Áramót Fjölnis 2019

Frjálsíþróttadeild Fjölnis hélt sitt árlega Áramót í frjálsíþróttahöllinni í Laugardal mánudaginn 30. desember. Mótið tókst vel í alla staði og ber að þakka fyrir framlag allra þeirra sjálfboðaliða sem lögðu hönd á plóginn.

Fjölnir átti 12 keppendur á mótinu sem stóðu sig mjög vel.

Kjartan Óli Ágústsson sigraði í 800 m hlaupi á tímanum 2:05,15.

Katrín Tinna Pétursdóttir sigraði í hástökki kvenna með stökk yfir 1,68 m sem er persónuleg bæting hjá henni. Hún varð í þriðja sæti í langstökki kvenna þegar hún stökk 4,92 m.

Vilhelmína Þór Óskarsdóttir varð í öðru sæti í 200 m hlaupi kvenna á tímanum 27,04 sek.

Bjarni Anton Theódórsson varð í öðru sæti í 200 m hlaupi á tímanum 23,11 sek.

Helga Þóra Sigurjónsdóttir varð í öðru sæti í hástökki kvenna með stökk yfir 1,60 m.

Hildur Hrönn Sigmarsdóttir varð í öðru sæti í kúluvarpi 15 ára stúlkna (3 kg) með kast uppá 8,69 m sem er persónuleg bæting hjá henni.

Guðbjörg Jóna Bjarnadóttir ÍR átti besta afrek mótsins þegar hún hljóp 60 m á tímanum 7,54 sek sem gefur 1039 IAAF stig sem er stórglæsilegur árangur. Fær hún til varðveislu farandbikar mótsins sem er ávallt veittur þeim íþróttamanni sem á besta afrek mótsins skv. stigatöflu IAAF.

Öll úrslit mótsins eru hér.


Minna og Daði íþróttafólk frjálsíþróttadeildarinnar 2019

Íþróttafólk Fjölnis 2019 var heiðrað við hátíðlega athöfn föstudaginn 27. desember. Íþróttafólk frjálsíþróttadeildarinnar voru Vilhelmína Þór Óskarsdóttir og Daði Arnarson.

Vilhelmína er 21 árs gömul frjálsíþróttakona sem hefur æft frjálsar íþróttir frá unga aldri og hefur síðustu ár einbeitt sér að keppni í hlaupum. Hefur hún náð mjög góðum árangri í 60, 100, 200 og 400m hlaupum. Á árinu 2019 hljóp hún 400m á 57,29sek sem gefur 965 IAAF stig sem er frábær árangur. Þessi árangur setur hana í 4. sæti á listanum yfir bestu tíma í 400m hlaupi innanhúss árið 2019. Vilhelmína eða Minna eins og hún er alltaf kölluð er í landsliði Íslands í hópi 4x400m boðhlaupskvenna. Hún var líka kjörin íþróttakona deildarinnar í fyrra.

Daði er tvítugur og hefur æft frjálsar íþróttir frá unga aldri. Hann hefur aðallega einbeitt sér að 800m hlaupi undanfarin ár en líka náð góðum árangri í 600m og 1500m hlaupum. Á þessu ári hljóp hann 600m á tímanum 1:22,18 sem gefur 929 IAAF stig sem er frábær árangur. Þessi árangur setur hann í annað sæti á listann yfir bestu afrek í 600m hlaupi innanhúss á þessu ári. Þess má geta að Daði tekur þátt í þjálfun yngri iðkenda deildarinnar og nýtur mikilla vinsælda hjá þeim og er góð fyrirmynd.

Fjölnismaður ársins var að þessu sinni hjónin Lilja Björk Ólafsdóttir og Guðmundur Magni Þorsteinsson sem eru öflugir hlauparar í hlaupahópi Fjölnis. Þessi dugnaðarhjón tilheyra hópi fárra í heiminum sem klárað hafa sex stærstu marþon í heimi. Þau eru elst íslenskra hjóna sem það hafa afrekað. Hjónin, sem eru á sjötugsaldri, byrjuðu að hlaupa um fertugt og eru hvergi nærri hætt. Í Grafarvogi ólu þau upp börn sín fjögur og þegar þau voru að nálgast fertugt gafst loks tími fyrir áhugamál. Um leið og ungarnir voru flognir úr hreiðrinu reimuðu þau á sig hlaupaskóna og héldu af stað. Þau höfðu þá aldrei stundað hlaup en byrjuðu strax í hlaupahópi Grafarvogs, sem heitir nú hlaupahópur Fjölnis. Það var árið 1995 og hafa þau hlaupið meira og minna síðan.

