Knattspyrna

Um helgina hélt Fjölnir knattspyrnumót fyrir yngstu iðkendurna okkar sem var vel sótt. Slík mót eru byggð upp á mikilli og óeigingjarnri sjálfboðavinnu foreldra og annarra sem leggja sitt af mörkum til að skapa skemmtilegan dag fyrir krakkana. Við erum afar þakklát fyrir allt það fólk sem leggur hönd á plóg til að gera svona viðburði mögulega.

Markmið okkar á þessum mótum er alltaf að veita iðkendunum ánægjulega upplifun þar sem gleði, þátttaka og hreyfing eru í forgrunni.

Okkur hefur borist sú umræða að óánægja hafi verið með mótsgjafir mótsins. Við hlustum á slíka endurgjöf og tökum hana alvarlega. Við ætlum að fara yfir þetta og læra af því sem betur má fara svo við getum gert enn betur næst.

Við viljum jafnframt vekja athygli á því að val á mótsgjöfum er á okkar ábyrgð. Þær eru þó oft gerðar mögulegar með stuðningi dyggra styrktaraðila sem styðja gott íþróttastarf í hverfinu. Í þessu tilfelli hefði valið mátt vera betra og við tökum ábyrgð á því.

Við þökkum fyrir alla endurgjöf og hlökkum til að taka á móti krökkunum aftur á næstu mótum.

Í síðustu viku fóru fjórir efnilegir leikmenn úr Fjölni á reynslu til norska félagsins Sandefjord. Um er að ræða þá Baltasar Þór Laufarsson (2009), Brynjar Elí Jóhannsson (2010), Elvar Inga Pétursson (2010) og Frosta Hjaltason (2010).

Strákarnir æfðu með U17 ára liði félagsins við frábærar aðstæður á Jotun Arena vellinum, en þjálfari liðsins er Axel Örn Sæmundsson sem er að hefja sitt annað tímabil með liðið. Auk æfinga með liðinu fengu þeir einnig tækifæri til að spila æfingaleik gegn Start, þar sem Sandefjord hafði betur í skemmtilegum leik, 4–3.

Leikmennirnir stóðu sig gríðarlega vel á reynslunni og var greinilegt að þeir nýttu ferðina vel bæði til að læra og kynnast nýju umhverfi. Það verður spennandi að fylgjast með framvindu þeirra á næstunni.

Með í för voru einnig þrír þjálfarar úr Fjölni: Matthías Ásgeir Ramos Rocha, yfirþjálfari karla, Unnar Jóhannsson þjálfari 3. flokks og afreksþjálfari, auk Veigars Arnar Rúnarssonar þjálfara í kvennaflokkum félagsins. Ferðin var því einnig góð tengslamyndun og lærdómstækifæri fyrir bæði leikmenn og þjálfara.

Aðalfundur knattspyrnudeildar Fjölnis verður haldinn 23. mars n.k. kl. 17.00 í aðstöðu félagsins í Egilshöll.

Dagskrá:

Venjuleg aðalfundarstörf

Í 17 grein laga félagsins segir:

Stjórn hverrar deildar skal skipuð þremur til sjö einstaklingum, formanni sem kosinn er á aðalfundi viðkomandi deildar og tveimur til sex meðstjórnendum og allt að tveimur til vara, einnig kjörnum á aðalfundinum.

Tillögur um stjórnarmenn skulu berast til skrifstofu minnst 5 dögum fyrir boðaðan aðalfund. Ef ekki berast næg framboð fyrir tilskilin tíma er heimilt að bjóða sig fram á aðalfundinum og skulu þeir sem tilkynntu framboð sín innan framboðsfrests teljast kjörnir en kosið á milli annarra. Hafi framboð verið tilkynnt innan framboðsfrests en viðkomandi frambjóðandi ekki náð kjöri sem aðalmaður er viðkomandi heimilt að gefa kost á sér á fundinum til setu í varastjórn.

Framboð skulu send til framkvæmdastjóra félagsins, Guðmundi G. Sigurbergssyni á netfangið gudmundur@fjolnir.is eigi síðar en 18 mars n.k.

Momolaoluwa Adesanmi, eða Mo eins og hún er kölluð, hefur skrifað undir eins árs samning við félagið og mun því spila áfram með Fjölni á komandi keppnistímabili. Mo gekk til liðs við félagið á síðasta ári eftir langvarandi meiðsli og vann sig hægt og bítandi upp í liðið.

