Baldur Már framlengir hjá Fjölni

Baldur Már framlengir hjá Fjölni

Körfuknattleiksdeild Fjölnis hefur framlengt samning við Baldur Má Stefánsson sem þjálfara meistaraflokks karla. Baldur tók við liðinu í nóvember síðastliðnum og leiddi það úr neðri hluta deildarinnar í sæti í undanúrslitum – árangur sem sýnir bæði styrk og stefnu í þjálfun Baldurs.

Baldur er vel þekktur innan félagsins, en á árum áður starfaði hann sem aðstoðarþjálfari meistaraflokks karla hjá Fjölni í tvö ár, ásamt því að þjálfa drengja- og unglingaflokka félagsins með góðum árangri. Hann hefur einnig komið víða við í þjálfun, meðal annars hjá Stjörnunni, Álftanes, Breiðabliki og yngri landsliðum Íslands. Áður en Baldur snéri aftur í Grafarvoginn starfaði hann sem aðstoðarþjálfari ÍR í Bónusdeildinni.

Baldur segir sjálfur um framhaldið: „Ég er gríðarlega spenntur fyrir uppbyggingunni hjá okkur í Fjölni bæði innan og utan vallar. Við erum með sterkt lið og efnilega yngri flokka. Markmiðið er að stækka körfuboltasamfélagið í Grafarvoginum og koma liðinu á hærri stall.“

Stjórn körfuknattleiksdeildar Fjölnis fagnar áframhaldandi samstarfi við Baldur: „Það er okkur mikilvægt að halda áfram með Baldur við stjórnvölinn. Hann hefur skýra sýn á framhaldið, þar sem byggt er á sterkum kjarna heimamanna og áframhaldandi þróun yngri leikmanna félagsins. Við erum spennt fyrir framtíðinni og þeirri vegferð sem við höfum hafið saman.“

Við óskum Baldri áframhaldandi góðs gengis í Grafarvogi – framtíðin er björt!