Þau fundu sig vel í hlaupunum og áður en varði lá leiðin í maraþon. Það átti eftir að vinda upp á sig svo um munar. Sex stærstu hlaup heims eru í London, New York, Boston, Berlín, Tokýó og Chicago og hafa þau hjón klárað þau öll. Þessi hlaup eru fjöl­menn­ustu maraþonin og það var búinn til klúbbur fyr­ir fólk sem hef­ur klárað öll þessi hlaup, en klúbburinn heitir Abbott World Marathon Majors og má finna þar rúmlega þrjátíu Íslendinga. Aðeins sex þúsund manns í heiminum geta státað af að hafa klárað öll þessi stærstu hlaup heims. Líklega eru fá hjón á sjötugsaldri í þeim hópi og eru þau Lilja og Guðmundur elst íslenskra hjóna sem það hafa afrekað.

Frjálsíþróttadeildin óskar þeim til hamingju með valið.


Jólamót Fjölnis

Frjálsíþróttadeild Fjölnis hélt sitt árlega jólamót fyrir yngstu iðkendurna sunnudaginn 8. desember. Mótið var haldið í frjálsíþróttahöllinni í Laugardal. Keppt var í 60 m spretthlaupi, langstökki, skutlukasti og 200m hlaupi. Mótið gekk mjög vel og virtust keppendur vera mjög ánægðir. Mótið var styrkt af Krumma leikföngum og Íslandsbanka.  Að móti loknu fengu allir glaðning frá Krumma leikföngum og viðurkenningarskjal.


Fjölnisjaxlinn 2019

Það var mögnuð stemning um helgina þegar fyrsti „FJÖLNISJAXLINN“ fór fram. Um hundrað íþróttaiðkendur, foreldrar, þjálfarar, leikmenn og aðrir áhugasamir tóku þátt í að gera þessa íþróttaþrekraun að veruleika. Boðið var upp á tvær útfærslur fyrir íþróttaiðkendur krakka og foreldra þ.e. synt 200 metra, hjólað 3km og hlaupið 1km. Fyrir íþróttaiðkendur unglinga, foreldra, þjálfara, leikmenn og þá sem æfa þríþraut var synt 400 metra, hjólað 10km og hlaupið 3km. Það var tvöfalt meiri þátttaka en gert hafði verið ráð fyrir, mögnuð stemning allan tímann og gríðarlega mikil ánæga með fyrsta jaxlinn. Áfram Fjölnir og áfram Fjölnisjaxlinn - Allir með á næsta ári!!!

Aðalstyrktaraðili Fjölnisjaxlins er eitt nýjasta og besta fyrirtækið í hverfinu Fanntófell og myndir er hægt að skoða hjá besta hverfisfjölmiðlinum okkar “Grafarvogsbúar”

https://www.facebook.com/Grafarvogsb%C3%BAar-111119802396520/

Knattspyrnudeild, Frjálsíþróttadeild og Sunddeild Fjölnis vilja sérstaklega þakka öllum fyrir sitt framtak til að gera Fjölnisjaxlinn að veruleika þ.e. þátttakendum/keppendum, starfsmönnum/sjálfboðaliðum, ÍTR og Grafarvogssundlaug, starfsmönnum Grafarvogslaugar, áhorfendum, öllum styrktaraðilum og hverfisfjölmiðlinum Grafarvogsbúar fyrir ljósmyndatöku.

Myndir frá jaxlinum má sjá hér.


Fjölnisfólkið stóð sig vel í Reykjavíkurmaraþoninu

Reykjavíkurmaraþon Íslandsbanka fór fram laugardaginn 24. ágúst í ágætu hlaupaveðri. Margir hlauparar frá Fjölni tóku þátt í hlaupinu og stóðu sig vel. Arndís Ýr Hafþórsdóttir varð önnur íslenska konan í mark í 10 km hlaupinu á tímanum 37:19.

Í hálfu maraþoni var Rósa Friðriksdóttir fyrsta íslenska konan í aldursflokknum 60-69 ára á tímanum 1:52:26. Lilja Ágústa Guðmundsdóttir og Ingibjörg Hjaltalín Jónsdóttir urðu fyrstu konur í mark í aldursflokknum 70-79 ára á tímanum 2:09:04. Aldeilis glæsilegur árangur hjá þessum konum sem láta aldurinn ekki stoppa sig!

