Hin árlega Uppskeruhátíð Fjölnis fór fram við hátíðlega athöfn í Keiluhöllinni í gær, þann 11. desember, og heppnaðist kvöldið einstaklega vel. Vel var mætt á viðburðinn en hátt í 100 manns voru viðstaddir athöfnina. Veitt voru verðlaun fyrir íþróttaafrek ársins, ásamt því að valið á Fjölnismanni, íþróttakarli og -konu var tilkynnt.

Íþróttafólk deilda er kjörið ár hvert af deildum félagsins, aðalstjórn félagsins velur svo úr hópi þeirra einn íþróttakarl og eina íþróttakonu Fjölnis. Aðalstjórn félagsins velur einnig Fjölnismann ársins út frá ábendingum. Þau hljóta öll farandbikar sem þau varðveita í eitt ár og einnig fá þau afhentan bikar til eignar sem gjöf.

Jarþrúður Hanna formaður félagsins stýrði athöfninni  ásamt öðrum úr aðalstjórn. Gunnar Jónatans sá um að taka glæsilegar myndir á hátíðinni.

Við óskum fólkinu okkar innilega til hamingju og þökkum öllum sem komu í gær kærlega fyrir komuna og kvöldið! Hér fyrir neðan má sjá þau sem hlutu viðurkenningar og verðlaun.

Íþróttakona ársins: Helga Þóra Sigurjónsdóttir

Helga Þóra Sigurjónsdóttir hefur náð mjög góðum árangri í hástökki á árinu. Hún hefur æft frjálsar íþróttir frá 9 ára aldri. Hún er nú með bestu hástökkvurum á landinu í kvennaflokki. Hennar besta afrek 2025 er stökk upp 1,83 m sem erfjórði besti árangur íslenskrar konu í hástökki frá upphafi. Það er nú ekkert smá

Mynd: Gunnar Jónatans

Íþróttakarl ársins: Daði Arnarson

Daði hefur átt einstaklega öflugt ár og fest sig rækilega í sessi sem einn allra besti millivegalengdarhlaupari landsins. En hann hefur jafnframt verið þjálfari hjá deildinni.

Hann sigraði bæði 800m og 1500m á íslandsmeistaramótinu innanhúss og tryggði sér jafnframt sigur í 1500m á bikarkeppni FRÍ innanhúss. Daði átti stóran þátt í því að karlalið frjálsíþróttadeildar Fjölnis, í samstarfi við UMSS, næði glæsilegum sigri á bikarmótinu. 

Á árinu keppti Daði fyrir hönd Íslands bæði á Smáþjóðleikunum og á Evrópubikarmótinu í Slóveníu, þar sem hann stóð sig vel við krefjandi aðstæður. Besti árangur hans á árinu er í 800m, sem hann hljóp á 1:54,12, sem gefur honum 963 IAAF stig en sá árangur er jafnframt sextándi besti árangur Íslendings í greininni innanhúss frá upphafi. 

Auk afreka sinna á brautinni hefur Daði verið afar mikilvægur leiðtogi og þjálfari innan frjálsíþróttahópsins síðustu ár og lagt mikið af mörkum til uppbyggingar og árangurs deildarinnar.

Fjölnismaður ársins Róbert Línberg Runólfsson

Róbert Línberg Runólfsson gjaldkeri handknattleiksdeildar og formaður barna- og unglingaráðs deildarinnar.                 

Róbert hefur sinnt starfi gjaldkera handboltadeildar og verið formaður barna og unglingaráðs undanfarin ár. Hann hefur unnið afar mikilvægt starf gjaldkera af mikilli alúð og vandvirkni í krefjandi aðstæðum. Þá hefur Róbert hefur leitt Barna- og unglingaráð af mikilli festu og verið lykilmaður í nánu og góðu samstarfi við handknattleiksdeild Fylkis.  

Þá hefur Róbert, eiginkona hans og dætur að stórum hluta séð um miðasölu og sjoppu á leikdögum og þannig hefur fjölskyldan verið einn af föstu punktunum í kringum leiki meistaraflokksliðanna. 