Mo lék einnig með Fjölni í Lengjudeildinni tímabilið 2022 og hefur nú þegar spilað 28 leiki fyrir félagið. Hún er mikil fyrirmynd innan hópsins og leggur sitt af mörkum til að hjálpa yngri leikmönnum að þróast og bæta sig.

Vesko þjálfari liðsins hafði þetta um framlenginguna að segja: „Það er mikill ánægja að tryggja Mo áfram hjá félaginu á næsta tímabili. Hún er gríðarlega sterkur varnarmaður sem gefur okkur mikinn styrk í leikjum. Mo er hugrökk, vinnusöm og tilbúin að takast á við allar áskoranir til að hjálpa liðinu. Hún sneri sterk til baka eftir meiðsli og er nú stöðugt að sýna gæði sín, nánast dag frá degi. Ég hlakka mikið til að sjá hana ná fullum möguleikum sínum á tímabilinu.“

Knattspyrnudeild Fjölnis hefur samið við Helenu Fönn Hákonardóttur og Ísabellu Rós Bjarkadóttur til ársins 2027.

Helena og Ísabella, sem eru að gera sína fyrstu samninga við Fjölni, eru báðar efnilegir leikmenn fæddar árið 2010 og hafa verið mikilvægur hluti af liðum félagsins í 2. og 3. flokki. Samhliða því hafa þær einnig aflað sér dýrmætrar reynslu með þátttöku í leikjum og æfingum með meistaraflokki.

Helena er kantmaður og lék sinn fyrsta leik fyrir Fjölni árið 2024 í útileik gegn Sindra og hefur alls spilað 8 leiki fyrir meistaraflokk. Ísabella er miðjumaður og lék sinn fyrsta leik fyrir meistaraflokk í fyrstu umferð tímabilsins 2025 gegn Selfossi. Hún hefur alls spilað 5 leiki fyrir meistaraflokk.

Fjölnir bindur miklar vonir við báðar til framtíðar og lítur á þær sem mikilvæga leikmenn og fyrirmyndir innan félagsins.

Ungmennafélagið Fjölnir hefur hlotið hvatningarverðlaun KSÍ í dómaramálum árið 2025, sem eru veitt árlega í aðdraganda ársþings Knattspyrnusambands Íslands. Viðurkenningin er veitt félögum sem sýna metnað, framtíðarsýn og markvissa uppbyggingu í dómaramálum.

Dómaraverðlaunum KSÍ er skipt í tvo flokka: Fyrirmyndarfélag í dómaramálum og Hvatningarverðlaun í dómaramálum. Fjölnir hlýtur hvatningarverðlaunin fyrir markvisst starf og jákvæða þróun í dómgæslu innan félagsins.

Á árinu 2025 tók Fjölnir stórt skref í uppbyggingu dómaramála með því að fá Oddberg Eiríksson, fyrrverandi FIFA aðstoðardómara, til starfa sem dómarastjóra félagsins. Oddbergur hefur komið inn með mikinn kraft, skýra sýn og faglegt skipulag sem hefur styrkt dómgæsluna innan Fjölnis til muna. Oddbergur er sömuleiðis þjálfari í yngri flokkum og því mikill liðsfengur fyrir félagið.

Undir hans stjórn hefur félagið lagt aukna áherslu á fræðslu og þjálfun dómara, meðal annars með fjölgun dómaranámskeiða, sem hefur skilað sér í auknum fjölda virkra dómara, bæði karla og kvenna. Þessi þróun styrkir ekki aðeins starf Fjölnis heldur einnig knattspyrnuna í heild sinni.

Viđurkenning KSÍ er staðfesting á því mikilvæga starfi sem unnið er innan félagsins og hvatning til áframhaldandi uppbyggingar á sviði dómaramála.

Á myndinni eru Oddbergur Eiríksson, dómarastjóri Fjölnis, og Ingi Rafn Ingibergsson, starfsmaður KSÍ í dómaramálum.

Í gær urðu 2. flokkur Fjölnis í knattspyrnu Reykjavíkurmótsmeistarar 2026. Liðið tryggði sér titilinn með sannfærandi 5–0 sigri á Fylki í úrslitaleiknum en fyrir leikinn hafði það farið taplaust í gegnum sinn riðil þar sem það vann þrjá leiki og gerði eitt jafntefli.

