Meistaraflokkur kvenna í fótbolta - samantekt
Meistaraflokkur kvenna hóf úrslitakeppnina í 2. deild með leikjum gegn Augnabliki 10. ágúst og Sindra 17. ágúst.
Þrátt fyrir brotthvarf sjö leikmanna og þjálfarans sýndi liðið góðan metnað og hvatningu og byrjaði úrslitakeppnina með tveimur sigrum og heilum tíu mörkum.
Augnablik - Fjölnir 0:6
Stelpurnar okkar voru með fulla stjórn á leiknum og unnu þægilegan sigur.
Okkar ungi og efnilegi markvörður, Sara Sif Builinh Jónsdóttir (2006) lék sinn fyrsta opinbera leik fyrir Fjölni.
Mörk skoruð:
María Sól Magnúsdóttir skoraði 4 mörk
Ester Lilja Harðardóttir skoraði 1 mark
Kristín Gyða Davíðsdóttir skoraði 1 mark
Fjölnir - Sindri 4:2
Mjög opinn og aðlaðandi leikur með mörgum tækifærum fyrir framan bæði mörkin.
Fjölniskonur réðu boltanum en Sindrakonur voru hættulegar í skyndisóknum.
Verðskuldaður sigur fyrir okkur.
Í þessum leik léku tvær af okkar ungu og efnilegu leikmönnum sinn fyrsta leik fyrir Fjölni:
Sunna Gló Helgadóttir (2005)
Kristjana Rut Davíðsdóttir (2009)
Mörk skoruð:
María Sól Magnúsdóttir skoraði 2 mörk
Ester Lilja Harðardóttir skoraði 1 mark
Hrafnhildur Árnadóttir skoraði 1 mark
Næsti leikur okkar í úrslitakeppninni er næstkomandi föstudag 23. ágúst frá kl. 20:00 gegn KH á N1-vellinum Hlíðarenda.
Arnþór Freyr og Gunnar komnir aftur heim!
Körfuknattleiksdeild Fjölnis hefur gert samninga við tvo uppaldna Fjölnismenn, Arnþór Freyr Guðmundsson (Addú) og Gunnar Ólafsson, sem munu leika með liðinu í 1. deild karla á komandi tímabili. Báðir leikmenn skrifuðu undir samninga við félagið í dag.
Gunnar Ólafsson kemur til liðsins frá Fryshuset Basket í Svíþjóð þar sem hann hefur leikið síðustu tvö ár. Fyrir þá tíma lék Gunnar með Stjörnunni á tímabilinu 2019-2022, ásamt því að spila fyrir LEB Oro clun Oviedo CB á Spáni. Hann hefur einnig leikið tvö tímabil fyrir Keflavík, það fyrra 2013-2014 áður en hann hélt í bandaríska háskólaboltann þegar hann lék með St. Francis College í fjögur ár, og það síðara að námi loknu tímabilið 2019-2020. Gunnar spilaði fyrir íslenska landsliðið á árunum 2017 til 2019.
Addú, sem einnig er uppalinn í Fjölni, lék með Stjörnunni frá árinu 2015 eftir að hafa leikið fyrir Tindastól sama ár. Addú lék einnig á árum áður í EBA deildinni á Spáni þegar hann spilaði bæði með Albacete og Alcázar þar í landi áður en hann snéri aftur til Fjölnis tímabilið 2014-2015.
Báðir leikmenn eru vel stemmdir fyrir komandi tímabili. “Ég er virkilega ánægður að vera kominn heim í Grafarvoginn. Mér líst vel á hópinn og er spenntur fyrir komandi tímabili og hlakka til að taka þátt í því verkefni að koma Fjölni upp í efstu deild, þá sérstaklega fyrir hann Matta heitinn,” sagði Addú. Gunnar var því sammála og sagðist spenntur fyrir tímabilinu: “Ég er mjög ánægður að vera kominn heim í uppeldisfélagið.”
