Árgangamót Fjölnis í knattspyrnu 17. september 2022
Árgangamót Fjölnis í knattspyrnu verður haldið laugardaginn 17. september 2022 við toppaðstæður inni í Egilshöll. Árgangamótið er tengt við Októberfest í Grafarvogi sem er síðar um kvöldið í Egilshöll.
Yngstu árgangar sem bætast við frá því síðast eru '01 og '02 og við bjóðum þá árganga hjartanlega velkomna.
Dagskráin er eftirfarandi:
-Árgangamótið hefst kl. 9:00 og klárast kl. 13:00.
-Hver leikur er 1x 12 mín
-6 á móti 6 (1 í markmaður og 5 útileikmenn)
-Mótinu verður aldursskipt
-Verðlaunaafhending og lokahóf á Októberfest um kvöldið
-Dansiball frameftir nóttu í Egilshöll á okkar heimvelli í Grafarvogi!
Verð og pakkadílar:
Árgangamót = 3.500 kr.
Ball = 4.900 kr.
Októberfest (borðhald og ball) = 10.900 kr.
Árgangamót + Októberfest = 12.900 kr.
Árgangamót + Ball = 7.400 kr.
Allir velkomnir. Sumir árgangar eru fjölmennir því er í lagi að vera með fleira en eitt lið í hverjum árgangi á meðan aðrir eru sameinaðir.
Fyrirliðar hvers árgangs, sem verða kynntir á næstu dögum, sjá um skráningu og utanumhald og senda á argangamot@fjolnir.is.
Árgangamótin hafa slegið í gegn en hátt í 250 manns á öllum aldri af báðum kynjum tóku þátt síðast sem gerir það af einu stærsta árgangamóti Íslands. Ekki láta þig vanta í ár!
Hér er sérstök grúbba fyrir Árgangamótið:
https://www.facebook.com/groups/968414666503789/
Hér má finna viðburð mótsins á facebook:
Hlökkum til að sjá ykkur 17. september í Egilshöll!
#FélagiðOkkar
Knattspyrnudeild Fjölnis semur við fjölda ungra og efnilegra leikmanna.
Knattspyrnudeild Fjölnis semur við fjölda ungra og efnilegra leikmanna.
Í samræmi við stefnu knattspyrnudeildar Fjölnis í að styrkja enn frekar og byggja upp kvennaknattspyrnu félagsins hefur félagið gert samninga við fjölda ungra knattspyrnumanna. Þessir ungu leikmenn eru í dag burðarstólpar 3.flokks og stutt í framhaldið að þær verði hluti af U20/2.flokk og meistaraflokki Fjölnis.
Það voru þeir Gunnar Hauksson aðalþjálfari 3.flokks kvenna, Sævar Reykjalín formaður barna- og unglingaráðs og Trausti Harðarson formaður meistaraflokksráðs kvenna sem undirrituðu samningana fyrir hönd knattspyrnudeildar.
Leikmenn sem samið var við eru: María Sól Magnúsdóttir, Auður Erla Jónasdóttir, Bjarney Ósk Hilmarsdóttir, Sara Sif Builinh Jónsdóttir, Agnes Lív Pétursdóttir Blöndal, , Hugrún Björk Ásgeirsdóttir, Ólöf Kristjana Þorvaldsdóttir og Thelma Veronika Ingvarsdóttir.
Magnús Haukur Harðarson tekur við sem aðalþjálfari meistaraflokks kvenna hjá Fjölni á nýju tímabili
Stjórn knattspyrnudeildar Fjölnis hefur samið við Magnús Hauk Harðarson að taka við sem aðalþjálfari meistaraflokks kvenna hjá Fjölni á nýju tímabili. Þeir Júlíus Ármann Júlíusson og Theódór Sveinjónsson munu klára tímabilið með liðinu en undir þeirra stjórn fór Fjölnir upp úr 2.deild yfir í Lengjudeildina. Einnig hafa þeir félagar verið öflugir yngri flokks þjálfarar hjá félaginu og hefur gengið vel hjá U20/2.flokki kvenna undir þeirra stjórn. Fjölnir þakkar þeim fyrir störf sín fyrir meistaraflokkinn.
Magnús Haukur er í dag þjálfari hjá Val ásamt því að vera annar af tveimur þjálfurum meistaraflokksliðis KH. Þá er Magnús vel kunnugur starfi innan Fjölnis, hann byrjaði sinn þjálfaraferil þar sem barna- og unglingaþjálfari og hefur áður komið að meistaraflokk kvenna hjá félaginu sem einn af aðstoðarþjálfurum. Frá Fjölni fór Magnús yfir til FH og frá FH lá leið Magnúsar yfir til Vals ásamt því að vera í þjálfarateymi KH.
Fjölnir býður Magnús velkominn til félagsins og hlakkar til samstarfsins.
