem veita má þeim, sem starfað hafa í stjórnum í 5 ár eða lengur, eða hafa með öðrum hætti unnið vel og dyggilega fyrir félagið. Merkið er einnig veitt fyrir sérstök íþróttaafrek.“

Ungmennafélagið Fjölnir óskar öllum silfurmerkishöfum innilega til hamingju!

Silfurmerki nr. 224 hlýtur Birkir Björnsson (íshokkídeild)

Birkir sat í stjórn Íshokkídeildarinnar í fjölda ára, eða frá þeim tíma þegar Björninn sameinaðist Fjölni.

Hann sat í stjórn á erfiðustu tímum sem íþróttahreyfingin hefur gengið í gegnum, þ.e. á Covid tímanum. Þá átti hann sinn þátt í því að halda deildinni á floti. Síðar hefur hann unnið mikilvægt starf innan stjórnarinnar og unnið að mörgum mikilvægustu verkum hennar.

Síðustu misseri hefur Birkir haft minni tíma en áður til að sinna stjórnarsetunni, en alltaf hefur verið hægt að leita til hans og hann hefur komið að málum með rólegum, yfirveguðum og skynsamlegum hætti.

Nú hefur Birkir sagt sig úr stjórn deildarinnar, en kemur áfram að starfinu sem liðstjóri Meistaraflokks karla, en því starfi hefur hann sinnt meðfram stjórnarsetu undanfarin ár.

Silfurmerki nr. 225 hlýtur Elín D. Guðmundsdóttir (íshokkídeild)

Elín hefur starfað fyrir íshokkídeildina svo lengi sem elstu menn muna.

Eins og flestir hóf hún störf þegar börnin hennar voru ung og æfðu hjá deildinni. Nú eru þau vaxin úr grasi og tekin að fljúga úr hreiðrinu. Þrátt fyrir það hefur Elín ekki getað slitið sig frá starfinu, þar sem hún brennur fyrir hokkíinu. Hún hefur setið fjölda ára í stjórn og síðustu tvö árin sem formaður deildarinnar. Hún er hafsjór fróðleiks og fátt sem hún veit ekki um sportið. Ef Elín veit það ekki, skiptir það ekki máli.

Nú hefur Elín vikið úr stjórn, en samt sem áður heyra núverandi stjórnendur reglulega í henni og geta alltaf leitað ráða hjá henni. Fyrrverandi og núverandi samstarfsfólk Elínar er henni ævarandi þakklátt fyrir hennar mikla framlag.

Silfurmerki nr. 226 hlýtur Hildur Dís Jónsdóttir Scheving (íshokkídeild)

Hildur hefur verið viðloðandi hokkísamfélagið í langan tíma, en tengdafaðir hennar var einn af stofnendum Bjarnarins, sem gekk inn í Fjölni árið 2018. Síðan synir hennar hófu að stunda íshokkí, um svipað leiti og þeir lærðu að ganga, hefur hún verið óþreytandi við að stuðla að framgangi íþróttarinnar. Hún var einn af stofnendum Foreldrafélags deildarinnar sem hefur t.d. haldið utan um ferðir, pantanir á keppnisfatnaði, æfingafatnaði, auglýsingavörum og fleiru. Hildur er óþreytandi við að aðstoða foreldra við allt sem viðkemur sportinu og til hennar hefur verið hægt að leita nánast á hvaða tíma sólarhringsins sem er. Þá hefur hún starfað náið með meistaraflokki kvenna og fór t.d. með þeim í tvígang til Akureyrar þegar þær kepptu til Íslandsmeistara. Hildur situr nú í stjórn deildarinnar, annað árið í röð.