Öll úrslit úr hlaupinu eru hér.

Á myndinni er Arndís Ýr.


Æfingatafla, þjálfarar og æfingagjöld í frjálsum haustið 2019

Æfingar í frjálsum hefjast 3. sept. hjá 6-9 ára og 10-14 ára hópunum. Upplýsingar um æfingar hjá öðrum hópum eru birtar á facebooksíðum hópanna.

 

Fjölnir frjálsar 6-9 ára

Fjölnir Frjálsar 11-14 ára

Fjölnir frjálsar

Fjölnir frjálsar fullorðnir

Skokkhópur Fjölnis

 

6-9 ára (árg. 2010-2013) 1.-4. bekkur:

 

Þriðjudagar í Fjölnishöll salur 2 kl 15:30-16:30

Fimmtudagar í Fjölnishöll salur 1 kl 16:15-17:15

Laugardagar í Laugardalshöll kl 10-11

 

Þjálfarar: Hafdís Rós Jóhannesdóttir  sími: 6595032 netfang: hafdis2105@gmail.com (þri og fim)

Daði Arnarson (fim og lau)

Signý Hjartardóttir (þri)

 

Æfingagjöld haustönn (sept.-des.):

29.000 3 æfingar á viku.

22.000 1-2 æfingar á viku.

 

10-14 ára (árg. 2006-2009) 5. – 8. bekkur:

 

Þriðjudagar í Fjölnishöll salur 2 kl 14:40-15:30

Fimmtudagar í Laugardalshöll kl 16:00-17:30

Laugardagar í Laugardalshöll kl 10-11:30

 

Þjálfarar: Matthías Már Heiðarson sími: 8450542 netfang: mattimar95@gmail.com (þri, fim og lau)

Hafdís Rós Jóhannesdóttir  sími: 6595032 netfang: hafdis2105@gmail.com (þri)

Elísa Sverrisdóttir (fim og lau)

Signý Hjartardóttir (lau)

 

Æfingagjöld haustönn (sept.-des.):

35.000 3 æfingar á viku.

25.000 1-2 æfingar á viku.

 

15 ára og eldri (árg. 2005 og eldri):

 

Mánudagar í Laugardalshöll kl 17-19

Þriðjudagar í Laugardalshöll kl 17:30-19:30

Miðvikudagar í Laugardalshöll kl 17-19

Fimmtudagar í Laugardalshöll kl 17:30-19:30

Föstudagar í Laugardalshöll kl 17-19

Laugardagar í Laugardalshöll kl 11-13

 

Þjálfari: Óskar Hlynsson, sími 6933026, netfang: oskarhlyns@simnet.is

Tækniþjálfari: Theodór Karlsson (fim.)

Aðstoðarþjálfari: Matthías Már Heiðarson (þri)

 

Æfingagjöld haustönn (sept.-des.):

41.000 6 æfingar á viku.

27.000 1-2 æfingar á viku.

 

Fullorðnir:

 

Þriðjudagar í Laugardalshöll kl 18:30-20

Fimmtudagar í Laugardalshöll kl 18:30-20

Laugardagar í Laugardalshöll 10-12

 

Þjálfari: Óskar Hlynsson, sími 6933026, netfang: oskarhlyns@simnet.is

 

Æfingagjöld haustönn (sept.-des.) 15.000kr

 

Hlaupahópur:

 

Mánudagar og miðvikudagar við Foldaskóla kl 17:30-19

Fimmtudagar í Laugardalshöll á veturnar en úti á sumrin – breytilegur tími

Laugardagar – langt hlaup – breytilegur tími og staðsetning

 

Þjálfarar: Ingvar Hjartarson og Gyða Þórdís Þórarinsdóttir

 

Æfingagjöld:

Ársgjald er 25.000kr

Líka hægt að greiða eina önn í einu þá er gjaldið 10.000 kr (3 annir á ári)

 

Allar upplýsingar um æfingar eru settar inná Facebooksíður æfingahópa:

 

Fjölnir frjálsar 6-9 ára

Fjölnir Frjálsar 11-14 ára

Fjölnir frjálsar

Fjölnir frjálsar fullorðnir

Skokkhópur Fjölnis

 


Helga Guðný í landsliðinu á Evrópubikar

Helga Guðný Elíasdóttir Fjölniskona var valin í landslið Íslands til að keppa í 3000 m hindrunarhlaupi á Evrópubikar. Um er að ræða keppni í 3. deild í Evrópubikarkeppni landsliða. Keppnin fór fram í Skopje í Norður Madedóníu. Liðið náði þeim frábæra árangri vinna til gullverðlauna á mótinu og komast þannig upp í 2. deild.