Borche Ilievski þjálfari liðsins var að vonum ánægður með fréttir dagsins og sagði þá Addú og Gunnar styrkja liðið til muna. “Strákarnir eru frábær viðbót fyrir Fjölni. Addú er mikill leiðtogi innan sem utan vallar og munum við stóla á hann til að móta andrúmsloftið á vellinum og vera yngri og eldri leikmönnum innan handar. Hann er einnig mikill "playmaker" og góður varnarmaður auk þess sem hann getur skotið vel utan af velli. Gunnar er frábær varnarmaður og gríðarlega mikilvæg viðbót í liðið okkar því hann getur auk þess skotið vel að utan sem og keyrt á körfuna. Hann hefur verið einn af betri varnarmönnum landsins í efstu deild og hæfni hans til að verjast í mörgum stöðum og vinna úr ógnunum verður ómetanlegt fyrir okkur.”
Fjölnir býður þá Gunnar og Arnþór velkomna aftur í Grafarvoginn!
#FélagiðOkkar
Framkvæmdastjóri óskast
Ungmennafélagið Fjölnir, Grafarvogi auglýsir til umsóknar spennandi og krefjandi starf framkvæmdastjóra félagsins.
Fjölnir er fjölgreina íþróttafélag með 13 deildum og er félagið fjölmennasta íþróttafélag landsins.
Við leitum að aðila með framúrskarandi samskiptahæfni, leiðtogafærni og óbilandi áhuga á að byggja upp rótgróið félag með ungmennafélagsandann að leiðarljósi.
Helstu verkefni og ábyrgð:
- Yfirumsjón og ábyrgð á daglegum rekstri félagsins
- Stýring fjármála, áætlanagerðar og kostnaðareftirlit
- Launavinnsla
- Tekjuöflun og markaðssetning félagsins
- Framkvæmd framtíðarsýnar og stefnu félagsins í samvinnu við aðalstjórn
- Mannauðsmál
- Samskipti við deildarstjórnir félagsins
- Samskipti við stjórnvöld, sveitarfélög, íþróttasambönd, sérsambönd, styrktaraðila og aðra hagsmunaaðila
- Yfirumsjón með undirbúningi og framkvæmd verkefna
Menntunar- og hæfniskröfur:
- Háskólamenntun og/eða reynsla sem nýtist í starfi
- Framúrskarandi samskipta- og samstarfshæfni
- Frumkvæði og leiðtogafærni
- Þekking og reynsla á sviði fjármála æskileg
- Reynsla í stjórnun og samningagerð kostur
- Geta til að vinna undir álagi
Nánari upplýsingar veitir Jarþrúður Hanna Jóhannsdóttir, formaður félagsins í netfanginu formadur@fjolnir.is
Umsóknir berist í gegnum alfred.is. Óskað er eftir að feriskrá og kynningarbréf fylgi umsókn.
Farið verður með allar umsóknir sem trúnaðarmál.
Umsóknarfrestur er til 26. ágúst 2024.
Íslenskur stórmeistari til liðs við Íslandsmeistara Fjölnis
Grafarvogsbúinn og stórmeistarinn Bragi Þorfinnsson hefur gengið til liðs við Skákdeild Fjölnis og mun tefla með skáksveit Íslandsmeistaranna á komandi keppnisvetri.
Bragi býr ásamt fjölskyldu sinni í hjarta Grafarvogs og okkur Fjölnismönnum er mikill akkur í að fá frábæran liðsstyrk og góðan félaga.
Velkominn Bragi í Skáksveit Fjölnis, Íslandsmeistara 2024.
Sigurvegarar í 6. flokki kvenna á Símamótinu 2024
Meistaramót Íslands 15-22 ára
Helgina 21-23. júní fór fram Meistaramót Íslands 15-22 ára í frjálsum íþróttum.
Fjölnir sendi nítján keppendur á mótið, sem fram fór á Selfossi.
Fjölniskeppendur hömpuðu sextán Íslandsmeistratitlum, auk þess að fá sjö silfurverðlaun og níu bronsverðlaun. Þá ber einnig að nefna að um þrjátíu persónuleg met voru sett.
Fjölnir var stigahæsta liðið í flokkum 18-19 ára stúlkna og 20-22 ára stúlkna og í 3ja sæti í heildarstigakeppninni mótsins, sem er frábær árangur!
