Fjölniskonur í íslenska landsliðinu á Billie Jean King Cup 
Við hjá Fjölni erum afar stolt af þeim árangri sem okkar ungu og efnilegu tennisspilarar hafa náð – og í ár voru það ekki færri en þrjár Fjölniskonur sem spiluðu fyrir hönd Íslands á Billie Jean King Cup, stærstu og virtustu landsliðakeppni kvenna í tennis í heiminum.
Eygló Dís Ármannsdóttir, Bryndís Rósa Nuevo Armesto og Íva Jovisic voru allar hluti af íslenska liðinu sem keppti í Evrópuhópi III í Chisinau í Moldóvu. Þær mættu þar sterkum liðum frá m.a. Lúxemborg, Finnlandi og Svartfjallalandi ásamt öðrum þjóðum í sama styrkleikaflokki.
Billie Jean King Cup, sem áður hét Fed Cup, er risaviðburður í heimi tennissins og hefur verið haldinn frá árinu 1963. Árið 2020 var keppnin endurnefnd til heiðurs bandarísku tennishetjunni og jafnréttisbaráttukonunni Billie Jean King, einni af áhrifamestu íþróttakonum allra tíma. Keppnin er sambærileg við Davis Cup í karlaflokki og safnar saman landsliðum víðs vegar að úr heiminum – yfir 100 þjóðir hafa tekið þátt frá upphafi.
Í hverri viðureign, svokallaðri tie, eru leiknir einliðaleikir og tvíliðaleikir sem ráða úrslitum. Núverandi fyrirkomulag gerir ráð fyrir úrslitakeppni (Finals) þar sem sterkustu landsliðin mætast á einum stað yfir eina viku. Ísland spilar í Group III en þátttakan í sjálfri keppninni er mikilvægur áfangi fyrir íslenskt tennis og þróun íþróttarinnar hér heima.