Mörk Fjölnis í úrslitaleiknum skoruðu Aron Sölvi (2), Elmar Daði, Daníel Tal og Tómas Aris.

Frábær frammistaða og vel að verki staðið!

Knattspyrnudeild Fjölnis hefur gengið frá samningi við Helga Snæ Agnarsson sem gengur til liðs við félagið fyrir komandi keppnistímabil.

Helgi Snær, sem fæddur er árið 1999, er fjölhæfur leikmaður sem getur leyst margar stöður á vellinum. Hann kemur til félagsins frá KFG en á jafnframt að baki fyrri sögu hjá Fjölni. Helgi Snær hefur leikið alls 45 leiki í 1. deild með Fjölni, Þrótti Vogum og Magna. Þá á hann einnig um 45 leiki í 2. deild með ÍR og KFG.

Til gamans má geta þess að Helgi Snær var bikarmeistari með 2. flokki Fjölnis árið 2018, Íslandsmeistari í innanhússknattspyrnu árið 2019 og 4. deildarmeistari með Vængjum Júpíter árið 2023.

Aðspurður um félagsskiptin er tilhlökkun fyrir komandi sumri hjá Helga Snæ: „Ég er spenntur fyrir sumrinu í Grafarvoginu, það er frábært að vera kominn aftur í góða aðstöðu, samheldinn leikmannahóp og félag með skýr markmið. Ég mun leggja allt mitt að mörkum til að koma félaginu aftur í næstefstu deild og verkefninu er ekki lokið þar, því félagið á mikið inni. Grafarvogurinn verður gulur og glaður í sumar“.

Fjölnir býður Helga Snæ velkominn aftur til félagsins og hlakkar til samstarfsins á komandi tímabili. Áfram Fjölnir!

Knattspyrnudeild Fjölnis hefur framlengt samning sinn við miðjumanninn Mörtu Björgvinsdóttir til næstu tveggja ára. Marta, sem er 22 ára, er uppalin Fjölniskona og hefur leikið 108 leiki fyrir félagið og skorað í þeim 11 mörk.

Marta sneri aftur til Fjölnis á síðasta ári eftir stutta dvöl hjá Álftanesi og varð fljótt mikilvægur hlekkur í liðinu. Á síðasta tímabili lék hún leik númer 100 fyrir félagið í útileik gegn Sindra, þar sem hún kryddaði tímamótin með marki.

Vesko þjálfari liðsins hafði þetta um framlenginguna að segja: „Það eru afar góðar fréttir fyrir okkur að Marta hafi skrifað undir nýjan samning. Hún er frábær leikmaður sem þekkir vel þau gildi sem félagið stendur fyrir og er tilbúin að leggja sig fram fyrir þau. Marta er sífellt að bæta sig og gefur okkur meiri stöðugleika á miðsvæðinu. Þrátt fyrir ungan aldur hefur hún þegar mikla reynslu af meistaraflokksfótbolta og við erum sannfærð um að hún muni spila lykilhlutverk í áframhaldandi uppbyggingu liðsins.“

Knattspyrnudeild Fjölnis hefur gengið frá samningi við varnarmanninn Patryk Hryniewicki sem gengur til liðs við félagið fyrir komandi keppnistímabil.

Patryk er fæddur árið 2000 og leikur sem hafsent. Hann er uppalinn hjá Leikni í Reykjavík þar sem hann hefur leikið 45 leiki í meistaraflokki og skorað 2 mörk.

Um er að ræða öflugan og hávaxinn varnarmann sem bætir styrk og festu í varnarleik liðsins. Stjórn og þjálfarateymi Fjölnis telja Patryk vera mikilvæga viðbót við leikmannahóp félagsins fyrir verkefnin fram undan. Aðspurður um félagaskiptin er Patryk ánægður með að vera kominn í Fjölni: „Ég er mjög spenntur að koma til Fjölnis. Mér finnst klúbburinn frábær og strákarnir geggjaðir. Ég hlakka til að gefa allt í þetta“.

Fjölnir býður Patryk velkominn til félagsins og hlakkar til samstarfsins á komandi tímabili. Áfram Fjölnir!