Nýtt yfirþjálfarateymi yngri flokka knattspyrnudeildar Fjölnis
Nýtt yfirþjálfarateymi yngri flokka knattspyrnudeildar Fjölnis
Knattspyrnudeild Fjölnis er á fullu að skipuleggja næsta knattspyrnu ár og á komandi tímabili verða breytingar á yfirþjálfarateymi 8.-2. flokka Fjölnis er Luka Kostic og Björn Breiðfjörð Valdimarsson taka saman við keflinu.
Björn hefur sinnt yfirþjálfarastarfinu ásamt Arngrími Jóhanni Ingimundarsyni frá því í byrjun sumars, eftir að hafa komið sterkur og metnaðarfullur inn í Fjölnisstarfið sem þjálfari haustið 2021. Hann er uppalinn leikmaður hjá Gróttu og spilaði sjálfur upp alla flokka í því félagi. Björn er með A þjálfaragráðu UEFA og þrátt fyrir fyrir ungan aldur hefur hann mikla reynslu sem þjálfari og hefur meðal annars starfað sem yfirþjálfari hjá yngri flokkum Gróttu og þjálfað alla flokka í því félagi að meistaraflokki undanskildum. Hjá Fjölni hefur Björn þjálfað 3., 4. og 6. flokk karla.
Luka Kostic kemur nýr inn í félagið en býr að áratuga reynslu úr knattspyrnuheiminum. Sem atvinnumaður hefur hann spilað 112 leiki i meistaraflokki og unnið fjölda titla með ÍA. Luka hefur þjálfað U-16, U-17 og U-21 landslið karla , meistaraflokka Grindavíkur, Hauka, Þórs A., KR og Víkings og yngri flokka KR og Hauka auk þess að hafa boðið upp á einstaklingsþjálfun sem fjöldi núverandi og fyrrverandi atvinnumanna og -kvenna hafa nýtt sér. Hann hefur þróað metnaðarfull tól til knattspyrnuþjálfunar einstaklinga sem og liða og sótt sér menntun og þekkingu m.a. til KSÍ og UEFA.
Luka og Björn munu saman hafa yfirumsjón með þjálfun, afreksþjálfun og tækniþjálfun, sem kynnt verður betur á komandi vetri, karla og kvenna í 8.-2. flokkum félagsins. Þannig er stuðlað að auknu jafnrétti á milli kynja og sama krafa um gæði og markmið æfinga hjá karla- og kvennaflokkum. Í samvinnu við frábært þjálfarateymi Fjölnis er markmiðið að byggja enn frekar upp félagið, iðkendur og liðsheild.
Við bjóðum Luka hjartanlega velkominn í Fjölni og hlökkum til áframhaldandi samstarfs með Birni.
Jafnframt þökkum við Arngrími Jóhanni Ingimundarsyni, fráfarandi yfirþjálfara samstarfið og fyrir frábærlega vel unnin störf.
Barna- og unglingaráð knattspyrnudeildar fagnar þessu nýja skipulagi og hlakkar til næsta knattspyrnuárs með metnað, virðingu, samkennd og heilbrigði að leiðarljósi.
Stjórn Barna- og unglingaráðs knattspyrnudeildar Fjölnis
Nýr yfirþjálfari karlaflokka hjá knattspyrnudeild
Nýr yfirþjálfari karlaflokka hjá knattspyrnudeild
Björn Breiðfjörð Valdimarsson (Bjössi) hefur verið ráðinn í stöðu yfirþjálfara karlaflokka hjá knattspyrnudeild Fjölnis og hefur nú þegar hafið störf. Bjössi er með A þjálfaragráðu UEFA og hefur góða reynslu af þjálfun, meðal annars sem yfirþjálfari hjá yngri flokkum Gróttu, og hefur þjálfað hjá Fjölni við góðan orðstír frá því á haustmánuðum 2021. Bjössi mun áfram sinna þjálfun flokka hjá félaginu eins og verið hefur.
Þetta er góður liðsstyrkur fyrir félagið enda mikið álag framundan í leikjum og mótum nú þegar sólin er farin að skína og spennandi sumar framundan hjá öllum flokkum.
Fjölniskveðja
Barna- og unglingaráð knattspyrnudeildar Fjölnis
ANNIINA SANKOH MEÐ Í SUMAR
Finnski framherjinn, Anniina Sankoh, hefur gengið til liðs við meistaraflokk kvenna fyrir baráttuna sem framundan er í Lengjudeildinni. Anniina, sem er 25 ára, kemur til okkar frá Lynn University í Flórída-fylki þar sem hún hefur leikið síðustu ár við góðan orðstír en hún er uppalin hjá HJK í Helsinki. Hún á einnig landsleiki með U17 landsliði Finnlands. Anniina er tæknilega mjög góð og getur leyst allar fremstu stöður vallarins en hún hefur raðað inn mörkum í bandaríska háskólaboltanum upp á síðkastið. Við væntum því mikils af samstarfinu og bjóðum Anniina hjartanlega velkomna í Voginn fagra.