Við teljum því Róbert einstaklega vel að því komin að hljóta útnefninguna Fjölnismaður ársins 2025. 

Innilega til hamingju Róbert.

Mynd: Gunnar Jónatans

Fimleikakarl: Kristófer Fannar Jónsson 

Kristófer Fannar er efnilegur íþróttakarl sem hefur staðið sig vel á yfirstandandi ári. Hátindurinn á flottu ári var þó þegar hann tók þátt í Norðurlandamóti drengja fyrir hönd Íslands.

Mynd: Gunnar Jónatans

Fimleikakona: Nicole Hauksdóttir

Nicole hefur á árinu tekið þátt í nokkrum FSÍ mótum og náð frábærum árangri. Á Íslandsmóti vann Nicole silfurverðlaun í fjölþraut og hlaut fjögur önnur verðlaun á einstökum áhöldum. Enn fremur vann hún þrjú gullverðlaun og þrjú bronsverðlaun á öðrum FSÍ mótum.

Nicole er efnileg íþróttakona sem nú undirbýr sig fyrir úrtökumót fyrir sæti í Úrvalshópi FSÍ.

Mynd: Gunnar Jónatans

Frjálsíþróttakarl: Daði Arnarson 

Daði hefur átt einstaklega öflugt ár og fest sig rækilega í sessi sem einn allra besti millivegalengdarhlaupari landsins. Hann sigraði bæði 800m og 1500m á íslandsmeistaramótinu innanhúss og tryggði sér jafnframt sigur í 1500m á bikarkeppni FRÍ innanhúss. Daði átti stóran þátt í því að karlalið frjálsíþróttadeildar Fjölnis, í samstarfi við UMSS, næði glæsilegum sigri á bikarmótinu. 

Á árinu keppti Daði fyrir hönd Íslands bæði á Smáþjóðleikunum og á Evrópubikarmótinu í Slóveníu, þar sem hann stóð sig vel við krefjandi aðstæður. Besti árangur hans á árinu er í 800m, sem hann hljóp á 1:54,12, sem gefur honum 963 IAAF stig en sá árangur er jafnframt sextándi besti árangur Íslendings í greininni innanhúss frá upphafi. 

Auk afreka sinna á brautinni hefur Daði verið afar mikilvægur leiðtogi og þjálfari innan frjálsíþróttahópsins síðustu ár og lagt mikið af mörkum til uppbyggingar og árangurs deildarinnar.

Frjálsíþróttakona: Helga Þóra Sigurjónsdóttir 

Helga Þóra hefur aldrei verið betri en í ár og er meðal allra bestu hástökkskvenna á landinu og hefur verið það um nokkurra ára skeið.

Helga Þóra sigraði bæði á Íslandsmeistaramótinu og bikarmótinu utanhúss í sumar og hélt þannig áfram að styrkja stöðu sína í fremstu röð. 

Hennar besta afrek á árinu 2025 er stökk yfir 1,83 m á Corky Classic móti í Texas í byrjun ársins. Sá árangur gefur 1052 IAAF stig og er afar glæsilegur. Þá er sá árangur Helgu Þóru fjórði besti árangur íslenskrar konu í hástökki frá upphafi. En hún er nú í 150. sæti á heimslista kvenna í greininni, sem undirstrikar framúrskarandi getu og stöðuga framför.

Mynd: Gunnar Jónatans

Handboltakarl ársins: Aðalsteinn Örn Aðalsteinsson

Aðalsteinn Örn, eða Alli, er í dag fyrirliði meistaraflokks karla í handbolta og er hann án efa að spila eitt sitt besta tímabil sem leikmaður. Hann var einn þeirra leikmanna sem fór fyrir liðinu í baráttunni fram undir síðustu umferð í Olísdeildinni á síðasta tímabili. Og í Grilldeildinni nú í haust hefur Alli farið hamförum og setti meðal annars 18 mörk í einum og sama leiknum gegn Víkingi í fyrri umferðinni. 

Alli er einnig þjálfari yngri flokka sem skapar dýrmæta tengingu fyrir yngri iðkendur við meistaraflokk, þar sem hann er frábær fyrirmynd, innan sem utan vallar. Við erum afar rík af því að eiga leikmenn eins og Alla.