Íslandsmeistaratitli náðu:
Christina Alba Marcus Hafliðadóttir – langstökk og þrístökk 16-17 ára
Kjartan Óli Bjarnason – 400 m hlaup og 400 m grindahlaup 16-17 ára
Pétur Óli Ágústsson – 200 m hlaup 16-17 ára
Arna Rut Arnarsdóttir – kringlukast og sleggjukast 18-19 ára
Boðhlaupssveit 4x100m hlaup stúlkna 18-19 ára
Grétar Björn Unnsteinsson – stangarstökk 18-19 ára
Guðný Lára Bjarnadóttir – 800 m og 1500 m hlaup 20-22 ára
Katrín Tinna Pétursdóttir – stangarstökk 20-22 ára
Kjartan Óli Ágústsson – 400 m hlaup, 400 m grindahlaup og 800 m hlaup 20-22 ára
Boðhlaupssveit 4x400m blönduð sveit 20-22 ára
Við óskum öllum keppendum Fjölnis innilega til hamingju með árangurinn!
Myndirnar tók Hlín Guðmundsdóttir, verkefnastjóri miðlunar hjá FRÍ 
Vormót Fjölnis í frjálsum 2024
Vormót Fjölnis í frjálsum íþróttum var haldið þriðjudaginn 4. júní á frjálsíþróttavellinum í Mjódd.
Frjálsíþróttafólk á aldrinum 11-15 ára lét gula viðvörun ekki hafa áhrif á sig og mættu um 120 keppendur til leiks í 60m/100m hlaupi, langstökki, kúluvarpi og 600m/800m hlaupi.
Aðstæður voru ekki vænlegar til bætinga þetta árið en Fjölnisfólk kom með fern verðlaun heim í Grafarvoginn. Unnur Birna Unnsteinsdóttir (15 ára) náði í gullverðlaun fyrir kúluvarp, silfurverðlaun fyrir 800m hlaup og bronsverðlaun fyrir langstökk. Aron Magnússon (14 ára) nældi sér í bronsverðlaun fyrir langstökk.
Mót sem þetta krefst fjölda sjálfboðaliða til að allt gangi upp og tímasetningar standist. Þar stöndum við Fjölnisfólk einstaklega vel bæði hvað varðar þátttöku iðkenda og foreldra sem iðulega mæta og sinna verkefnum með jákvæðni og gleði að leiðarljósi. Við getum verið stolt af okkar fólki.
Meðfylgjandi eru nokkrar myndir af sjálfboðaliðum að sinna hinum ýmsu störfum á vellinum. Áfram Fjölnir!
Gunnar Steinn Jónsson ráðinn þjálfari Olísdeildarliðs Fjölnis í handbolta!
Gunnar Steinn Jónsson snýr aftur heim - ráðinn þjálfari Olísdeildarliðs Fjölnis í handbolta
Gunnar Steinn Jónsson hefur verið ráðinn þjálfari meistaraflokks karla í handbolta. Gunni er Grafaravogsbúum kunnur enda uppalinn í félaginu þar sem hann spilaði með yngri flokkum í handbolta og fótbolta við góðan orðstýr. Frá Fjölni lá leiðin til HK og þaðan í atvinnumennsku í Svíþjóð, Frakklandi, Þýskalandi og Danmörku þar sem hann spilaði samhliða því að leika fyrir Íslands hönd og var þar með fyrsti Fjölnismaðurinn til að spila á stórmóti í handbolta. Eftir glæsilegan feril erlendis lá leið hans heim til Íslands þar sem hann lék og var aðstoðarþjálfari með Stjörnunni við hlið Patreks Jóhannessonar.
Gunnar tekur við stjórn liðsins sem vann sér inn sæti í úrvalsdeild í vor í eftirminnilegu einvígi í oddaleik í fullri Fjölnishöll. Meistaraflokksráð lýsir mikilli ánægju með ráðninguna sem endurspeglar stefnu félagsins vel að byggja á Fjölnismönnum og metnað félagsins til að vera með lið í efstu deild í handbolta.
Gunnar Steinn er spenntur fyrir komandi áskorun í Olís deildinni:
,,Það er frábær tilfinning að snúa aftur heim í Grafarvoginn og loka þannig þessum hring eftir góðan Evróputúr með fjölskyldunni. Sætið í Olísdeildinni gefur tækifæri á að byggja upp öflugt lið með mörgum Fjölnismönnum. Ég hlakka mikið til að leggja mitt að mörkum og byrja að vinna með strákunum. Ég hvet alla Grafarvogsbúa, fyrrverandi og núverandi, til að mæta á völlinn á næsta tímabili og styðja okkur, flaggskip Fjölnis í efstu deild.”
