Sumarstörf Fjölnis 2024

Við höfum opnað fyrir umsóknir í sumarstörf Fjölnis 2024. Öllum umsóknum verður svarað.

Við bjóðum upp á fjölbreytt störf fyrir 15-25 ára. Í boði er að vinna á íþróttasvæðinu í Dalhúsum, á sumarnámskeiðum deilda ásamt fjölgreinanámskeiði félagsins.
Umsækjendur geta hakað við það starf sem þeir óska eftir, það er í boði að velja fleiri en eitt starf, t.d. að starfa á knattspyrnu- og listskautanámskeiðum.

Vinnutímabil fyrir 15-16 ára er samtals 105 tímar. Samið er um vinnutíma þegar ráðning liggur fyrir. Umsækjendur þurfa einnig að sækja um hjá Vinnuskólanum.Vinnutímabil fyrir 17-25 ára fer eftir nánara samkomulagi þegar ráðning liggur fyrir. Umsækjendur þurfa einnig að sækja um hjá Hinu Húsinu.

Laun eru greidd út samkvæmt kjarasamningum Reykjavíkurborgar.

Allar nánari upplýsingar veitir skrifstofa Fjölnis á sumarnamskeid@fjolnir.is.

 

Skráning fer fram hér:

https://forms.office.com/pages/responsepage.aspx?id=tQYbx3SIz0emX0cicrdwf9xPGYOlIM5Fo5kx7iGGC7RUN1pFRlBEM1dJS0NIM1BMTllKTU9JU0NZTS4u

#FélagiðOkkar

 

 


Fulltrúar Fjölnis í æfingahópum yngri landsliða í körfubolta

Það gleður okkur að tilkynna að eftirtaldir leikmenn okkar hafa verið valdir áfram í næstu æfingahópa yngri landsliða KKÍ. Þar hafa verið valdir minni æfingahópar í kjölfar æfinganna í desember sl. hjá fyrstu stóru hópunum en næst verða æfingar hjá liðunum 16.-18. febrúar.

Um er að ræða leikmenn liða U15, U16, U18 drengja og stúlkna auk U20 karla og kvenna.

Við vorum að fá þessar gleðilegu fréttir inn á borð hjá okkur í körfunni og sendum hamingjuóskir á okkar frábæru iðkendur sem eru nú einu skrefi nær lokaúrtaki í verkefni sumarsins hjá yngri landsliðunum.

Við erum ótrúlega stolt af okkar unga fólki og metnaðnum þeirra

Áfram Fjölnir!


Fulltrúar Fjölnis í æfingahópum yngri landsliða í körfubolta

**Uppfært** Á upptalninguna vantaði Guðmund Aron Jóhannesson í U20 og Helenu Rut Ingvarsdóttur í U15

Þjálfarar landsliða U15, U16, U18 drengja og stúlkna og U20 karla og kvenna hafa nú valið og boðað sína fyrstu æfingahópa sem æfa um miðjan desember. Þetta eru fyrstu stóru æfingahóparnir hjá hverju liði en upp úr þessum hópum verður svo valið í næstu minni æfingahópa sem koma til æfinga í febrúar næstkomandi.

Öll liðin hafa verkefni á komandi sumri en þá munu U15 liðin fara í mót eða verkefni með Norðurlöndunum og svo eru U16, U18 og U20 öll að fara á NM í lok júní og byrjun júlí og svo halda þau öll á EM mót FIBA hvert um sig í kjölfarið. Öll íslensku liðin leika í B-deild Evrópumótsins nema U20 karla sem leika í A-deild líkt og í fyrra. Í A-deildum eru eingöngu topp 16 landsliðin í hverjum árgangi ár hvert og 2-3 lið fara upp og niður milli ára, og þá eru öll önnur lönd í B-deildunum, auk nokkurra í C-deildum.

Innilega til hamingju og gangi ykkur vel!


Körfuknattleiksdeild Fjölnis semur við Raquel Laneiro

Körfuknattleiksdeild Fjölnis semur við Raquel Laneiro

Raquel er 22 ára bakvörður. Kemur frá portúgal og er 170cm á hæð. Hún er landsliðsmaður í sínu heimalandi ásamt að hafa spila fyrir yngri flokka landsliðs

Raquel spilaði fyrir Njarðvík á síðasta tímabili og gerði þar vel. Hún var með 16 stig að meðaltali 5 fráköst og 6 stoðsendingar
Bjóðum Raquel velkomna í voginn


Körfuknattleiksdeild Fjölnis semur við Kristófer Má Gíslason

Fjönir hefur krækt í Kristófer Má Gíslason sem er 26 ára vængmaður sem hefur leikið stórt hlutverk með liði Skallagríms. Hann spilaði með Ármanni á síðustu leiktíð, er verulega góð þriggja stiga skytta og alhliða leikmaður.