Mynd: Þorgils

Handboltakona ársins: Sólveig Ása Brynjarsdóttir

Sólveig Ása er uppalin í Fjölni og það hefur alltaf sést hversu sterkt samband hún hefur við félagið. Hún átti frábært tímabil, var markahæst í liðinu og sýndi mikinn metnað og áreiðanleika – Svo kom að því að hún varð barnshafandi — og í stað þess að nýta það sem fullkomið tilefni til að taka sér örlítið hlé frá handboltanum, þá ákvað hún auðvitað að halda áfram. Hún hoppaði beint í hlutverk sjúkraþjálfara og nýtir þar þekkingu sína sem menntaður slökkviliðs- og neyðarflutningamaður og framtíðar hjúkrunarfræðingur. Þetta er liðsandi sem ekki er hægt að kenna — þetta er bara Sólveig, svo ótrúlega mikilvæg fyrir félagið jafnt innan vallar sem utan. Sólveig hefur verið fyrirmynd, stuðningur og lykilmanneskja í öllum aðstæðum. Hún er sannur Fjölnismaður. Kæra Sólveig — til hamingju með verðskuldaða viðurkenningu. Við erum stolt af þér.

Mynd: Gunnar Jónatans

Íshokkíkarl ársins: Hektor Hrólfsson

Hektor á skilið að hljóta titilinn Íshokkímaður Fjölnis þar sem hann er góður fulltrúi félagsins bæði innan og utan íss. Hann er uppalinn Fjölnismaður sem hefur farið alla leið í gegnum yngri flokkana og er nú orðinn lykilleikmaður í meistaraflokki og U22-liðinu. Þrátt fyrir ungan aldur hefur hann þegar unnið sér sæti í unglingalandsliðum Íslands og er farinn að banka á dyr A-landsliðsins. Hektor er góð fyrirmynd; ávallt áreiðanlegur, mætir samviskusamlega á allar æfingar og leggur sig 100% fram. Hann er jafnframt góður liðsfélagi sem lyftir bæði liðinu og umhverfi sínu upp með viðhorfi sínu og vinnusemi. Þrátt fyrir ungan aldur hefur Hektor þegar sannað að hann á framtíðina fyrir sér í íshokkí, og það verður spennandi að fylgjast með áframhaldandi þróun hans á næstu árum.

Mynd: Gunnar Jónatans

Íshokkíkona ársins: Eva Hlynsdóttir

Frá fyrstu æfingu tímabilsins setti Eva viðmiðið fyrir hvað það þýðir að vera skuldbundin. Hún mætir snemma, dvelur lengi og nálgast hverja æfingu af einbeitingu, ákafa og metnaði til að bæta sig. Samkvæmni hennar hefur gert hana að einum áreiðanlegasta leikmanni liðsins og keppnisskapið hennar lyftir frammistöðu allra í kringum hana. 

Á ísnum hefur Eva verið drifkraftur liðsins okkar. Hvort sem það er hraðinn hennar, ákvarðanatökur eða hæfni hennar til að stíga upp þegar mest á reynir, þá hefur hún skilað frábærri frammistöðu leik eftir leik. Hún spilar af hjarta, með útsjónarsemi og er reiðubúin að leggja á sig þá vinnu sem ekki alltaf sést á tölfræðiblaðinu, en skilar sér svo sannarlega í úrslitunum. 

Utan íss er Eva fyrirmynd fyrir allt liðið. Viðhorf hennar og liðsheildarhugsun skapa menningu sem aðrir fylgja eftir af sjálfu sér. Hún leiðir með fordæmi – með aga, dugnaði og sterkri hollustu við liðið. Allir þessir eiginleikar gefa Evu ekki aðeins bjarta framtíð innan félagsins heldur einnig á landsliðssviði. Eva er holdgervingur þeirra gilda sem félagið okkar vill standa fyrir.