Silfurmerki nr. 227 hlýtur Erlingur Þorsteinsson (skákdeild)

Erlingur Þorsteinsson hefur átt sæti í stjórn Skákdeildar Fjölnis í tæp 20 ár. Á þessu tímabili hefur hann einnig verið virkur skákmaður og styrkt A og B sveitir skákdeildarinnar. Það sem einkennir störf Erlings eru jákvæðni, góð samskipti og óskipt hvatning til annarra liðsmanna. Erlingur hefur lengst af gegnt embætti varaformanns skákdeildarinnar. Á síðasta aðalfundi skákdeildarinnar í mars sl. var ákveðið að efla hlutverk yngri félaga og Erlingur kosinn í embætti ritara og Dagur Ragnarsson kjörinn varaformaður. Aukin ábyrgð færð á hendur þeirra sem við stofnun skákdeildarinnar voru rétt komnir á grunnskólaaldur en eru nú í afrekshópi íslenskra skákmanna.

Erlingur fylgist vel með öllu sem er að gerast í skáklistinni, bæði hérlendis og erlendis. Hann vill sannarlega láta gott af sér leiða og hefur tekist það ágætlega með starfi sínu fyrir Skákdeild Fjölnis.

Silfurmerki nr. 228 hlýtur Gunnar Traustason (listskautadeild)

Gunnar Traustason hefur setið í stjórn listskautadeildar í þrjú ár, 2021-2023. Hann gegndi hlutverki gjaldkera og formanns og síðast meðstjórnanda. Hann hefur einnig verið virkur sjálfboðaliði í fjölda ára fyrir þann tíma m.a. í stjórn Bjarnarins áður en listskautadeildin sameinaðist Fjölni. Gunnar og frú bjóða sig alltaf fram sama hvað er á dagskrá en þá má nefna t.d sjálfboðaliðastarf við mótahald, sýningar og fjáranir. Hann stekkur til og hjálpar og sinnir þeim hlutverkum sem þarf að sinna.

Silfurmerki nr. 229 hlýtur Waleska Giraldo (listskautadeild)

Waleska Giraldo sat í stjórn listskautadeildar í þrjú ár, meðstjórnandi árið 2020 og síðan formaður 2021-2022. Eftir það hefur Waleska verið mikilvægur sjálfboðaliði fyrir listskauta með því að sitja sem tæknimaður hjá dómurum á mótum (calc and technical support) auk þess að sinna hinum ýmsu hlutverkum.

Silfurmerki nr. 230 hlýtur Tinna Arnardóttir (listskautadeild)

Tinna Arnardóttir byrjaði eins og svo margir aðrir sem sjálfboðaliði í foreldrafélagi listskautadeildarinnar. Síðan sat hún í stjórn listskautadeildar í tvö ár 2022-2023 en er nú varamaður í aðalstjórn Fjölnis. Hún hefur í gegnum tíðina sinnt hinum ýmsu hlutverkum og ómetanlegt að hafa hana og Gísla manninn hennar ávalt til taks.

Silfurmerki nr. 231 hlýtur Halldóra Hrund Guðmundsdóttir (listskautadeild)

Halldóra Hrund Guðmundsdóttir er núna formaður listskautadeildar Fjölnis. Á síðustu árum hefur hún verið öflugur sjálfboðaliði fyrir félagið en einnig stokkið til þegar önnur skautafélög hafa leitað eftir aðstoð á mótum. Hún gengur rösk til allra verka sem þarf að sinna og er lykilmaður í að tryggja að verkefni stjórnarinnar gangi smurt fyrir sig.

Silfurmerki nr. 232 hlýtur Freydís Aðalbjörnsdóttir (handknattleiksdeild)

Freydís hóf að starfa í foreldraráði í handknattleik strax þegar dætur þeirra hjóna byrjuðu að æfa handbolta veturinn 2015-16 og átti hún sæti í foreldraráðum allt til ársins 2024. Fljótlega byrjaði hún einnig að aðstoða fyrir leiki meistaraflokks karla með því að græja veitingar sem að leikmönnum var boðið upp á eftir leikina. Síðustu ár hefur hún svo ásamt fjölskyldu sinni í raun séð alfarið um rekstur sjoppu og miðasölu á öllum heimaleikjum meistaraflokkana. Auk þess að aðstoða BUR á öllum yngri flokka mótum sem haldin hafa verið síðustu 9 ár sem og vorhátíð og annað sem BUR hefur komið að.