Hann kemur til með styrkja ungt og gott lið Fjölnis mikið með reynslu sinni úr úrvalsdeildinni og 1. deild.

Nú er myndin að skýrast í Grafavoginum og Kristófer púsl í þeirri mynd að gera Fjölni að sterku liði næsta tímabil í 1. deildinni.

Við bjóðum Kristófer Má velkominn til okkar og væntum mikils af honum fyrir komandi átök.


Körfuknattleiksdeild Fjölnis semur við William J. Thompson

Fjölnir hefur samið við William J. Thompson en hann spilaði með Ármanni á síðasta tímabili en ÍA tímabilið þar á undan.

William er 203 cm öflugur miðherji sem kemur til með að styrkja liðið í vörn og sókn. Hann spilaði með Felician háskólanum í fjögur ár við góðan orðstýr.

Hann hefur leikið víða um heim og gert það gott undir körfunni í fráköstum, blokkuðu skotum og stigaskori.

Wiliam kemur til með að styrkja Fjölnisliðið og auka breidd leikmannahópsins sem er óðum að taka á sig lokamynd.

Fjölnisfólk býður William velkominn í Grafarvoginn og vitum að hann á eftir að skína skært hjá okkur á komandi tímabili.


Fjölnir semur við Kennedy Clement og Lewis Diankulu

Fjölnir semur við Kennedy Clement

Kennedy hefur leikið með Selfossi síðustu tímabil við góðan orðstýr. Kennedy, sem kemur frá Spáni og er fæddur 2002 og er 202 cm á hæð, kemur úr ungmennastarfi Real Betis en þaðan hafa komið margir verulega sterkir atvinnumenn s.s. Kristaps Porzingis hjá Dallas Mavericks og Tomas Satoransky hjá Barcelona verandi tveir þeirra.

Ljóst er að Kennedy er mikill fengur fyrir Grafarvoginn en sjálfur sagðist hann vera tilbúinn að hjálpa liðinu að komast í efstu deild. ,,Ég er mjög spenntur að hafa samið við Fjölni og hlakka til að hefjast handa enda verðugt verkefndi framundan hjá Fjölni. Ég er tilbúinn að leggja mitt af mörkum,” sagði Kennedy eftir að hafa skrifað undir á dögunum.

Lewis Diankulu áfram í Grafarvoginum
Lewis mun snúa aftur í Grafarvoginn og leika með liðinu næsta vetur í fyrstu deildinni. Hann var sterkur fengur fyrir félagið á síðasta tímabili og skilaði rúmlega 20 stigum í leik og 10 fráköstum að meðaltali og því hefur verið óskað eftir kröftum hans aftur. Lewis er 28 ára, 201 cm, kanadískur sem leikur sem miðherji/framherji spilaði í sumar sem atvinnumaður fyrir lið í Bretlandi og Indónesíu en áður fyrr var hann fjögur ár, 2015 til 2019, í bandaríska háskólaboltanum.

Lewis sagðist við undirritunina vera ánægður að vera komin “heim” til síns heima frá Kanada og geta haft vinsamleg og jákvæð áhrif innan sem utan vallar. “Ég hef alla tíð síðan ný stjórn tók við í febrúar fundið fyrir miklum metnaði í uppbyggingu félagins, jafnt hjá yngri og eldri flokkum, og mig langar að vera hluti af þeirrri þróun, og það er ástæðan fyrir því að mig langar að taka slaginn áfram ásamt því að þjálfarinn og ég vitum nákvæmlega hvað við þurfum að gera til að ná því markmiði.”

Kkd Fjölnis


Körfuknattleiksdeild Fjölnis semur við sex leikmenn!

Körfuknatt­leiks­deild Fjöln­is skrifaði undir nýja samninga við sex af efnilegustu leikmönnum meistaraflokks karla þess efnis að spila með liðinu á næsta tímabili. Um er að ræða þá Rafn Kristján Kristjáns­son, Fannar Elí Hafþórsson, Guðmund­ur Aron Jó­hann­es­son, Garðar Kjart­an Norðfjörð, Kjartan Karl Gunnarsson og Brynjar Kári Gunnarsson sem er einmitt þessa dagana í landsliðsverkefni. Áður höfðu Vikt­or Máni Stef­fen­sen og Ísak Örn Bald­urs­son skrifað undir nýja samninga.