Mynd: Gunnar Jónatans

Karatekarl ársins: Gabriel Sigurður Pálmason 

Gabriel Sigurður er frábær fyrirmynd fyrir alla innan deildarinnar. Hann hefur sýnt þrautseigju og dugnað, og er margfaldur íslandsmeistari í kata. Gabríel hefur keppt fyrir hönd Íslands víðs vegar erlendis með landsliðinu. Að auki þjálfar hann byrjendur og er orðinn virtur dómari á mótum hérlendis. Það er okkur því sannur heiður að tilnefna hann í ár.

Mynd: Þorgils G

Karatekona ársins: Sunna Rut Guðlaugardóttir 

Sunna Rut byrjaði að æfa karate 6 ára og hefur síðan unnið til fjölda titla, sem dæmi Íslandsmeistari í kumite í tvígang á yngri árunum, smáþjóðaleika meistari í hópkata á unglingsárunum og keppir enn til verðlauna á hverju móti á fullsorðins aldri. Auk þess er hún frábær fyrirmynd, þjálfar byrjendur og framhaldsiðkendur og hjálpar til

á mótum sem liðsstjóri. Það er okkur sannur heiður að tilnefna hana því að hún á þetta svo sannarlega skilið.

Mynd: Gunnar

Knattspyrnukarl ársins: Árni Steinn Sigursteinsson 

Fór fyrir meistaraflokksliði félagsins á liðnu ári. Frábær leikmaður, frábær drengur og frábær fyrirmynd. Árni fékk sénsinn og tók hann. Fjölnispiltur og 112 inn að beini.

Mynd: Gunnar Jónatans

Knattspyrnukona ársins: Hrafnhildur Árnadóttir

Hrafnhildur Árnadóttir, holdgervingur þess að vera 112 inn að beini. Leiðtogi kvennastarfs félagsins og fyrirmynd. Hrafnhildur hefur allt, Hrafnhildur getur allt.

Mynd: Gunnar Jónatans

Körfuboltakarl ársins: Sigvaldi Eggertsson

Sigvaldi hefur verið lykilmaður liðsins, var valinn í lið ársins í 1. deild karla á síðasta tímabili og hefur farið frábærlega af stað á yfirstandandi tímabili.  Hann er í hópi efstu manna deildarinnar í fjölmörgum tölfræðiflokkum, þar á meðal  stigum, fráköstum, stoðsendingum og heildarframlagi. Auk þess er Sigvaldi fyrirliði liðsins og fyrirmynd fyrir yngri iðkendur félagsins.

Mynd: Þorgeir Örn Tryggvason

Körfuboltakona ársins: Arna Rún Eyþórsdóttir

Arna Rún er uppalin leikmaður meistaraflokks kvenna, í fyrra tók hún sín fyrstu skref í ungum meistaraflokki Fjölnis í 1. deild kvenna þar sem hún ásamt 7 öðrum leikmönnum úr sterkum 2009 árgangi spiluðu lykilhlutverk. Arna stóð sig frábærlega í deildinni og hefur fylgt því eftir með öflugum leikjum í deildinni í ár en hún er með 12 stig og 6 fráköst að meðaltali ásamt því að vera mjög öflugur varnarmaður. Arna var einnig í u16 kvenna landsliðinu seinasta sumar þar sem hún byrjaði alla leiki í byrjunarliðinu og var félaginu og landi svo sannarlega til sóma. Við hlökkum til að fylgjast með Örnu og okkar efnilega meistaraflokki komandi ár. 

Mynd: Gunnar Jónatans

Skautakona ársins: Elín Katla Sveinbjörnsdóttir

Elín Katla hefur ár eftir ár sýnt fram á einstaka eljusemi og hollustu við listskautun. Frá unga aldri hefur hún stöðugt skilað frábærum árangri fyrir sjálfa sig, fyrir félagið okkar og fyrir Ísland. Hún er sterkur íþróttamaður og ýtir sífellt undir framfarir og ný viðmið. 

Hún hefur verið Íslandsmeistari í yngri flokkum og hefur nú tvö ár í röð verið Íslandsmeistari í Advanced Novice flokki. Á yfirstandandi keppnistímabili hefur Elín Katla enn á ný skarað fram úr með því að setja þrjú ný Íslandsmet í stuttu prógrammi, frjálsu prógrammi og í heildarstigum. 