#FélagiðOkkar
Mynd: Baldvin Örn Berndsen
SOFIA MANNER MEÐ Í SUMAR
Finnski markvörðurinn, Sofia Manner, hefur samið við Knattspyrnudeild Fjölnis út tímabilið 2022 í baráttunni sem er framundan í Lengjudeild kvenna. Sofia, sem er 24 ára, kemur til okkar frá Lynn University í Flórída-fylki þar sem hún útskrifaðist nú fyrr í vor. Áður var hún á mála hjá Honka í efstu deildinni í Finnlandi en hún er uppalin hjá HJK í Helsinki. Sofia er hávaxin og öflugur markvörður sem lék á árum áður með U17 ára landsliði Finnlands. Knattspyrnudeild Fjölnis býður Sofia hjartanlega velkomna í Voginn og væntir mikils af samstarfinu.
#FélagiðOkkar
Mynd: Baldvin Örn Berndsen
MOMOLA ADESANMI MEÐ Í SUMAR
Knattspyrnudeild Fjölnis hefur samið við bandaríska varnarmanninn Momola Adesanmi, eða Mo eins og hún er kölluð, út tímabilið 2022. Mo, sem er 23 ára, kemur til okkar frá hinum virta háskóla University of Missouri þar sem hún útskrifaðist fyrr á árinu. Hún er þekkt fyrir hraða sinn og styrk og mun nýtast liðinu mjög vel í baráttunni í Lengjudeildinni í sumar.
Knattspyrnudeild Fjölnis væntir mikils af samstarfinu og býður Mo hjartanlega velkomna í Grafarvoginn.
#FélagiðOkkar
Mynd: Baldvin Örn Berndsen
Alda Ólafsdóttir með í sumar
Fjölnir hefur samið við Öldu Ólafsdóttur út keppnistímabilið 2022. Alda, sem er fædd árið 1996, kemur til okkar að láni frá Aftueldingu þar sem hún hefur leikið síðustu ár. Áður var hún á mála hjá FH. Á síðasta tímabili var Alda frá vegna barneigna en sneri aftur á völlinn með Fjölni í vor.
Alda hefur leikið 126 KSÍ leiki og skorað í þeim 38 mörk. Þar að auki á hún sex yngri landsleiki, tvo með U18 og fjóra með U17. Það er mikið fagnaðrefni að fá þennan öfluga miðjumann til liðs við félagið sem getur einnig leyst hinar ýmsu stöður. Knattspyrnudeildin hlakkar til komandi tímabila saman og væntir mikils af samstarfinu.
#FélagiðOkkar
Mynd: Baldvin Örn Berndsen
Júlíus og Theodór framlengja
Það er Knattspyrnudeild Fjölnis mikil ánægja að tilkynna að meistaraflokksþjálfarar kvenna, þeir Júlíus Ármann Júlíusson og Theodór Sveinjónsson, hafa framlengt samningum sínum við félagið.
Þeir Júlli og Teddi, eins og þeir eru yfirleitt kallaðir, tóku við meistaraflokki kvenna fyrir síðasta tímabil þar sem þeim tókst að fara með liðið upp úr 2. deildinni á fyrsta tímabili.
Júlli er reyndur og metnaðarfullur þjálfari sem þekkir vel til kvennaboltans en hann gegndi starfi aðalþjálfara meistaraflokks kvenna Aftureldingar frá árinu 2015-2020 þar sem hann stýrði liðinu meðal annars upp úr 2. deild árið 2017. Að auki hefur hann sinnt þjálfun hjá Gróttu í tæp 20 ár við góðan orðstír þar sem hann stýrði meðal annars meistaraflokki karla en hann var einnig sigursæll þjálfari þau 10 ár sem hann var við störf hjá Breiðablik. Júlli hefur lokið UEFA-A þjálfaragráðu.
Tedda þekkjum við Fjölnismenn vel þar sem hann stýrði nokkrum yngri flokkum félagsins hér á árum áður og meistaraflokki kvenna í Landsbankadeildinni árið 2008. Fyrir endurkomuna í Grafarvoginn hafði Teddi þjálfað yngri flokka Víkings með góðum árangri og var jafnframt í þjálfarateymi meistaraflokks kvenna Víkings. Áður var hann þjálfari meistaraflokks kvenna hjá Aftureldingu, Þrótti og aðstoðarþjálfari meistaraflokks kvenna Vals sem varð Íslandsmeistari á árunum 2006 og 2007. Teddi hefur einnig lokið UEFA-A þjálfaragráðu.
Knattspyrnudeild Fjölnis bindur miklar vonir við þá félaga og hlakkar til samstarfsins á komandi tímabilum.