Það eru spennandi tímar fram undan í Grafarvoginum og handboltadeildin ætlar að leggja allt kapp á að skapa góða stemningu og gleði í kringum starfið í vetur. Við skorum á sem flesta á að vera með okkur í liði og taka þátt!
Meistaraflokksráð handboltadeildar Fjölnis
Frísk í Fjölni
Frísk í Fjölni er hreyfingarúrræði fyrir einstaklinga 60 ára og eldri og er þjónustan byggð í kringum hópþjálfun undir handleiðslu menntaðra þjálfara. Þjálfarar og stjórnendur verkefnisins eru öll menntaðir íþróttafræðingar frá Háskólanum í Reykjavík. Á æfingum er lögð áhersla á styrktar-, þol, liðleika- og jafnvægisæfingar og er þjálfun aðlöguð að hverju og einum iðkanda. Markmið Frísk í Fjölni er að bæta líkamlega, andlega og félagslega heilsu þátttakenda og gefa eldra fólki tækifæri á að stunda hreyfingu í Fjölni. Einnig að auka þekkingu þátttakenda á mikilvægi hreyfingar og stuðla þannig að auknu heilsulæsi, farsælli öldrun og fjölgun heilbrigðra æviára.
Í vetur fóru fram þrennar líkamlegar mælingar á hópnum eftir stöðluðu prófi kallað The Senior Fitness Test og erum við stolt að segja frá því að niðurstöður þeirra mælinga eru alveg hreint frábærar. Þol þátttakenda jókst að meðaltali um 15% á tímabilinu, styrkur í efri líkama jókst að meðaltali um 26% og styrkur í neðri líkama jókst að meðaltali um 24%. Skipulögð styrktarþjálfun sem þessi vinnur gegn vöðvarýrnun og beinþynningu og stuðlar því að bættri heilsu þátttakenda.
Í viðhorfskönnun sem send var út á dögunum kom í ljós að 95% þátttakenda mátu líkamlegt ástand sitt betra og 63% mátu andlega heilsu sína betri eftir að þeir höfðu þátttöku í Frísk í Fjölni. 100% þátttakenda sögðust hafa kynnst nýju fólki og sögðust vilja halda áfram á næstu önn. Má því segja að verkefnið er að mæta þeim markmiðum sem sett voru í upphafi. Mælingar sýna fram á bætta líkamlega heilsu og í svörum þátttakenda í viðhorfskönnun hafa allir kynnst nýju fólki og flestir meta andlega heilsu sína betri.
Það er ekki hægt að draga úr því hversu stolt við erum af öllum þátttakendum og hversu ánægjulegt það er að sjá bætingar þeirra. Ekki síður er gaman að sjá hversu ánægðir þátttakendur virðast vera með starfið.
Ragna Lára og Kolbrún Ída í úrvalslið Reykjavíkur á Grunnskólamóti höfuðborga Norðurlandanna
Grunnskólamót höfuðborga Norðurlandanna 2024 (Nordic Capitals’ School Games) fer fram í Reykjavík 26.-31. maí. Keppt er í handknattleik stúlkna, knattspyrnu drengja og frjálsíþróttum beggja kynja.
Á dögunum var valið í úrvalslið Reykjavíkur sem keppir fyrir hönd borgarinnar á mótinu. Í liðinu eru 41 keppandi, fjórir þjálfarar og tveir fararstjórar.
Tvær stúlkur frá Fjölni/Fylki hafa verið valdar í 10 manna úrvalslið Reykjavíkur í handbolta sem keppir á móti úrvalsliðum höfuðborganna. Þetta eru þær Ragna Lára Ragnarsdóttir og Kolbrún Ída Kristjánsdóttir, leikmenn 5. og 4. flokks Fjölnis/Fylkis.
Við óskum stelpunum innilega til hamingju og óskum þeim góðs gengis á mótinu.
Á meðan mótinu stendur er hægt að fylgjast með og fá upplýsingar á heimasíðu Íþróttabandalags Reykjavíkur, www.ibr.is. Skoða þar úrslit leikja, sjá myndir og lesa stutta umfjöllun alla daga. Einnig er hægt að fylgjast með á Facebooksíðu Íþróttabandalags Reykjavíkur.
#FélagiðOkkar