Á alþjóðavettvangi hefur Elín Katla staðið sig með mikilli prýði og unnið til tveggja gullverðlauna á ISU alþjóðlegum mótum á þessu ári sem verður að teljast frábær árangur. 

Eljusemi, agi og ástríða Elínar Kötlu gera hana að framúrskarandi fyrirmynd fyrir yngri skautara og verðuga að þessari viðurkenningu.

Mynd: Gunnar Jónatans

Skákkarl ársins: Dagur Ragnarsson

Skákdeild Fjölnis valdi Dag Ragnarsson sem íþróttakarl deildarinnar annað árið í röð en Dagur var jafnframt kjörinn íþróttamaður Fjölnis 2024. 

Dagur hefur á árinu 2025 fylgt eftir góðum árangri frá fyrra ári. Í janúar náði hann sigri á alþjóðlega skákmótinu New York Blitz Fuel GM/IM þar sem 10 þátttakendur tefldu allir innbyrðis. Dagur er í A-sveit Skákdeildar Fjölnis sem annað árið í röð vann Íslandsmót skákfélaga með fullu húsi vinninga. Þá sigraði Dagur á Boðsmóti Taflfélags Reykjavíkur, vann A flokkinn á Haustmóti TR og sterkt Skákmót Garðabæjar. Dagur var valinn í landslið Íslands til þátttöku á EM landsliða sem haldið var í október sl. í bænum Batuni í Georgíu.

Mynd: Gunnar Jónatans

Skákkona ársins: Emilía Embla B. Berglindardóttir 

Annað árið í röð velur Skákdeild Fjölnis Emilíu Emblu skákkonu ársins. Hin 13 ára Emilía Embla hefur átt afar farsælt ár við skákborðið og tekið þátt í nánast öllum barna- og unglingaskákmótum ársins. Emilía Embla er stúlknameistari Reykjavíkur annað árið í röð. Hún hefur unnið öll bikarsyrpumót stúlkna á árinu, unnið Friðrikssyrpumót og þá um leið efsta sæti stúlkna. Emilía Embla vann ásamt skáksveit Rimaskóla Íslandsmót barnaskólasveita 2025 og fylgdi skáksveitin sigrinum eftir með 3. sæti á Norðurlandamóti barnaskólasveita í Helsinki nú í haust. Áhugaverðasti árangur Emilíu Emblu á árinu var líkast til 3. sæti í Opnum flokki á fjölmennu Haustmóti Taflfélags Reykjavíkur. Loks má geta þess að nú í lok árs vann Emilía Embla Íslandsmeistaratitil stúlkna í aldursflokknum U14. 

Skákdeild Fjölnis væntir mikils af Emilíu Emblu sem ung að árum er komin í hóp öflugustu skákkvenna Íslands.

Mynd: Gunnar Jónatans

Tenniskarl ársins: Daniel Pozo 

Daniel hefur átt mjög gott ár en auk þess að vera íslandsmeistari í U16 ára flokki bæði innanhúss og utanhúss náði hann eftirtektarverðum árangri í meistaraflokki karla á árinu í einliðaleik en þar náði hann t.d. 3. sæti á Íslandsmóti innanhúss og  komst í undanúrslit Íslandsmótsins utanhúss. Auk þess náði hann 2. sæti á Íslandsmóti utanhúss í tvenndarleik í meistaraflokki. Daniel endar árið 2025 í 2. sæti á styrkleikalista Tennissambandsins í tvíliða leik karla.

Mynd: Gunnar Jónatans

Tenniskona ársins: Bryndís Rosa Armesto Nuevo 

Bryndís sem nú er á sínu öðru ári að spila háskólatennis í Bandaríkjunum varð á árinu í 2. sæti á Íslandsmótinu utanhúss bæði í einliða- og tvíliðaleik. Bryndís náði einnig öðru sæti á 2nd Annual UTR Sports NAIA Individual National Championships í Bandaríkjunum. Þá var hún fjórða árið í röð valin í íslenska landsliðið til að keppa í Billie Jean King Cup.

Mynd: Gunnar Jónatans