Það er því óhætt að segja að Freydís hefur í mörg ár verið einn öflugasti sjálfboðaliði handknattleiksdeildar og henni er fátt óviðkomandi. Ja, nema kannski að sitja í stjórn deildarinanr – hún lét hins vegar kjósa manninn sinn hann Róbert í stjórn að honum fjarstöddum fyrir cirka 10 árum síðan.

Freydís er dugnaðarforkur og það þyrftu helst allar deildir að hafa eina Freydísi í sínum röðum.

Silfurmerki nr. 233 hlýtur Elísa Kristmannsdóttir (aðalstjórn)

Elísa hóf líkt og svo margir aðrir sín störf fyrir félagið í foreldraráðum yngri flokka í knattspyrnu og oft voru það fjármálin og fjáraflanir flokkana sem hún hélt utan um. Síðar átti Elísa sæti í stjórn knattspyrnudeildar og þá um tíma sem gjaldkeri. Elísa tók svo sæti í aðalstjórn félagsins árið 2016 og sat í stjórn í fimm ár eða til ársins 2021.

Aðalstjórn þakkar Elísu kærlega fyrir hennar góðu störf í þágu félagsins.

by Arna Guðnadóttir

Ársreikningur Fjölnis 2024

Fjölnir_Ársreikningur samstæða og aðalsjóður 2024_FINAL (1)

by Arna Guðnadóttir

Aðalfundur Ungmennafélagsins Fjölnis

Aðalfundur Fjölnis fer fram þriðjudaginn 8. apríl kl. 17:00. Fundurinn verður í Miðjunni, félagsaðstöðu Fjölnis í Egilshöll.
Framboð til stjórnar þarf að berast til gudmundur@fjolnir.is eigi síðar en 3. apríl.
Tillögur til breytinga á lögum félagsins, undirritaðar af flutningsmönnum, skulu sendar aðalstjórn félagsins eigi síðar en 3. apríl.
Tillögur að lagabreytingum munu liggja frammi á skrifstofu félagsins viku fyrir aðalfund.

Dagskrá aðalfundar verður:
a) Skýrsla stjórnar
b) Reikningar félagsins
c) Lagabreytingar
d) Kjör formanns
e) Kjör stjórnarmanna
f) Kjör skoðunarmanna reikninga
g) Önnur mál

8. grein
Stjórn félagsins er skipuð sjö mönnum og allt að tveimur til vara. Kosning til stjórnar skal fara þannig fram:
a) kosning formanns til eins árs,
b) kosning sex meðstjórnenda til tveggja ára, þannig að þrír eru kosnir á hverju ári,
c) kosning tveggja manna í varastjórn til eins árs.

Varamenn taka sæti í stjórn ef aðalmaður forfallast í sömu röð og þeir eru kosnir. Bjóði meðstjórnandi sig fram til formanns áður en kjörtímabili hans líkur, tekur varamaður sæti í stjórn fram að næsta aðalfundi.
Allir félagsmenn félagsins sem eru fjárráða geta boðið sig fram til formanns. Formaður félagsins getur ekki samtímis verið formaður deildar. Tilkynningar um framboð til formanns og meðstjórnenda félagsins skulu berast framkvæmdarstjóra félagsins minnst 5 dögum fyrir boðaðan aðalfund.
Formaður er kosinn beinni kosningu á aðalfundi, en að öðru leyti skiptir stjórnin sjálf með sér verkum. Stjórn fer með umboð og vald aðalfundar á milli aðalfunda án heimildar til lagabreytinga.
Á aðalfundi skulu einnig kosnir tveir skoðunarmenn reikninga en í þeirra stað má kjósa einn löggiltan endurskoðanda.

Lög Fjölnis má finna hér:
https://fjolnir.is/felagid-okkar/log-felagsins/

#FélagiðOkkar

by Arna Guðnadóttir

Sumarstörf Fjölnis fyrir 17-25 ára

by Arna Guðnadóttir