Helga Guðný stóð sig vel í hindrunarhlaupinu og lenti í 7. sæti á tímanum 12:21,11. Hér er linkur á frétt FRÍ um mótið og hér er linkur á öll úrslit mótsins.


Gott gengi á MÍ

Meistaramót Íslands í frjálsum íþróttum var haldið á Laugardalsvelli helgina 13. – 14. júlí. Er þetta í 93. sinn sem mótið er haldið. Fjölnir átti 11 keppendur á mótinu. Fjögur þeirra komust á verðlaunapall.

Helga Guðný Elíasdóttir fékk silfur í 3000m hlaupi kvenna á tímanum 11:13,69.

Daði Arnarson fékk silfur í 800m hlaupi karla á tímanum 1:59,82.

Kjartan Óli Ágústsson fékk brons í 800m hlaupi karla á tímanum 2:00,95 og einnig fékk hann brons í 1500m hlaupi karla á tímanum 4:19,25. Var hann að bæta sinn persónulega árangur í 1500m hlaupinu.

Bjarni Anton Theódórsson fékk brons í 400m hlaupi karla á tímanum 50,82sek.

Öll úrslit mótsins eru hér.


Góður árangur á MÍ 11-14 ára

Meistaramót Íslands í frjálsum íþróttum fyrir 11-14 ára var haldið á Laugardalsvelli helgina 22. – 23. júní í góðu veðri. Fjölnir átti 9 keppendur á mótinu að þessu sinni. Stóðu þau sig mjög vel og voru margir að bæta sinn persónulega árangur í ýmsum greinum. Tvö ungmenni komust á verðlaunapall.

Sara Gunnlaugsdóttir (14 ára) stóð sig mjög vel á mótinu. Hún varð Íslandsmeistari í 600m hlaupi á tímanum 1:51,09. Hún fékk silfur í 80m grind á tímanum 13,30sek og hún fékk brons í 100m hlaupi á tímanum 13,53sek.

Aman Axel Óskarsson 13 ára fékk brons í kúluvarpi með kast uppá 9,13m.

Sveit Fjölnis vann brons í boðhlaupi pilta 12 ára á tímanum 66,69sek. Í sveitinni voru Þorkell Máni Erlingsson, Sturla Yafei Chijioke Anuforo, Kjartan Óli Bjarnason og Halldór Ríkharðsson. Þeir eru allir 12 ára nema Sturla sem er 11 ára.

Öll úrslit mótsins eru hér.

Á myndunum eru Sara og boðhlaupssveitin.


5 gull á MÍ 15-22 ára

Meistaramót Íslands í frjálsum íþróttum fyrir 15-22 ára fór fram á Selfossvelli helgina 15. - 16. júní. Fjölnir átti 11 keppendur á mótinu sem stóðu sig mjög vel. Samtals fékk Fjönisfólkið 5 gull, 4 silfur og 4 brons sem er frábær árangur hjá þessu unga íþróttafólki.

Kjartan Óli Ágústsson varð Íslandsmeistari í 800m hlaupi og 1500m hlaupi í flokki 16-17 ára pilta. Tímarnir hans voru 2:04,83 í 800m hlaupinu og 4:34,50 í 1500m hlaupinu.

Bjartur Gabríel Guðmundsson varð Íslandsmeistari í hástökki pilta 16-17 ára með stökk yfir 1,78m. Bjartur fékk einnig silfur í 200m hlaupi og brons í 100m hlaupi.

Helga Þóra Sigurjónsdóttir varð Íslandsmeistari í hástökki stúlkna 18-19 ára með stökk yfir 1,65m.

Kolfinna Ósk Haraldsdóttir varð Íslandsmeistari í langstökki stúlkna 15 ára með stökk upp á 4,87m. Kolfinna fékk einnig brons í 100m hlaupi.

Diljá Mikaelsdóttir fékk silfur í hástökki stúlkna 20-22 ára og brons í langstökki.

Vilhelmína Þór Óskarsdóttir fékk  silfur í 400m hlaupi stúlkna 20-22 ára.

Elísa Sverrisdóttir fékk brons í 200m hlaupi stúlkna 16-17 ára.

Katrín Tinna Pétursdóttir fékk silfur í hástökki stúlkna 16-17 ára.

Öll úrslit mótsins eru hér.

Á myndinni er Helga Þóra.