Deildin er virkilega ánægð að sjá þessa efnilegu og frábæru körfuboltamenn framlengja í Grafarvoginum enda miklar vonir bundnar við þá þar sem margir hverjir þeirra eru að fara að spila stór hlutverk á komandi tímabili. Þessi hópur hefur sýnt að hann er tilbúinn í átök og að sjálfsögðu er stefnan sett á góðan árangur.  Mikilvægt er að halda í heimamenn sem eiga án efa eftir að vera í framvarðarsveit Fjölnis á næstu misserum.

Fjöln­ir lék um laust sæti um að komast í Subway deildina í vor en tapaði eftir fimm leikja rimmu þar sem Hamar fór með sigur og vann sér laust sæti í Subway deildinni.

Kkd Fjölnis


Borche Ilievski framlengir í Grafarvogi

Borche Ilievski hefur skrifað undir nýjan samning við körfuknattleiksdeild Fjölnis og mun hann þjálfa meistaraflokk karla hjá félaginu til ársins 2026. Borche hefur stýrt meistaraflokk Fjölnis ásamt yngri flokkum félagsins frá 2022. Borche hefur þjálfað lengi á Íslandi en hann byrjaði á Ísafirði og kom Vestra upp í efstu deild á sínum tíma. Einnig hefur hann þjálfað meistaraflokka Tindastóls, Breiðabliks og ÍR ásamt því að vera yngri flokka þjálfari hjá þessum félögum sem og KR áður en hann gekk til liðs við Fjölni í fyrra.

Borche segist hlakka til næstu ára hjá Fjölni og er spenntur fyrir næsta tímabili: ,,Við erum með góðan leikmannahóp af ungum strákum sem eru í lokahópum yngri landsliðana og við munum halda áfram að byggja upp sterkt og samheldið lið sem mun ná góðum árangri á næstu árum,” sagði þjálfarinn þegar hann skrifaði undir á dögunum.

Samhliða þjálfun meistaraflokks mun Borche þjálfa yngri flokka Fjölnis. ,,Hafin er vinna við að betrumbæta umgjörðina í Grafarvoginum. Ég er ánægður með þróun mála sem mun á endanum skila sér inn á vellinum,” bætti Borche við.

Með framlengingu á samningi Borche er verið að tryggja stöðuleika í þjálfunarmálum í Fjölni en félagið er lagt af stað í ákveðinna vegferð á körfuboltastarfsemi Grafarvogs. Með því að endurvekja barna-og unglingaráð, ráðningu yfirþjálfara, styrktarþjálfara og menntuðum þjálfurum í yngri flokkum félagsins er félagið að ráðast í metnaðarfulla uppbyggingu í öllu starfi klúbbsins. Takmarkið er að Fjölnir verði eftirsóknarverkt félag til að spila fyrir.

Salvör Þóra Davíðsdóttir og Borche Ilievski eftir að sá síðarnefndi skrifaði undir á dögunum

Vormót Fjölnis í frjálsum íþróttum

Vormót Fjölnis í frjálsum íþróttum var haldið í blíðskaparveðri fimmtudaginn 1. júní á frjálsíþróttavellinum í Mjódd.
Ágætis þátttaka var í mótinu en 90 keppendur á aldrinum 11-15 ára mættu til leiks.

Keppnisgreinar voru fjórar: spretthlaup, langstökk, kúluvarp og 600m eða 800m hlaup og keppt í þremur aldursflokkum – 11 ára, 12-13 ára og 14-15 ára.

Keppendur Fjölnis settu fjölmörg persónuleg met og komu heim með 8 verðlaun:

Eva Unnsteinsdóttir vann gull í kúluvarpi og 600m hlaupi og brons í 60m hlaupi og langstökki í flokki 11 ára stúlkna

Haukur Leó Kristínarson vann brons í 600m hlaupi í flokki 11 ára pilta

Hilmir Snær Eyjólfsson vann gull í 800m hlaupi og brons í langstökki í flokki 12-13 ára pilta

Guðrún Ásgeirsdóttir vann brons í kúluvarpi í flokki 14-15 ára stúlkna

Að auki var keppt í nokkrum greinum fullorðinna þar sem Fjölniskeppendur bættu mörg hver sín persónuleg met

Á myndunum má sjá Evu Unnsteinsdóttur taka á móti gullverðlaunum og Guðrúnu Ásgeirsdóttur taka á móti bronsverðlaunum